استانا. قازاقپارات - بۇگىن اقمولا وبلىسىنىڭ بۋراباي اۋداندىق سوتىندا مەملەكەتتىڭ ەكونوميكالىق قاۋىپسىزدىگى مەن ەكونوميكالىق قىزمەت سالاسىنداعى قىلمىستار ماسەلەلەرىن تالقىلاۋعا ارنالعان حالىقارالىق كونفەرەنسيا ءوز جۇمىسىن قورىتىندىلادى.
فورۋم جۇمىسىن قورىتا كەلە، ق ر جوعارعى سوتىنىڭ قىلمىستىق ىستەر جونىندەگى قاداعالاۋشى سوت القاسىنىڭ ءتوراعاسى اباي راحمەتۋلين مەملەكەتتىڭ ەكونوميكالىق قاۋىپسىزدىگى - قۇقىقتىق جانە ۇيىمداستىرۋشىلىق قۇرالدارىن، سونىڭ ىشىندە قىلمىستىق-قۇقىقتىق شارالار كەشەنىن قامتاماسىز ەتەتىن ۇلتتىق قاۋىپسىزدىكتىڭ ماڭىزدى بولىگى بولىپ تابىلاتىندىعىن اتاپ ءوتتى.

كاسىپكەرلەردىڭ قۇقىقتارى مەن مۇددەلەرىن قورعاۋ - مەملەكەت باسشىسى جاريالاعان «100 ناقتى قادام» ۇلت جوسپارىن ىسكە اسىرۋ اياسىنداعى مەملەكەتتىك ساياسات باسىمدىقتارىنىڭ ءبىرى. قارجىلىق سوت قۇرۋ، جوعارعى سوتتا ينۆەستيسيالىق داۋلاردى قارايتىن مامانداندىرىلعان القا جانە جوعارعى سوت جانىندا ەكونوميكالىق داۋلار بويىنشا ساراپشىلىق-تاجىريبەلىك پىكىر الماسۋ ءۇشىن شەتەلدىك سۋديالار مەن زاڭگەرلەردەن قۇرالعان حالىقارالىق كەڭەس قۇرۋ - مەملەكەتتىڭ ەكونوميكالىق قاۋىپسىزدىگىن نىعايتۋعا جانە كاسىپكەرلەر مەن ينۆەستورلاردىڭ قۇقىقتارىن ءتيىمدى قورعاۋعا باعىتتالعان ناقتى ءىس-قيمىل بولىپ تابىلادى.

تالقىلاۋ شەڭبەرىندە مەملەكەتتىك ورگانداردىڭ، ۇكىمەتتىك ەمەس ۇيىمدار مەن بيزنەس قاۋىمداستىق وكىلدەرىنىڭ ەكونوميكالىق سالاداعى قۇقىق بۇزۋشىلىقتاردى تەرگەۋ جانە جازا تاعايىنداۋ ماسەلەلەرى بويىنشا كەزدەسەتىن ۇيىمداستىرۋشىلىق، قۇقىقتىق اقتاڭداقتار، سونىڭ ىشىندە سالىق سالۋ جانە مەملەكەتتىك ساتىپ الۋ سالاسىنداعى قۇقىق بۇزۋشىلىقتار، ەكونوميكا سالاسىنداعى قىلمىستىق ارەكەتتەردىڭ جەكەلەگەن قۇرامدارىن ودان ءارى دەكريميناليزاسيالاۋ تۋرالى ۇستانىمدارى تىڭدالدى.

اباي راحمەتۋلين قازاقستاندا سوڭعى 5 جىل كولەمىندە ەكونوميكالىق قىزمەت سالاسىنداعى قىلمىستاردى دەكريمينيزاسيالاۋدىڭ بىرنەشە كەزەڭى جۇزەگە اسىرىلعاندىعىن اتاپ ءوتتى. ناتيجەسىندە جاڭا قىلمىستىق كودەكستە ەكونوميكالىق قىلمىستار قۇرامىنىڭ باسىم بولىگىنىڭ، شامامەن 70 پايىزىنىڭ سانكسياسى باس بوستاندىعىنان ايىرۋدىڭ بالامالى جازاسى رەتىندە ايىپپۇلداردىڭ ايتارلىقتاي كولەمىن، تۇزەۋ جۇمىستارىن جانە باس بوستاندىعىنان شەكتەۋدى كوزدەيدى.

كونفەرەنسيا جۇمىسىنىڭ سوڭىندا قاتىسۋشىلار رەسەي مەن گەرمانيادان كەلگەن عالىمدار مەن ساراپشىلاردىڭ، سوت قاۋىمداستىعى، قۇقىق قورعاۋ ورگاندارى مەن ۇكىمەتتىك ەمەس ۇيىمدار وكىلدەرىنىڭ ايتقان وي-پىكىرلەرىن تالقىلاي كەلە، سوت-تەرگەۋ تاجىريبەسىن ودان ءارى جەتىلدىرۋگە، جەكە جانە زاڭدى تۇلعالاردىڭ قۇقىقتارى مەن زاڭدى مۇددەلەرىن ءتيىمدى قورعاۋعا باعىتتالعان ۇسىنىمداردى ازىرلەدى.