شىمكەنتتە وبلىس اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ كەڭەيتىلگەن وتىرىسى ءوتتى. جيىندا قارالعان ماسەلەلەردىڭ العاشقىسى كوميسسيانىڭ جىل باسىنان بەرى اتقارعان جۇمىسى تۋرالى بولدى. سونىڭ ىشىندە تۇركىستان قالاسى مەن تولەبي اۋداندارىنداعى جاعدايعا ەرەكشە ءمان بەرىلدى. اۋدان مەن قالا اكىمدەرىنىڭ ءدال وسى سالاعا قاتىستى ورىنباسارلارى جىل باسىنان بەرى جۇزەگە اسىرعان جۇمىستارى تۋرالى ەسەپتەرىن قولىنداعى قاعازعا جازىلعان جازۋدى سۋدىرلاتىپ وقىپ بەرۋدەن ارى اسا المادى. ءتىپتى كوميسسيا ءتوراعاسى مەن مۇشەلەرى تاراپىنان قويىلعان قوسىمشا سۇراقتاردى بۇرىن-سوڭدى ەستىمەگەن بولۋى كەرەك، ماردىمدى جاۋاپتارى دايىن بولماي شىقتى. اقىرى سوڭىندا بايانداماشىلارعا قويىلعان سۇراقتارعا كوميسسيا مۇشەلەرىنىڭ ءبىرى ارالاستى. ماسەلەن، تۇركىستانداعى بالا ءولىمى بىلتىرعى جىلمەن سالىستىرعاندا بىرنەشە پايىزعا ارتقان. الايدا تۇركىستاندىق شەنەۋنىك ەسەبىندەگى ستاتيستيكا باسقا. بۇل پروبلەمانىڭ وزىندىك سەبەبى دە بار بولىپ شىقتى. وبلىستىق دەنساۋلىق ساقتاۋ باسقارماسى وكىلىنىڭ ايتۋىنشا، تۇركىستانداعى پەرزەنتحانا تەك جەرگىلىكتى ايەلدەرگە ەمەس، كورشىلەس جاتقان سوزاق، كەنتاۋ مەن وتىراردان كەلگەندەرگە دە قىزمەت كورسەتەدى ەكەن. ال ستاتيستيكا وسى ءۇش اۋدان، قالاداعى كورسەتكىش.
بۇل اقپاراتتى تىڭداعان كوميسسيا ءتوراعاسى مينيسترلىكتىڭ تالابىنا ساي ءار مەديسينا مەكەمەسىنىڭ ءوز تالاپتارى، ناقتىراعى قىزمەت كورسەتەتىن حالىق سانى بەكىتىلەتىنىن جانە بۇل ءولىم بولا بەرسىن دەگەن ءسوز ەمەستىگىن باسا ايتتى. بار ماسەلەنى دەنساۋلىق ساقتاۋ قىزمەتكەرلەرىنە ىسىرىپ قويعىسى كەلگەن بايانداماشى داۋرەن راحىم ۇلى ءولىمنىڭ الدىن الۋ بويىنشا بيلىك تاراپىنان اتقارىلىپ جاتقان جۇمىستاردىڭ ءوزىن ايتىپ بەرە المادى. «بالا ءولىمىنىڭ نەگىزگى سەبەبى انا دەنساۋلىعىنىڭ ناشار بولۋىنان ەكەن. ءبىراق، بىزدە وتباسىنى، بالا ءسۇيۋدى جوسپارلاۋ دەگەن بولۋى كەرەك قوي. سوندىقتان دا اكىمدىك تاراپىنان ءدال وسى ماسەلەگە قاتىستى حالىققا ءتۇسىندىرۋ جۇمىستارىن ۇيىمداستىرىپ وتىرۋ قاجەت»، - دەدى ە.ايتاحانوۆ.
كوميسسيا وتىرىسىندا مۇنان سوڭ وتباسىلىق زورلىق-زومبىلىق، وتباسى قۇرۋدىڭ ماڭىزدىلىعى مەن بەرەكەنى ساقتاۋدىڭ جولدارى، بالا تاربيەسىندە اتا-انانىڭ جاۋاپتىلىعى تۋرالى ءسوز قوزعالدى. ال اتقارىلعان جۇمىستارعا كوميسسيا تومەن باعا بەردى. وتىرىس سوڭىندا اۋدان، قالا كوميسسيا ءتوراعالارىنا جۇمىستى جانداندىرۋ كەرەكتىگى، جەرگىلىكتى بيلىك بولسا، بارلىق جۇمىستى ۇيىمداستىرۋ قاجەت ەكەندىگى ايتىلدى. جىلدىڭ سوڭىندا ناتيجە بولماسا، ءبىرازى قىزمەتپەن قوش ايتىسۋى مۇمكىن.
ايتا كەتەيىك، وقو اكىمىنىڭ ورىنباسارى ەرلان ايتاحانوۆ ءوڭىر باسشىسى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسياسىنا ءتوراعا بولىپ تاعايىندالعانىنا ەكى اپتادان استى. بۇعان دەيىن بۇل قىزمەتتى ارىپتەسى ساكەن قانىبەكوۆ اتقارعان.
دەرەككوز: http://rgmedia.kz/
