استانا وسى قالپىمەن كەتە بەرسە شىنىمەن دە «ارمان قالا» بولاتىن شىعار. سەبەبى، قاراپايىم حالىقتىڭ ءومىر ءسۇرىپ، جان باعۋى وتە كۇردەلى. قالا تۇرعىندارىنىڭ باسىم بولىگى تاپقان-تايانعانىن پاتەراقى جالداۋعا جۇمسايدى ونىڭ ۇستىنە كۇندەلىكتى تۇتىناتىن ازىق-تۇلىك باعاسىنىڭ شارىقتاۋى جىعىلعانعا جۇدىرىق بولىپ وتىر. ال ەندى بۇعان قوعامدىق كولىكتىڭ جىرىن قوسىڭىز. سەبەبى، «ەرتەگى ەلىندە» قوعامدىق كولىكتە ءجۇرۋ قۇنى 90 تەڭگە.
جول ءجۇرۋ باعاسىنىڭ 60 تەڭگەدەن 90 تەڭگەگە كوتەرىلۋىنە قالا اكىمى ادىلبەك جاقسىبەكوۆتىڭ ەش قاتىسى جوق. سەبەبى، بۇل قىمباتشىلىق وعان دەيىن جاسالعان بولاتىن. الايدا، قۇنى 10 ميلليون تۇراتىن جىلى ايالدامالاردىڭ جىرىنا جاقسىبەكوۆ مىرزانىڭ تىكەلەي قاتىسى بار. ارينە، ءبىر قاراعاندا اكىمنىڭ باستاماسىنا «بارەكەلدى» دەگەننەن باسقا ەشتەڭە ايتقىڭ كەلمەيدى. سەبەبى، استانانىڭ قىتىمىر ايازىندا اۆتوبۋستى سارىلا كۇتۋ قاراشا حالىققا وڭاي ەمەس. سوندىقتان دا ەلوردا كوشەلەرىندە جىلى ايالدامالاردىڭ بولعانى وتە ورىندى.
ايتسە دە، قۇنى 36 مىڭ دوللار تۇراتىن ايالدامانىڭ ءبىر ايعا جەتپەي بۇزىلىپ قالۋى وتقا ماي قۇيا ءتۇستى. سەبەبى، ءدال وسىنداي ايالدامالار رەسەيدە نە ءبارى 200 مىڭ رۋبل تۇرادى ەكەن. بۇل تۋرالى «استانا» تەلەارناسىنا بەرگەن سۇحباتىندا كراسنويار قالاسى سۆەردلوۆ اۋدانى اكىمشىلىگى باسشىسىنىڭ ءبىرىنشى ورىنباسارى الەكسەي يسايەۆ ءمالىم ەتتى.
– رەسەيدىڭ كراسنويار قالاسى سۆەدلوۆ اۋدانىنىڭ بيلىگى 2012 جىلى وسىنداي نىسانداردى ورناتقان. بىرەۋى 200 مىڭ رۋبلگە تۇسكەن. ونىڭ وزىنە بيۋدجەتتىڭ ەمەس، بيزنەستىڭ قارجىسىنا تۇرعىزىلدى. ەسكەرەتىن ءبىر جاي ايالدامانىڭ قۇنى وعان قانشا ادامنىڭ سياتىنىنا بايلانىستى. ەگەر كوپ ادام سىيسا، ارينە، قىمباتىراق بولادى. ال ستاندارتتى ايالداما 200-220 مىڭ رۋبل تۇرادى. بۇل ەڭ كوپ دەگەندە 10 مىڭ دوللار، – دەيدى الەكسەي يسايەۆ.
