«نۇر وتان» پارتياسىنا دەگەن حالىق سەنىمى كۇن وتكەن سايىن ارتىپ كەلەدى.
پارتيانىڭ الماتى وبلىستىق فيليالىنداعى قوعامدىق قابىلداۋ بولمەسىنە بيىلعى  9 ايدا 4147 ءوتىنىش كەلىپ ءتۇسىپ، ونىڭ 1254 ياعني (30،3%) وڭ شەشىمىن تاپقانى سول سەنىمنىڭ دالەلى بولا الادى. راسىن ايتۋ كەرەك، قاراپايىم تۇرعىندار كەز كەلگەن ماسەلە بويىنشا ءادىل شەشىم مەن قولداۋدى بۇگىندە «نۇر وتان» پارتياسىنان كۇتەدى جانە ەڭ سوڭعى ءۇمىتتىڭ جەتەگىمەن قابىلداۋ بولمەسىنىڭ ەسىگىن قاعادى.
تەكەلى قالاسىنىڭ تۇرعىنى، پارتيا مۇشەسى، زەينەتكەر ليۋدميلا ميحەيەۆا تەكەلى قالالىق فيليالىنىڭ قوعامدىق قابىلداۋ بولمەسىنە ءۇمىت ارقالاپ كەلگەنى انىق. كەيۋانا سول كۇنى كەستەگە سايكەس قابىلداۋ وتكىزگەن قالا اكىمىنىڭ ورىنباسارى بولات بەلدەبەكوۆكە  كەنشىلەر قالاسىن ىستىق سۋمەن جانە جىلۋمەن قامتاماسىز ەتەتىن «كازسينك-تەك» ج ش س كەيبىر  ۇيلەردە تۇرعىندارىنىڭ قارىزى قالىپتاسۋىنا بايلانىستى قالاداعى بارلىق ۇيلەردە  ىستىق سۋ جانە جىلۋمەن قامتۋ جەلىلەرىنىڭ اجىرالىتىنى تۋرالى حابارلاما تاراتقانىن باياندادى. قالا اكىمىنىڭ ورىنباسارى «كازسينك-تەك» ج ش س باسشىسىنا دەرەۋ قوڭىراۋ شالىپ، ماسەلەنى شەشتى.  ياعني ىستىق سۋ جانە جىلۋمەن قامتۋ جەلىلەرى وشىرىلمەيتىن بولدى.
«قىس مەرزىمى تەكەلى قالاسىندا سۋىق ءارى ىزعارلى. ۇيدەگى ىستىق سۋ مەن جىلۋدىڭ تۇراقتىلىعى قارت ادامدار ءۇشىن وتە ماڭىزدى.  وسى ماسەلە ءوزىنىڭ وڭتايلى شەشىمىن تاپقانى ءۇشىن قالالىق فيليالعا جانە قوعامدىق قابىلداۋ وتكىزىپ وتىرعان قالا اكىمىنىڭ ورىنباسارى ب.بەلدەبەكوۆكە ريزاشىلىعىمدى بىلدىرەمىن»، – دەپ العىسىن ايتتى پارتيا ارداگەرى.  
تەكەلى قالالىق فيليالىنىڭ قوعامدىق قابىلداۋ بولمەسىندە اعىمداعى جىلدىڭ 9 ايىنىڭ قورتىندىسى بويىنشا 297 ءوتىنىش-شاعىم ءتۇسىپ، ونىڭ 138ء-ى وڭ شەشىمىن تاۋىپتى.
ەڭبەكشىقازاق اۋداندىق فيليالىنىڭ قوعامدىق  قابىلداۋ بولمەسىنە جاس مامان دينارا قورعاش وتىنىشپەن كەلدى. تىلەگى – ماماندىعى بويىنشا جۇمىسقا ورنالاسۋ ەكەن.  «بۇگىنگى كۇننىڭ باستى ماسەلەسى، اسىرەسە، جاستار اراسىندا، ول – ماماندىعىنا ساي، لايىقتى جۇمىسقا ورنالاسۋ ەكەندىگى جاسىرىن ەمەس. ەسىك گۋمانيتارلىق-ەكونوميكالىق كوللەدجىن بىتىرگەن مەنىڭ الدىمنان دا وسى ماسەلە شىقتى. ماماندىعىم – قازاق ءتىلى مەن ادەبيەتى ءپانىنىڭ ءمۇعالىمى. بارعان جەرلەرىم تاجىريبەنىڭ جوقتىعىن العا تارتادى. بارار جەر، باسار تاۋىم قالمادى»، – دەگەن جاس ماماننىڭ  ءوتىنىشىنىڭ ورىندالۋىنا  اۋداندىق پارتيا فيليالى ءتوراعاسىنىڭ ءبىرىنشى ورىنباسارى قۋات بايعودجايەۆ ىقپال ەتىپ، دينارا اۋداندىق ءبىلىم ءبولىمى ارقىلى قايرات ورتالاۋ مەكتەبىنە جۇمىسقا ورنالاستى. اۋداندىق پارتيا فيليالىنىڭ كەڭەسشىسى باعدات راحيموۆ ماماننىڭ جۇمىسىمەن تانىسۋ ماقساتىندا ارنايى ءبىلىم وشاعىنا بارىپ تا قايتتى. جاس مامان پارتيا پارمەندىلىگىنە ريزاشىلىعىن ءبىلدىرىپ، العىسىن ايتۋدا.
