مادەنيەت جانە سپورت مينيسترلىگىنىڭ كەڭەيتىلگەن القا ماجىلىسىندە مينيسترلىك بويىنشا بيىلعى 9 ايدا اتقارىلعان جۇمىستاردىڭ ناتيجەلەرى قورىتىندىلانىپ، الداعى ءىس-جوسپارلار ناقتىلاندى.
ادامزاتقا  ورتاق جوبالار
مادەنيەت جانە سپورت ءمينيسترى ارىستانبەك مۇحامەدي ۇلى «100 ناقتى قادام» – ۇلت جوسپارىن جۇزەگە اسىرۋعا نەگىزدەلگەن اۋقىمدى جوبالار، سونداي-اق، مادەنيەت، سپورت، تىلدەردى دامىتۋ جانە ۇكىمەتتىك ەمەس ۇيىمدارمەن جۇمىس تۋرالى قىسقاشا توقتالا كەلىپ، وسى ارالىقتا سالا قىز­مەتكەرلەرىنىڭ ايتارلىقتاي تابىس­تارعا قول جەتكىزگەنىن باياندادى. ءمينيستردىڭ مالىمدەۋىنشە، كە­لە­شەكتە قازاقستاندا «مادە­­نيەت­تەردىڭ جاقىنداسۋ ورتا­لىعىن» قۇرۋ قولعا الىنباق. بۇل ورتالىق رەسپۋبليكالىق كىتاپ مۋزەيىنىڭ ارقاۋىندا بوي كوتەرەدى دەپ كوزدەلۋدە، سونىمەن قاتار، ونىڭ الداعى ۋاقىتتا يۋنەسكو-نىڭ قامقورلىعى اياسىندا جۇمىس ىستەۋىن قامتاماسىز ەتۋ قاراستىرىلماق. ءمينيستردىڭ ايتۋىنشا، وسىناۋ دەڭگەيدەگى ورتالىق تەك يۋنەسكو-نىڭ باس كونفەرەنسياسىنىڭ قارارى نەگىزىندە عانا قۇرىلا الادى.
سونداي-اق، حالىقارالىق ارىپتەستىكتى دامىتۋ ماقساتىندا، شەتەلدىك عالىمدارمەن تىعىز بايلانىس ورناتىلۋدا. «نورۆەگيا جانە نەمىس عالىمدارى قازاقستاننىڭ بەرەل قورعانى مەن تامعالى پەتروگليفتەرى سىندى تاريحي ەسكەرتكىشتەردى زەرتتەۋگە جانە ونى ساقتاۋعا قاتىستى جەرگىلىكتى عالىمداردىڭ جوبالارىنا قاتى­سۋعا قىزىعۋشىلىق تانىتۋدا. قازاقستان ءوز كەزەگىندە اۋقىمدى جوبالاردى شەتەلدىك عالىمدارمەن بىرلەسىپ جۇزەگە اسىرۋعا مۇمكىندىك بەرەتىن مۇنداي ارىپتەستىك ءارى مادەني ىنتىماقتاستىقتاعى ىس-ارەكەتتەرگە قاشاندا تەك قولداۋ ءبىلدى­رەتىندىگىن العا تارتتى.
ەڭ ءبىرىنشى – ەلدىك مۇددە
نارىق ەكونوميكاسىنا سايكەس مادەنيەت سالاسىندا دا ايتارلىقتاي وڭ ناتيجەلەرگە قول جەتكىزىلىپ كەلەدى، مىسالى، اتاپ ايتار بولساق، مۋزەيلەردىڭ، مۋزەي-قورىقتاردىڭ جۇمىسىن بەلسەندىرۋ ماقساتىندا 2015 جىلى بارلىق ۇيىمدار رمك-دان رمقك ۇيىمداستىرۋ-قۇقىقتىق فورماسىنا ءوتتى. وسىنىڭ ارقاسىندا مۋزەيلەرگە جاڭاشا كوزقاراس قالىپتاسۋدا. ولاردىڭ وزدەرى تابىس تابۋعا مۇمكىندىك اشىلدى. مۇنداي شەشىمنىڭ ءتيىمدى ۇلگىسى ەلورداداعى جاڭادان بوي كوتەرگەن ۇلتتىق مۋزەي بولىپ تابىلادى. ول اقپان-شىلدە ايلارىندا 65 ملن. تەڭگە تابىس تاپقان.
