رۋح ازعىنداپ، سانا سانسىراپ، مي كەۋەك بولىپ بارادى. بۇعان تۆ تىكەلەي اسەر ەتۋدە. قاي ارنانى قوسساڭ دا ىرجالاقتاعان كلوۋندار، ارزان ءاجۋا، جەڭىل كۇلكى، جاراسپايتىن قالجىڭ، ەبەدەيسىز ميميكا، بوس ءسوز، ەسسىز ەسەرلىك، قاپتاعان تۇسىنىكسىز تەاترلار، ستۋديا ىشىندەگى ستۋديالار، توك شوۋلار، انا جۇلدىز ءسىڭبىردى، انا جۇلدىز ءبۇلدىردى دەگەن وسەك اياڭ، گۋ-گۋ، دۋ-دۋ، زۋ-زۋ مەن شۋ-چۋلار وڭكەي، ءقادىرى قاشقان كۆن، جايدارمان ۆ وبششىم قالايماقان. تىزە بەرسەڭ شىعا بەرەدى. ال كۇندە وسىلاردى ەرىكسىز كورىپ تىڭداپ جۇرگەن ادام دەگراداسياعا ۇشىرايدى. وسىنى كورىپ وتىرىپ ەسىك قاعىلسا، ىرجيىپ ەسىك اشقان تونالادى نە ءبىر بالەگە ۇشىرايدى. وسىنى كورىپ ىڭىلداپ ليا ءلا ءلا دەپ دۇكەنگە بارا جاتقان ادام وپ وڭاي الاياقتار تورىنا تۇسەدى. وسىنى كورىپ دانىككەن ادام رۋحاني نارسەگە قاراعىسى كەلمەيدى، دانالىق ويلارعا قۇلاق اسپايدى. وسىنى كورگەن ادام بويكۇيەزدىككە بوي الدىرادى. يممۋنيتەتىن جوعالتادى، الدانعىش كەلەدى، ءتىپتى قىلمىسكەر قۇربانىنا اينالۋى دا مۇمكىن. وسىنى كورگەن ادام جاسقانشاق، جاسىق كەلەدى. ىرجيىپ ىربيىپ ءجۇرىپ قالايشا مەملەكەتتىك ماشينانىڭ ىقپالىنا توتەپ بەرۋگە بولادى؟ شەنەۋنىكتەرگە كەرەگى دە وسى. ىڭىلداپ ىشىنەن ولەڭ ايتىپ، بەيقام، ماقساتسىز، حا حا حي حيلاپ جۇرگەن ادامنىڭ ەپيفيزى سەمەنت بولىپ، ميى ۋاقىتشا ىستەمەي تۇرادى. تەك ينستينكتى عانا قوسۋلى ايتەۋىر ارى بەرى جۇرەدى، سويلەيدى. ال وسىنداي ماسسا كوبەيسە شەنەۋنىكتەرگە ءتىپتى دە ءتيىمدى. تەلەارنالارعا ءبارىبىر. وزىمىزدەن باستاۋ كەرەك. ەكى اپتادا ءبىر رەت گەدونيستيك باعدارلامانى كورسەك تە جەتىپ جاتىر. ىرجيىپ ءجۇرىپ ولشەپ بەرىلگەن ۋاقىت دەگەن جاقۇتىمىزدى تاۋىسىپ المايىق. كوپ كۇلىپ ءجۇرىپ، جىلاپ قالمايىق اعايىن.
ەربولات قوشقاربايەۆتىڭ فەيسبۋكتاعى پاراقشاسىنان
