كوكشەتاۋ. قازاقپارات - كوكشەتاۋدا  اعارتۋشى-پۋبليسيست، ساياحاتشى-گەوگراف، ەتنوگراف، ادەبيەت زەرتتەۋشىسى شوقان ءۋاليحانوۆتىڭ 180 جىلدىعىنا ارنالعان سالتاناتتى شارالار وتۋدە.
اقمولا وبلىسى اكىمدىگىنىڭ قولداۋىمەن «شوقان جولدارى» قوعامدىق بىرلەستىگى ۇيىمداستىرىپ وتىرعان شاراعا سوناۋ جۇڭگو مەملەكەتىنەن، ەلىمىزدىڭ استانا، الماتى، پاۆلودار، سەمەي، قىزىلوردا، تۇركىستان قالالارىنان كەلگەن شىعارماشىلىق، عىلىمي ينتەللەگەنسيا قاتىسىپ جاتىر.

تاڭسارىدەن «مەنىڭ قازاقستانىم» ساۋلەت كومپوزيسياسىنىڭ ماڭىنا جينالعان ستۋدەنتتەر مەن وقۋشىلار قاۋىمى قالانىڭ باستى كوشەلەرىمەن جاياۋ جۇگىرىپ وتسە، شوقان ءۋاليحانوۆتىڭ كوكشەتاۋداعى ەسكەرتكىشىنىڭ ماڭىنا دا اعايىن كوپتەپ كەلىپ، گۇل شوقتارىن قويدى.

ەسكەرتكىش الدىندا  شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ رەكتورى، تەحنيكا عىلىمدارىنىڭ دوكتورى ءابدىمۇتالىپ ءابجاپپاروۆ، شاكارىم اتىنداعى سەمەي مەملەكەتتىك ۋنيۆەرسيتەتىنىڭ دوسەنتى، فيلوسوفيا عىلىمدارىنىڭ كانديداتى ەرزات جەتىبايەۆ قۇتتىقتاۋ ءسوز سويلەپ، دارىندى تۇلعانىڭ ەلىنە سىڭىرگەن زور ەڭبەگى، عىلىم، ساياحاتشىلىق جولى تۋرالى تەبىرەنە بايانداپ بەردى.

مەرەيتويلىق شارالار لەگى ودان ءارى ش.قۇسايىنوۆ اتىنداعى قازاق مۋزىكالىق-دراما تەاترىندا جالعاسىن تاپتى. مۇندا كوپشىلىك «وتكەندى ويلاپ بۇگىنگى كۇننىڭ قامىن جەۋ» دەگەن تاقىرىپپەن شوقاننىڭ ەڭبەكتەرى، ول جايلى جازىلعان كىتاپتار قويىلعان كورمەنى تاماشالادى. ال، تەاتردىڭ كورەرمەندەر زالىندا وتكەن نەگىزگى كەزدەسۋدى فيلوسوفيا عىلىمدارىنىڭ دوكتورى، پروفەسسور راۋشان كوشەنوۆا جۇرگىزىپ وتىردى. 

ق ر ەڭبەك سىڭىرگەن ءارتىسى، جەزتاڭداي ءانشى بيسارا ماكەنوۆا شوقاننىڭ تويىنا شاشۋ رەتىندە الىپ كەلگەن «ابىلاي» ءانىن دومبىرادا ورىنداپ بەرسە، اقىن اپايىمىز ءشامشيا ايتجانوۆا جىردان شاشۋ شاشتى.

شاراعا قىتايدان ات تەرلەتىپ كەلگەن قوناعىمىز، جۇڭگو راديوسىنىڭ اعا ديكتورى جىبەك بازارباي قىزى كەزىندە شوقان ءۋاليحانوۆتىڭ تابانى تيگەن قۇلجا ولكەسى بۇگىندە جۇڭگو قازاقتارىنىڭ كيەلى شاڭىراعىنا اينالعانىن ايتا كەلە، كوكشەلىكتەرگە شەتتە جۇرگەن قانداستارىمىزدىڭ سالەمىن جەتكىزدى.

حالىقارالىق دەڭگەيدەگى مارافونشى، الپىس سەگىز جاستاعى جەلاياق سپورتشى امەنگۇلسىم مۇسىلمانوۆانىڭ اق تىلەكتەرىنە دە زالدا وتىرعان جۇرتشىلىق رازى بولدى.

وبلىستىق ىشكى ساياسات باسقارماسىنىڭ ءبولىم باسشىسى اسىلبەك باياجۇما شوقاننىڭ باي مۇراسىن حالىققا جەتكىزۋدە، اسىرەسە ونى جاستارعا ۇيرەتۋ ىسىنە زور ۇلەس قوسىپ كەلە جاتقانى ءۇشىن پروفەسسور راۋشان كوشەنوۆاعا وبلىستىق اكىمدىكتىڭ العىس حاتىن سالتاناتتى جاعدايدا تابىس ەتتى. 

سونداي-اق، بۇل كەزدەسۋدە «جىل شوقانى» بايقاۋى جەڭىمپازىنىڭ دا ەسىمى اتالىپ، كوپشىلىك نازارىنا وسى بايقاۋ قاتىسۋشىلارى دايىنداعان بەينەبايان كورسەتىلدى.