دەمەۋشىلىك پەن مەسەناتتىقتىڭ دامۋى ۇلكەن الەۋەتكە يە دەسەك، قازاق حاندىعىنىڭ 550 جىلدىعىن تويلاۋ ءۇشىن رەسپۋبليكالىق بيۋدجەتتەن قارجىلاندىرۋمەن قاتار، دەمەۋشىلەردىڭ قارجىلاي قولداۋ كورسەتۋى ارقاسىندا ەلدىك توي شىن مانىندەگى حالىقتىق مەرەكەگە اينالدى. ەلوردادا مەم­لەكەت باسشىسىنىڭ قاتى­سۋى­مەن سالتاناتتى جيىن جانە تەاتر­لاندىرىلعان قويىلىم ۇيىم­داستىرىلدى. مەرەيتوي تاراز قالاسىندا جالعاسىن تاپتى. وندا قازاق حاندىعىنىڭ 550 جىلدىعى مونۋمەنتى جانە «كونە تاراز» مۋزەيى، سونداي-اق، «ۇلى جىبەك جولى» ەتنوفەستيۆالى سالتاناتتى جاعدايدا اشىلدى.
 ستۋديا اشىلىپ، ۇيىم قۇرىلادى
مينيستر ءوز سوزىندە، سونىمەن قاتار، «قازاقفيلم» اق-تىڭ الەۋەتىن بىرىكتىرۋ ءۇشىن ينۆەستيسيالار تارتۋ بويىنشا جانە 50/50 ورتالىق قارجىلاندىرۋ قاعيداتى بويىنشا جەكە كومپانيالاردى، ونىڭ ىشىندە شەتەلدىك كومپانيالاردى تارتۋ باعىتىندا جۇمىستار جۇرگىزىلىپ جاتقانىن جەتكىزدى. ۇلتتىق فيلمدەردى ءوندىرۋ قازىرگى زاماننىڭ جارقىن جانە ۇزدىك ۇلگىلەرىن، باي تاريحىمىزدى، مادەنيەتىمىز بەن مۇرامىزدى تانىتاتىن كورنەكتى تۇلعالاردىڭ بەينەسىن ناقتىلى تۇردە كورسەتۋگە باعىتتالعان. وسىعان وراي الداعى ۋاقىتتا ۇلتتىق انيماسيالىق ستۋديا مەن دوكۋمەنتاليستيكا ستۋدياسىن قۇرۋ ماڭىزدى باعىت بولىپ وتىرعانىن تىلگە تيەك ەتتى.
مۇنىڭ قاتارىندا، سونىمەن بىرگە، ەلىمىزدە «قازاقستان» ورتا­لىق كونسەرت زالىنىڭ ارقاۋىندا «قازاقكونسەرت» مەملەكەتتىك كونسەرتتىك ۇيىمىن قۇرۋ ۇسى­نى­لىپ وتىرعانىن بايانداعان ا.مۇحا­مەدي ۇلى: «بۇل ەلوردامىز­دا ورىن­داۋشىلاردىڭ جوعارى كاسىبي پۋلىن قالىپتاستىرۋعا مۇمكىندىك بەرەدى»، – دەپ تۇيىندەدى ءسوزىن.
 سپورت جانە ­دەنە شىنىقتىرۋ
قازاقستان سپورتشىلارى ايتۋلى سايىس­تاردان قۇرقول قايتقان ەمەس. ولار بيىل دا وزدەرىن وتە جوعارى دەڭگەيدە كورسەتە الدى. سونىڭ ءبىرى – «استانا» فۋتبول كلۋبىنىڭ تابىستارى دەۋ ءلازىم. «بيىل پرەمەر-ليگانىڭ «استانا» كومانداسى قازاقستان تاريحىندا العاش رەت چەمپيوندار ليگاسىنىڭ توپتىق كەزەڭىنە وتە الدى. قازاقستان تورىندە تۇڭعىش رەت وتكىزىلگەن دزيۋدودان الەم بىرىنشىلىگىندە وتاندىق قۇراما 1 التىن، 1 كۇمىس ەنشىلەپ، جالپى ەسەپتە 4-ورىندى يەلەندى. تايلاندتا وتكەن ازيا چەمپيوناتىندا ءبىرىنشى ورىن العان قازاقستاننىڭ بوكس قۇراماسى دا ءبىزدى قۋانتتى. اۋىر اتلەتيكادان ازيا چەمپيوناتىندا قازاقستان زىلتەمىرشىلەرى 3 التىن، 2 كۇمىس جەڭىپ الدى»، –دەدى مينيستر.