 كەربۇلاق اۋداندىق فيليالىنىڭ قوعامدىق قابىلداۋىنا كەلگەن سارىوزەك اۋىلىنىڭ تۇرعىنى كۇمىسحان مۇحامەتجانوۆا:   «بالام تۇرسىنجان يمانيازوۆ ءى توپ مۇگەدەگى. اپارماعان جەرىم قالمادى. جاعدايىمىز وتە  ناشار. ۇكىمەت تاراپىنان قانداي دا ءبىر كومەك بولار ما ەكەن»، – دەپ       مۇگەدەك بالاسىنا كومەك سۇرادى. پارتيانىڭ كەربۇلاق اۋداندىق فيليالى ءتوراعاسىنىڭ ءبىرىنشى  ورىنباسارى جومارت بوزىمبەكوۆ بۇل  ماسەلەنى ءوز نازارىنا الىپ، اۋداندىق  جۇمىسپەن قامتۋ  جانە الەۋمەتتىك  باعدارلامالار بولىمىنە  حابارلاستى. اۋداندىق جۇمىسپەن قامتۋ جانە الەۋمەتتىك  باعدارلامالار بولىمىندەگىلەر وتىنىشتە جازىلعانداردى راستادى. كۇمىسحان مۇحامەتجانوۆا جەكە كومەكشى رەتىندە  اي سايىن 16 مىڭ تەڭگە كولەمىندە اقشا الاتىن بولدى. وسىلايشا، جارتى جىل بويى شاپقىلاپ، ماسەلەسىن شەشە الماي جۇرگەن انانىڭ ءوتىنىشى بىرەر ساعاتتا قاناعاتتاندىرىلدى.  
كەربۇلاق اۋداندىق فيليالىنىڭ  قوعامدىق قابىلداۋ بولمەسىنە جىل باسىنان بەرى 11 مۇمكىندىگى شەكتەۋلى ازامات كەلىپ، ولاردىڭ وتىنىشتەرىنىڭ 75 پايىزى وڭ شەشىمىن تاپتى.
الماتى وبلىستىق فيليالىنىڭ قوعامدىق قابىلداۋ بولمەسىنە ات ارىلتىپ جەتكەن سارقان اۋدانى، لەپسى اۋىلىنىڭ تۇرعىنى، 3 بالانى تاربيەلەپ وتىرعان جالعىزباستى انا زامزاگۇل كارىموۆا: «مەن استانا قالاسىنداعى ءجۇرىپ جاتقان قۇرىلىستاردىڭ بىرىندە سىلاقشى بولىپ جۇمىس ىستەدىم. كەنجە  بالام تورەقۇل اقزەردەنى مەدرەسەگە ورنالاستىرىپ، ودان كەيىن الماتى قالاسىندا جوعارعى وقۋ ورنىندا اقىلى نەگىزدە وقىپ جاتقان بالامنىڭ قاسىنا بارىپ جاردەمدەسۋدى جوسپارلاعانمىن. الايدا، مەدرەسەگە بالامدى ورنالاستىرۋ مۇمكىن بولماي، كەرى قايتۋعا تۋرا كەلدى»، – دەپ ءوتىنىشىن جەتكىزدى.
انا مەن بالانى وبلىستىق پارتيا فيليالى ءتوراعاسىنىڭ ءبىرىنشى ورىنباسارى سەرىك مۇقانوۆتىڭ ءوزى  ارنايى قابىلداپ، قاراتال اۋدانى، ۇشتوبە قالاسىنداعى №13 مەكتەپ جانىنداعى ينتەرناتقا تورەقۇل اقزەردەنى ورنالاستىرۋعا كومەك جاسادى. سونىمەن بىرگە   پارتيا بەلسەندىلەرىمەن بىرلەسە وتىرىپ، بالانىڭ مەكتەپكە كەرەكتى زاتتارىن جانە مەكتەپ-ينتەرناتقا تولەنەتىن ءۇش ايلىق قاراجاتىن شەشىپ بەردى.