«ورلەۋ» بىلىكتىلىكتى ارتتىرۋ ۇلتتىق ورتالىعى وبلىستىق فيليالى سانكت-پەتەربۋرگتەگى ديپلومنان كەيىنگى پەداگوگيكالىق ءبىلىم اكادەمياسىمەن بىرىگىپ «ءبىلىم بەرۋ ورتاسى جانە پسيحولوگيالىق قاۋىپسىزدىك» اتتى حالىقارالىق عىلىمي-تاجىريبەلىك كونفەرەنسيا وتكىزدى.
وندا وقىتۋ جانە تاربيەلەۋ ۇدەرىسىندە بالا قاۋىپسىزدىگىن قامتاماسىز ەتۋ، قوقان-لوقى، كۇش كورسەتۋدەن ساقتاندىرۋ، ساپالى ءبىلىم، سانالى تاربيە الۋعا قولايلى جاعدايلار جاساۋ تاقىرىپتارى بويىنشا تالقىلاۋلار ۇيىمداستىرىلىپ، ىس-تاجىريبەلەر تانىستىرىلدى. زاماناۋي تەوريالىق جانە پراكتيكالىق كوزقاراس، ومىرلىك قيىن جاعدايلاردا بالالارعا ادىستەمەلىك كومەكتەر بەرۋ، ارنايى ءبىلىم الۋ جانە ينتەرنات ۇيىمدارىندا پسيحولوگيالىق احۋال ورنىقتىرۋ ماسەلەلەرى ۇلكەن قىزىعۋشىلىق تۋدىردى. القالى جيىنعا اقش، رەسەي، ۋكراينا، گرۋزيا، وزبەكستان، قازاقستان، تاعى باسقا ەلدەردەن 200-گە جۋىق باياندامانىڭ ءتۇسۋى، ولاردىڭ اراسىندا 19 عىلىم دوكتورى مەن كانديداتتىڭ بولۋى كۇن تارتىبىنە ۇسىنىلعان ماسەلەلەردىڭ اۋقىمدىلىعىن اڭعارتسا كەرەك.
پلەنارلىق وتىرىستا قورعان وبلىسى ءبىلىم بەرۋدى دامىتۋ جانە الەۋمەتتىك تەحنولوگيالار ينستيتۋتىنىڭ مەكتەپكە دەيىنگى جانە باستاۋىش جالپى ءبىلىم بەرۋ كافەدراسىنىڭ مەڭگەرۋشىسى، پسيحولوگيا عىلىمدارىنىڭ كانديداتى ەلەنا الفەيەۆا، رەسەي حالىق شارۋاشىلىعى اكادەمياسىنىڭ (سانكت-پەتەربۋرگ قالاسى) قوعاممەن بايلانىس كافەدراسىنىڭ دوسەنتى، سەرتيفيكاتتالعان گەشتالت-تەراپيەۆت اننا سوسنوۆسكايا، ءوسكەمەن مەديسينالىق كوللەدءجىنىڭ وقىتۋشىسى، پەداگوگيكا عىلىمدارىنىڭ ماگيسترى باقىت سەيلحانوۆا ءبىلىم ساپاسىن حالىقارالىق ستاندارتتارعا ءسايكەستەندىرۋ جاعدايىندا كوللەدج ستۋدەنتتەرىنە پسيحولوگيالىق قولداۋ كورسەتۋدىڭ ماڭىزدىلىعىن اتاپ كورسەتتى. ولاردىڭ ايتۋىنشا، قازىرگى تاڭدا يۋۆەنالدى سوتتىڭ نەگىزگى مىندەتى بالالاردى قورعاۋ، سول سەبەپتى، پەداگوگيكا سالاسىمەن تىعىز بايلانىستى ارىپتەستىك قارىم-قاتىناس ورناتۋدىڭ ءمانى ايرىقشا. ءقاۋىپسىز ءبىلىم بەرۋ ورتاسىنداعى قاۋىپ-قاتەر جونىندەگى پىكىرىن پەتروپاۆل قالالىق ىشكى ىستەر باسقارماسى اكىمشىلىك پوليسيا ءبولىمىنىڭ ۋچاسكەلىك ينسپەكتورى اسىلبەك رامازانوۆ ورتاعا سالسا، پسيحونيەۆرولوگيالىق ديسپانسەردىڭ پسيحولوگى تاتيانا ياكوۆليەۆا بالالاردىڭ پسيحيكالىق ءمىنەز-قۇلقىنداعى وزگەشەلىكتەردى ءسوز ەتتى.
ءبىلىم بەرۋ سالاسىنداعى اقپاراتتىق تەحنولوگيالار جانە ءادىستەمەلىك جۇمىس ورتالىعىنىڭ ادىسكەرى يرينا ياكيموۆا ءبىلىم بەرۋ جۇمىسىن ۇيىمداستىرۋدىڭ جاڭاشىلدىقتارىمەن ءبولىستى.
