سولتۇستىك قازاقستان وبلىسىندا قار استىندا قالعان جولدارعا اسفالت توسەلۋدە. بۇل تۋرالى «قامشى» پورتالى «استانا» ارناسىنا سىلتەمە جاساپ حابارلايدى.
رەسپۋبليكالىق ماڭىزداعى «جەزقازعان-پەتروپاۆل» تاس جولىنىڭ سقو اۋماعىنداعى بولىگىندە قار ۇستىنەن اسفالت توسەۋ جۇمىستارىنىڭ جۇرگىزىلىپ جاتقانى تۇسىرىلگەن بەينەجازبا «استانا» ارناسىنا جىبەرىلگەن. الايدا، ماماندار مۇنداي ارەكەتكە تاڭ قالۋعا بولمايتىنىن، كۇننىڭ سۋىق مەزگىلىندە دە جول جابىندىلارىن توسەۋدىڭ ارنايى تەحنولوگيالارى بار ەكەنىن ايتقان. سونىمەن قاتار، سقو-دا كليماتتىق ەرەكشەلىكتەرگە بايلانىستى جول جوندەۋ ماۋسىمى بۇل وڭىردە ەرتە اياقتالاتىنى دا ايتىلعان.
«بۇگىندە اسفالت توسەپ جاتقان مەردىگەر ارنايى بەلسەندىرىلگەن مينەرالدى ۇنتاقتاردى پايدالانۋدا. قار جاۋىپ تۇرعان كەزدە اسفالت توسەۋ جۇمىستارى توقتاتىلعان بولاتىن. تەحنيكالىق قاداعالاۋ ورگاندارىنىڭ ۇسىنىستارى بار. سوسىن مەردىگەر قوسىمشا قاراجاتقا ارنايى ۇنتاقتار الىپ جۇمىستى جالعاستىردى. مۇنداي جۇمىستار ەگەر، قايتادان جاۋىن-شاشىن بولاتىن بولسا توقتاتىلادى»، - دەيدى «قازاۆتوجول» ۇك» اق-ى سقو-ى بويىنشا فيليالى ديرەكتورىنىڭ ورىنباسارى الماس ىدىرىسوۆ.
