تاراز. قازاقپارات - تارازدا شەنسي پروۆينسياسىنىڭ  سيان قالاسىنان ۇلى جىبەك جولى باعىتىمەن تارازعا كەلە جاتقان كەرۋەن ەكسپەديسياسىن سالتاناتتى تۇردە قارسى الۋعا دايىندالىپ جاتىر.
ەسكە سالا كەتەيىك، 2014 جىلعى 19 قىركۇيەكتە سياننان ەجەلگى ساۋدا جولىمەن «جۇڭگو - قازاقستان: ۇلى جىبەك جولىنىڭ شاي مادەنيەتى» دوستىق جانە ىنتىماقتاستىق كەرۋەنى شىقتى.

تارازدا جەرگىلىكتى جانە رەسپۋبليكالىق ب ا ق وكىلدەرىنە ارنالعان باسپاسوز-كونفەرەنسياسىندا جامبىل وبلىسى اكىمىنىڭ ورىنباسارى ەرقانات ءمانجۋوۆ  ايتقانداي، كەرۋەندەگى باستاپقىدا ايتىلعان تۇيەلەردىڭ سانى ەداۋىر ازايعان.  

 «كەرۋەن قۇرامىندا 136 تۇيە، 20 جىلقى، 4 اربا، 11 اۆتوموبيل بولعان. ءقازىر تۇيەلەردىڭ سانى ەداۋىر ازايدى - 55. بۇل ءتيىستى سانيتارلىق تالاپتارعا سايكەس شەكارادان وتكىزبەۋىنە بايلانىستى»، - دەپ ءتۇسىندىردى ول.

«وسى سەنبىدە كەرۋەندى جامبىل وبلىسىنىڭ شەكاراسىندا قورداي اۋدانىندا قارسى الدىق. جۋىردا ولاردىڭ تارازعا كەلۋىن كۇتەمىز.

6 قازاندا قالا تۇرعىندارى مەن قوناقتارىن  «تورتكۇل» كەرۋەن-سارايىنا شاقىرامىن، مۇندا تۇڭعىش پرەزيدەنت ساياباعىنا دەيىن شەرۋ بولىپ، اسپاناستى ەلىنىڭ وكىلدەرىن قارسى الامىز. تەاترلاندىرىلعان قويىلىم وتەدى. بۇل قالالاردىڭ مەرلەرى كەلەدى دەپ كۇتەمىز. ولار ادەيى كەرۋەندى ءبىر كۇنگە كەشىكتىرۋدى سۇراعان»، - دەدى ە. ءمانجۋوۆ.

«جۇڭگو - قازاقستان: ۇلى جىبەك جولىنىڭ شاي مادەنيەتى» اۋقىمدى اكسياسى جىبەك جولىنىڭ ەكونوميكالىق بەلدەۋىن قۇرۋ يدەياسىن قولداۋ ماقساتىندا ءوتىپ جاتىر. كەرۋەندى تاڭ ديناستياسى ءداۋىرىنىڭ كيىمدەرىن كيگەن كەرۋەنشىلەر، نايزالى قاراۋىلدار، جىلقىعا جەگىلگەن اربالار مەن اۆتوموبيلدەر شەرۋى سۇيەمەلدەيدى.  كەرۋەن شەنسي پروۆينسياسىندا وسىرىلەتىن فۋسا ەمدىك شايىن اكەلە جاتىر

قاشىقتىعى 5 مىڭ شاقىرىمنان اساتىن ساياحاتتى ۇيىمداستىرۋعا قازاقستاننىڭ دۇنگەن قاۋىمداستىعى مەن «ي-زە فۋسا» كومپانياسى (سيان، جۇڭگو) باستاماشى بولدى. حالىقارالىق ەكسپەديسيانىڭ قازاقستاندىق بولىگىنىڭ باس وپەراتورى الماتى وبلىسى كاسىپكەرلەر پالاتاسى مەن «جاڭا جىبەك جولى» مادەني جانە ەكونوميكالىق ىنتىماقتاستىق حالىقارالىق اكادەمياسى» قق. شارا ۇيىمداستىرۋشىلارى - سيان قالاسىنىڭ اكىمشىلىگى، الماتى جانە جامبىل وبلىستارىنىڭ، الماتى قالاسىنىڭ اكىمدىكتەرى.