ءبىز بۇعان دەيىن الماتىداعى قوعامدىق كولىكتەرگە «وڭاي» ەلەكتروندى بيلەتتەندىرۋ جۇيەسىن ەنگىزۋ ماسەلەسى تۋرالى جازعان ەدىك. ماقالادا بۇل باستامانى قولدانىسقا ەنگىزۋ ءبىرشاما قيىندىقتارعا تاپ بولۋى مۇمكىن دەگەن بولجام دا ايتىلعان ەدى. ايتىپ اۋىز جيمادىق، «الماتى كولىك حولدينگى» كومپانياسىنىڭ باسشىلىعى اۆتوبۋس جۇرگىزۋشىلەرىنىڭ «وڭاي» جۇيەسىنە قارسى مايدان اشقانىن جاريالاپ وتىر.

«الماتى كولىك حولدينگى» ءجشس-ى باقىلاۋشىلار كەڭەسىنىڭ مۇشەسى ريفات ابدۋرامانوۆتىڭ ايتۋىنشا، قوعامدىق كولىك جۇرگىزۋشىلەرى بۇرىن وزدەرى جينايتىن جول ءجۇرۋ اقىسىنىڭ ەلەكتروندى جۇيە ارقىلى نەمە مونەتا قابىلدايتىن ارنايى ۆاليداتورلارعا تولەنۋىن «قىزعاناتىن» سياقتى. باقىلاۋشىلار مەن ءبىرقاتار جولاۋشىلار اۆتوبۋستارعا ورناتىلعان «وڭاي» كارتالارىن وقيتىن اپپاراتتاردى پاكەتپەن قاپتاپ تاستاعاندارىن بايقاپ قالىپ، شاعىمدانعان. ءتىپتى، كەي جۇرگىزۋشىلەردىڭ ۆاليداتورلاردى رۇقساتسىز اشىپ، ونداعى اقشاعا قول سالۋ وقيعالارى كەزدەسكەن. ونداي جۇرگىزۋشىلەردىڭ ۇستىنەن قىلمىستىق ءىس تە قوزعالىپ جاتقان كورىنەدى.

1 قازاننان باستاپ الماتىداعى ءبىرقاتار باعىت بويىنشا قوعامدىق كولىكتەردە قولدانىسقا ەنۋى ءتيىس «وڭاي» ەلەكتروندى بيلەتتەندىرۋ جۇيەسى وسىنداي كەدەرگىلەرگە تاپ بولۋدا. ادەتتە، قاراپايىم جول ەرەجەلەرىن ساقتامايتىن اۆتوبۋس جۇرگىزۋشىلەرىنە قۇنى 1500 ەۋرو تۇراتىن قىمبات اپپاراتتاردى سەنىپ تاپسىرعان «الماتى كولىك حولدينگىنىڭ» بۇل ارەكەتى شىنىمەن دە قاسقىرعا قوي باقتىرعاننىڭ كەبى سەكىلدى كورىنەدى. ەندى الدىن-الا ءتۇسىندىرۋ جۇمىستارى جۇرگىزىلىپ، تۇتىنۋشىلار مەن قىزمەت كورسەتۋشىلەردىڭ مادەنيەت دەڭگەيىن دۇرىس باعالاماي اسىعىس شەشىم جاساۋ قىرۋار قارجىنىڭ جەلگە ۇشۋىنا اكەپ سوقپاسا جارار ەدى دەگەن قىنجىلىس كوپتىڭ كوڭىلىن مازالارى ءسوزسىز.