الداعى XXVIII قىسقى بۇكىلالەمدىك ۋنيۆەرسيادا قارساڭىندا قىسقى سپورت تۇرلەرى بويىنشا سپورتتىق رەزەرۆتى دايىنداۋ، قىسقى سپورت تۇرلەرى بويىنشا جاستارعا ارنالعان سپورت مەكتەپتەرى مەن بولىمشەلەرى جەلىسىن ودان ءارى دامىتۋ ماسەلەسىنە كوپ كوڭىل بولىنۋدە. «ۋنيۆەرسيادا-2017» شاراسىنا ارنايى ەكى مۇز ايدىنى ارەنالارى سالىنۋدا: الاتاۋ اۋدانىندا بوي كوتەرەتىن 12 مىڭ ورىندىق جانە مەدەۋ اۋدانىندا ورىن تەبەتىن 3 مىڭ ورىندىق مۇز ارەنالارى بۇقارالىق سپورتتى دامىتۋعا دەگەن قامقورلىقتىڭ ناقتى كورسەتكىشى بولىپ تابىلادى. ەسكە سالا كەتەيىك، بۇكىلالەمدىك ۋنيۆەرسيادا 2017 جىلعى 28 قاڭتار مەن 8 اقپان ارالىعىندا الماتى قالاسىندا وتكىزىلەدى دەپ كۇتىلۋدە.
«بۇگىنگى تاڭدا ريو-دە-جانەيرودا وتەتىن 2016 جىلعى XXXI جازعى وليمپيا ويىندارىندا ءبىزدىڭ سپورتشىلارىمىزدىڭ ءساتتى ونەر كورسەتۋى مەن ساپالى دايىندالۋىنا قاتىستى جۇمىستار جۇرگىزىلۋدە. قازىرگى ۋاقىتتا سپورتشىلار بوكس، جەڭىل اتلەتيكا، ءجۇزۋ، بايداركادا جانە كانوەدا ەسكەك ەسۋ جانە تاعى دا باسقا سپورتتىڭ 8 ءتۇرى بويىنشا، وليمپيادانىڭ 26 جولداماسىن ۇتىپ الدى»، – دەدى القا ماجىلىسىندەگى سوزىندە ا.مۇحامەدي ۇلى.
ورتاق ويلار – وڭ يدەيالار
القا ماجىلىسىندە مۇنان دا باسقا ءبىرقاتار وزەكتى ماسەلەلەر اڭگىمەگە ارقاۋ ەتىلدى. مادەنيەت جانە سپورت ۆيسە-مينيسترى عالىم احمەدياروۆ «مادەنيەت جانە تاريحي-مادەني مۇرا ماسەلەلەرى بويىنشا ءبىرقاتار زاڭ اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى، ۆيسە-مينيستر مارات ءازىلحانوۆ تىلدەردى دامىتۋ جانە ۇكىمەتتىك ەمەس ۇيىمدارمەن جۇمىس، قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجايەۆا ءبىلىم وشاعىنىڭ جەتىستىكتەرى مەن كەلەشەگى، سپورت جانە دەنە شىنىقتىرۋ ىستەرى كوميتەتىنىڭ ءتوراعاسى ەلسيار قاناعاتوۆ ۇلتتىق سپورت تۇرلەرىن دامىتۋ ماسەلەلەرى، ءدىن ىستەرى كوميتەتىنىڭ ءتوراعاسى عالىم شويكين ءدىننىڭ قازىرگى احۋالى، رەسپۋبليكالىق كورەي مۋزىكالىق كومەديا تەاترىنىڭ ديرەكتورى ليۋبوۆ ني تەاتر ۇجىمدارىنىڭ قازىرگى حال-جايى تۋرالى ويلارىمەن ءبولىستى.
سالا قىزمەتكەرلەرىنىڭ مالىمدەۋلەرىنە قاراعاندا، توعىز ايدا تولىمدى ىستەر اتقارىلىپتى. ءبىراق قول جەتكەن تابىسقا توقمەيىلسۋ بايقالمايدى. ورتاعا سالىنعان لەبىزدەردەن «الدا توسىپ تۇرعان ىستەر مۇنان دا تولايىم» دەگەن وي باسىم ءتۇسىپ جاتتى.
القا ماجىلىسىنە پرەزيدەنت اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالايەۆا قاتىستى.