الماتى. قازاقپارات - الماتىدا بۇگىن وقۋشىلار سارايىندا مۇعالىمدەر كۇنىنە وراي قالا اكىمى باۋىرجان بايبەكتىڭ قاتىسۋىمەن كونفەرەنسيا ءوتتى. ونلاين رەجىمدە وتكەن جيىنعا قالانىڭ 201 مەكتەبىنىڭ ۇجىمى قاتىستى.

قالا اكىمى باۋىرجان بايبەكتىڭ ايتۋىنشا، قالانىڭ ءبىلىم بەرۋ جۇيەسىندە ءقازىر 27 مىڭنان استام ۇستاز ەڭبەك ەتىپ ءجۇر. ولاردىڭ ىشىندە 1000-عا جۋىق ءمۇعالىم التىنسارين اتىنداعى توسبەلگى مەن ق ر ءبىلىم بەرۋ ءىسىنىڭ ۇزدىگى مەدالىنىڭ يەگەرى. ال 13 ءمۇعالىم قازاقستان رەسپۋبليكاسىنىڭ ەڭبەك سىڭىرگەن قايراتكەرى اتاعىن العان.

«ەلىمىزدە ءبىلىم بەرۋ سالاسىنىڭ دامۋىنا بارىنشا جاعداي جاسالىپ جاتىر. ەلباسى نۇرسۇلتان نازاربايەۆتىڭ تاپسىرماسىمەن ءبىلىم بەرۋ باعدارلاماسى جۇزەگە اسىپ كەلەدى. مەملەكەت باسشىسى مۇعالىمدەردىڭ ماتەريالدىق احۋالىنا دا كوپ ءمان بەرىپ كەلەدى. 2016 جىلدان باستاپ مۇعالىمدەردىڭ جالاقىسى 44 پايىزعا كوتەرىلەدى. سوڭعى 3 جىلدا قالانىڭ ءبىلىم بەرۋ سالاسىنا بولىنەتىن قارجى 20 پايىزعا ارتتى. بيىل بۇل سوما 54،5 ملرد تەڭگەنى قۇرادى. سوڭعى 5 جىلدا قالادا 46 ءبىلىم بەرۋ نىسانى بوي كوتەردى. ەل بولاشاعىنىڭ كىلتى بۇگىنگى جاستاردا. ءوز كەزەگىندە جاس ۇرپاق بويىنا ءبىلىم عانا ەمەس، ىزگىلىك نۇرىن سەۋىپ وتىرعان سىزدەرگە وسى ونلاين-كونفەرەنسيا ارقىلى العىسىمدى بىلدىرگىم كەلەدى»، - دەدى باۋىرجان بايبەك جيىن بارىسىندا.

ءوز سوزىندە قالا باسشىسى بيىل 1500 پەداگوگ 150-300 مىڭ كولەمىندە ءبىر رەتتىك سىياقى العاندىعىن جەتكىزدى. وسى باعىتتا قالا بيۋدجەتىنەن 320 ملن تەڭگە قاراستىرىلعان.

قالا باسشىسى مۇعالىمدەردى ىنتالاندىرۋدىڭ ۇجىمدىق ۇلگىسىن ۇسىندى.

«ەڭ ۇزدىك مەكتەپتەردى ماراپاتتاۋدى ۇسىنامىن. ياعني، ەگەر مەكتەپتىڭ ۇجىمى قانداي دا ءبىر جەتىستىككە جەتسە، سول مەكتەپتىڭ ۇجىمىنىڭ اراسىندا قالا بيۋدجەتىنەن بولىنگەن 320 ملن تەڭگەنى جالاقىسىنا كوەففيسيەنت رەتىندە ەسەپتەپ بەرۋ كەرەك. ەگەر، قوسىمشا قارجىلاندىرۋ كەرەك بولسا، ءبىز ونى دا قاراستىرىپ كورەمىز. ول باسقا مەكتەپتەرگە ۇلگى بولادى. نەگە ول مەكتەپ ۇزدىك بولدى؟ قانداي جەتىستىگى بار؟ سوعان باسقالارى دا ۇمتىلاتىن بولادى»، - دەدى ب.بايبەك.

№178 فيزيكا-ماتەماتيكالىق ليسەي مەن كوپ ءپروفيلدى كوللەدج ستۋدەنتتەرى ونلاين رەجىمدە بايلانىسقا شىعىپ، ءوز پىكىرلەرى مەن قۇتتىقتاۋلارىن جەتكىزدى.