استانادا گينەكولوگ كابينەتىن اشىپ، ايەلدەردى قابىلداپ كەلگەن الاياق اشكەرەلەندى. بۇل تۋرالى «قامشى» پورتالى «ەكسپرەسس-ك» گازەتىنە سىلتەمە جاساپ حابارلايدى.
گازەت وقىرمانى بۇركەنشىك اتپەن ءوزى تاپ بولعان وقيعانى باستان-اياق رەداكسياعا جازىپ جىبەرگەن ەكەن. وقىرماننىڭ ايتۋىنشا، ول تۇراتىن كوپ قاباتتى ءۇيدىڭ استىنان جەكە گينەكولوگ كابينەتى اشىلعان. ءتىس ەمدەۋ ورتالىعىنىڭ جانىنان ورىن تەپكەن كابينەتكە كەلىنشەك قابىلداۋعا جازىلادى.
سىرت كەلبەتى كەلىسكەن ورتا جاستاعى ەركەك كەلىنشەكتى بىردەن قابىلدايدى. دارىگەر كابينەتىندە ارنايى گينەكولوگ ورىندىعىنىڭ بولماۋى ايەلدىڭ كوڭىلىنە كۇدىك ۇيالاتادى. سوندا دا كەلىنشەك كەرى شەگىنبەي گينەكولوگ قىزمەتىنە جۇگىنگەن. ونىڭ ۇستىنە دارىگەر كابينەتتى جاقىندا اشقانىن، ۋاقىتشا وسىندا جۇمىس ىستەيتىن بولعاندىقتان ارنايى ورىندىق اكەلىنبەگەنىن ايتىپ سەندىرگەن. ءسويتىپ، گينەكولوگ پاسيەنتىن ماسساجيست كۋشەتكاسىنا جاتقىزىپ قويىپ، «جۇمىس ۋچاسكەسىن» زەردەلەۋگە كىرىسكەن. كەلىنشەك ءوزىن قاراپ جاتقان دارىگەردىڭ ءجۇزى بال-بۇل جانعانىنا تاڭدانىپ وتىرعاندا، ونىڭ تەك ءبىر قولىنا عانا مەديسينالىق قولعاپ كيگەنى كۇدىگىن ودان سايىن قويۋلاتا تۇسكەن.
«ادەتتە گينەكولوگتار پاسيەنتتەرىنە سالقىن قاندى قاراپ، ءتىپتى، كەيدە دۇرسە قويا بەرەتىنى بولاتىن. ال، بۇل دارىگەر مۇلدەم ولاي جاسامادى. كوزدەرى وتتاي جانىپ، ەرنىن جالاپ قويادى. بىرنەشە رەت ءتانىمدى سيپالاپ تا الدى» دەيدى جالعان گينەكولوگتىڭ قابىلداۋىندا بولعان پاسيەنت.
قابىلداۋدان شىعا سالا كەلىنشەك بولعان جايدى بىردەن قۇربىسىنا ايتادى. قۇربىسى وعان بۇل ماسەلەنى ودان ءارى زەرتتەۋگە كەڭەس بەرگەن. اراعا ءبىر اپتا سالىپ كەلىنشەك دارىگەر قابىلداۋىنا تاعى كەلەدى. كەلە سالىپ ودان مەديسينالىق ديپلومىن سۇراعان. باسىندا شوشىڭقىراپ قالعان ول كوپ سوزباي رامكاعا سالىنعان ديپلوم كوشىرمەسىن كورسەتىپتى. ءسال كەيىنىرەك، كەلىنشەكتى كۋشەتكاقاعا جاتقىزىپ قويىپ «قاراپ» جاتقان كەزدە دارىگەردىڭ قالتا تەلەفونىنا قوڭىراۋ شالىنىپ، ول سويلەسۋ ءۇشىن سىرتقا شىعادى. سول ءساتتى پايدالانىپ، كەلىنشەك ديپلوم كوشىرمەسىن سۋرەتكە ءتۇسىرىپ الادى.
كەيىن ديپلومدا جازىلعان مالىمەتتەردى انىقتاعاندا ول وقۋ ورنى ەشقانداي دا مەديسينالىق ءبىلىم بەرۋ مەكەمەسى ەمەس ەكەنى، ال دارىگەردىڭ گينەكولوگ ەمەس، تاريحشى ەكەنى بەلگىلى بولادى.
ءوزىنىڭ الدانىپ قالعانىنا اشۋلانعان كەلىنشەك جالعان ديپلوم يەسىنە تەلەفون شالادى. ول بولسا كەلىنشەكتىڭ ۇيىنە ارنايى كەلىپ، ورەسكەل قىلىعى ءۇشىن كەشىرىم سۇراعان. ءتپتى، قىزمەتى ءۇشىن العان بارلىق اقشاسىن قايتارىپ بەرگەن. ايتۋىنشا، لايىقتى جۇمىس تابا الماعان سوڭ، وتباسىن اسىراۋدىڭ قامىمەن وسىنداي ارەكەتكە بارعان.
كەلەسى كۇنى الگى كابينەت جابىلىپ قالعان. ءبىر قىزىعى، وڭباي الدانعان كەلىنشەك ءوزىن تەكسەرگەن جالعان گينەكولوگتى كەشىرگەنىن، ەشقايدا شاعىمدانباعانىن ايتقان...
