قاڭتار ايىنىڭ وزىندە كەمىندە بەس ەلدىڭ كوشباسشىسى جۇڭگو استاناسى بەيجىڭگە بارىپ، قحر ءتوراعاسى سي سزينپينمەن كەزدەستى. ولاردىڭ قاتارىندا ۇلىبريتانيا پرەمەر-مينيسترى كير ستارمەر مەن كانادا پرەمەرى مارك كارني بار. بۇل ساپارلار ەلدەردىڭ اقش-پەن قارىم-قاتىناستاعى بەلگىسىزدىك پەن ساۋدا قىسىمىنا جاۋاپ رەتىندە قىتايمەن بايلانىستاردى قايتا تەڭەستىرۋگە ۇمتىلىپ جاتقانىن كورسەتەدى.

ساراپشىلاردىڭ ايتۋىنشا، بۇل قىتايعا ستراتەگيالىق بەتبۇرىس ەمەس، ءبىراق بەيجىڭمەن ديالوگتى اشىق ۇستاۋعا باعىتتالعان «ساقتىق ساياساتى».

اقش پرەزيدەنتى دونالد ترامپتىڭ تاريفتەر مەن قىسىم ساياساتى كوپتەگەن ەلدەردى بالاما ەكونوميكالىق سەرىكتەستەر ىزدەۋگە يتەرمەلەپ وتىر. وسى جاعدايدا جۇڭگو ءوزىن جاھاندىق تۇراقتاندىرۋشى كۇش ءارى ءىرى نارىق رەتىندە كورسەتۋگە تىرىسۋدا.

مەملەكەتتىك ساپارلارمەن بىرگە بەيجىڭگە ءىرى بيزنەس دەلەگاسيالار دا كەلۋدە. مىسالى، ۇلىبريتانيالىق AstraZeneca كومپانياسى قىتايعا 2030 جىلعا دەيىن 15 ملرد دوللار ينۆەستيسيا سالاتىنىن جاريالادى. دەگەنمەن باتىس ەلدەرى قىتايمەن ەكونوميكالىق ىنتىماقتاستىقتى كۇشەيتە وتىرىپ، اقش-پەن قاۋىپسىزدىك جانە ساياسي بايلانىستاردى ساقتاۋعا تىرىسۋدا. ساراپشىلار مۇنى «ستراتەگيالىق بالانستى ساقتاۋ» دەپ باعالايدى.