تاياۋدا مەملەكەت باسشىسى نۇرسۇلتان نازاربايەۆ ۇكىمەت باسشىسى كارىم ءماسىموۆتى قابىلداپ، «ناعىز داعدارىس ەندى باستالدى» دەپ مالىمدەدى. بۇل دەگەن ءسوز الداعى ۋاقىتتا قارجىنىڭ وڭدى-سولدى شاشا بەرمەي، ۇنەمدەپ جۇمساڭدار دەگەندى بىلدىرەدى. ايتسە دە استانا قالاسىنىڭ اكىمى ادىلبەك جاقسىبەكوۆكە داعدارىس سەزىلمەگەن سياقتى. ويتكەنى اتالعان اكىمدىك جىلدىڭ سوڭىنا دەيىن قۇنى 10 ميلليون تەڭگە تۇراتىن 25 ايالداما پايدالانۋعا بەرەمىز دەپ قۇلشىنىپ وتىر. دەمەك اكىمدىكتىڭ بيۋدجەتىنەن 25 ايالداماعا 250 ميلليون تەڭگە جۇمسالادى.
وسى رەتتە داعدارىس كەزەڭىندە بىزگە ءدال وسىنداي قىمبات ايالدامالار كەرەك پە دەگەن زاڭدى سۇراق تۋىندايدى. الايدا، ءبىزدىڭ كەيبىر پىسىقايلار «داعدارىس ناعىز اقشا تاباتىن كەزەڭ» دەگەن ءتامسىلدى جاقسى مەڭگەرگەن ءتارىزدى. ونىڭ ۇستىنە اكىمدىك اكەسىن تانىتىپ ماقتاعان VIP ايالدامالاردىڭ ەسىگى بۇزىلىپ، جارامسىز بولىپ جاتىر. ماسەلەن، «ASIA PARK» ساۋدا ويىن-ساۋىق ورتالىعىنا قويىلعان ايالدامانىڭ ەسىگى جابىلماي قالعانىن ءوز كوزىمىزبەن كوردىك. سوندىقتان دا، ونىڭ ىشىندە بولساڭدا، سىرتىندا بولساڭدا ءبارى ءبىر سۋىق اۋا رايى سەزىلەدى. توقسان اۋىز ءسودىڭ توبىقتاي ءتۇيىنى استانالىق تۇرعىندار ادىلبەك جاقسىبەكوۆتىڭ جاڭالىعىن جاقتىرماي وتىر.
ايتپاقشى، جاقسىبەكوۆتىڭ قوعامدىق كولىككە ەنگىزگەن جاڭالىعى بۇل عانا ەمەس. استانا قالاسى اكىمدىگى جازدان بەرى قوعامدىق كولىكتەرگە جاڭارتۋ جۇمىستارىن جۇرگىزىپ جاتىر. مىسالى استانانىڭ ىرگەسىندەگى اۋىلدارعا ەكسپرەسس اۆتوبۋستار قاتىنايتىن بولدى. بۇل ارينە قاراشا حالىققا قولايلى جاعداي جاسالعانىن بىلدىرەدى. الايدا جاڭارتۋدىڭ جاعىمسىز جاقتارىدا جوق ەمەس. ايتالىق، بۇرىن شانحاي بازارىنان باستاپ قاراوتكەل اۋىلىنا دەيىن № 36 اۆتوبۋس قاتىنايتىن. ءقازىر وسى ءبىر باعىتتاعى اۆتوبۋستى ەكىگە ءبولىپ تاستادى. ياعني، بۇگىندە شانحاي بازارىنان قوعامدىق كولىككە مىنگەن ادامدار استانا مەديسينا ۋنيۆەرسيتەتىنەن ءتۇسىپ قالىپ، ەكىنشى №36 اۆتوبۋسقا وتىرادى. دەمەك، بۇرىن 90 تەڭگەگە باراتىن جەرىڭىزگە ءقازىر 180 تەڭگە جۇمساپ جەتەسىز. بۇل جاڭالىققا استانا ىرگەسىندەگى كەيبىر اۋىلداردىڭ تۇرعىندارى نارازى بولىپ، سول كۇنى ماسەلەنى شەشىپ الدى. ال استانا مەن قاراوتكەلگە قاتىنايتىن №36 اۆتوبۋس قاراشانىڭ قالتاسىن قاعىپ تۇر. ۇزىن ءسوزدىڭ قىسقاسى استانا قالاسى اكىمدىگى اۆتوپاركتەردىڭ ايتقانىن ەكى ەتپەي، اقشا تابۋىنا جاعداي جاساپ جاتىر.
سەرىك جولداسباي
استانا