پلەنارلىق وتىرىستى «ورلەۋ» باۇو جەرگىلىكتى فيليالىنىڭ ديرەكتورى، پەداگوگيكا عىلىمدارىنىڭ دوكتورى الما مىرزالينوۆا قورىتىپ، سالماقتى ءپىكىرلەر ايتتى.
سەكسيالىق وتىرىستار پەداگوگتاردىڭ، الەۋمەتتىك ۇستازداردىڭ قاتىسۋىمەن پسيحولوگيالىق ترەنينگ، كوۋچينگ، شەبەرلىك سىنىپ ءتۇرىندە ءوتتى. بىلىكتى پسيحولوگتاردان قۇرىلعان ساراپتاما توبى كونفەرەنسيادا ايتىلعان عىلىمي-تاجىريبەلىك ۇسىنىستاردى توپتاستىرىپ، ءبىلىم ۇيىمدارىنا تاراتاتىن بولىپ كەلىستى. كونفەرەنسياعا قىتىسۋشىلاردىڭ ءبىر توبىنا ارنايى سەرتيفيكاتتار تابىس ەتىلدى.
وسى كۇنى فيليالدىڭ دەڭگەيلىك باعدارلامالار ورتالىعى ۇيىمداستىرعان «ىنتىماقتاستىق ورتا – وقۋ قوعامداستىعىنىڭ ماڭىزدى بۋىنى» تاقىرىبى بويىنشا رەسپۋبليكالىق ۆەبينار وتكىزىلدى.
وندا مۇعالىمدەر مەن وقۋشىلاردىڭ تانىمدىق بەلسەندىلىكتەرىن ارتتىرۋ ءۇشىن ىنتىماقتاستىق ورتا قۇرۋدىڭ جاڭا امالدارى قاراستىرىلدى. مەكتەپكە دەيىنگى تاربيە جانە باستاۋىش ءبىلىم بەرۋ كافەدراسىنىڭ اعا وقىتۋشىسى داريعا ابىشيەۆانىڭ ايتۋىنشا، ءۇش بولىمنەن تۇرعان اتالعان شاراعا ەلىمىزدىڭ وبلىستارىنان 300-گە جۋىق ۇستاز قاتىسىپ، وي-پىكىرلەر الىستى. دەڭگەيلىك باعدارلامالار ورتالىعى ترەنەرلەرىنىڭ باياندامالارى تىڭدالىپ، بەلسەندى ارەكەتكە جۇمىلدىرۋ ماسەلەلەرى قوزعالدى. زاماناۋي مەكتەپ جاعدايىندا ىنتىماقتاستىق ورتانى قالىپتاستىرۋدىڭ وزەكتىلىگى، ءمۇعالىمنىڭ ءرولى قامتىلدى. ماسەلەن، الماتىلىق اعا وقىتۋشى، بيولوگيا عىلىمدارىنىڭ كانديداتى م.تۇراربەكوۆ وقىتۋ بارىسىندا رەپرودۋكتيۆتى ارەكەتتەن شىعارماشىلىق ارەكەتكە ءوتۋ داعدىلارىن ىسكە اسىرۋدىڭ ءتيىمدى جولدارى جايلى تاجىريبەسىمەن تانىستىردى. شىعىس قازاقستان وبلىستىق دەڭگەيلىك باعدارلامالار ورتالىعىنىڭ مامانى گ.بەرىكپولوۆا گوۆارد گاردنەردىڭ وقىتۋ جانە ءبىلىم الۋ ۇدەرىستەرىنە بايلانىستى كوللابوراتيۆتى ورتانى قۇرۋ تەورياسىن ناقتى مىسالدارمەن بايلانىستىردى. باسقا دا پىكىر بىلدىرۋشىلەر ءوز ساباقتارىندا كوللابوراتيۆتى ورتانىڭ وقۋ قوعامداستىعىندا الاتىن ورنىن ماقۇلدايتىندارىن ءبىلدىردى.
ۆەبيناردىڭ قورىتىندى كەزەڭىندە قاتىسۋشىلار اقپاراتتىڭ تيىمدىلىگىن، ۇسىنىلعان زەرتتەۋ جۇمىستارىنىڭ تاقىرىپتى اشا بىلگەنىن العا تارتتى. وسىنداي وزەكتى تاقىرىپتار شەڭبەرىندە ءجيى كەزدەسىپ، ۇتىمدى تالقىلاۋلار ۇيىمداستىرىپ تۇرۋعا ۋاعدالاستى.
دەرەككوز: «ەگەمەن قازاقستان».
