ءتۇسىرىلىمى باستالماي جاتىپ داقپىرتى جەر جارعان ايگىلى «قازاق ەلى» تەلەحيكاياسى بيىل كورەرمەندەرگە ۇسىنىلمايتىن بولدى. تاۋەلسىزدىك كۇنى قارساڭىندا ەفيرگە شىعادى دەگەن جوبانىڭ ءالى اۋى مەن باۋى بار سياقتى. رەسپۋبليكالىق اقپارات قۇرالدارى وكىلدەرىن جيناپ، ءتۇسىرىلىم جۇمىستارىمەن تانىستىرامىز دەگەن ۇيىمداستىرۋشىلاردىڭ يگى نيەتىنە قۋانعانىشىمىز سولاردىڭ ءوز اۋزىنان وسى جايتتەردى ەستىگەن سوڭ سۋ سەپكەندەي باسىلدى.

ءاۋ باستا جيىرما سەريالى فيلم بولادى دەلىنگەن تۋىندى ءتۇرلى سەبەپتەرمەن ون سەرياعا دەيىن قىسقاردى. سايكەسىنشە، سەناريي دە ايتارلىقتاي وزگەرىسكە ءتۇسىپ، ءتۇسىرىلىم كەش باستالدى. سونىڭ بارلىعى جينالىپ كەلىپ سەريالدىڭ ەكرانعا شىعۋ ۋاقىتىن دا كەشىكتىرىپ وتىر. بۇگىنگە دەيىن ءتۇسىرۋ جۇمىستارىنىڭ تەك 40 پايىزى اياقتالعان. الماتى وبلىسىنىڭ شوشاناي اۋىلى ماڭىندا ءوتىپ جاتقان ءتۇسىرۋ جۇمىستارىنا نەگىزگىسى بار، قوسالقىسى بار 300-گە تارتا اكتەر جۇمىلدىرىلعان.

فيلم ءتۇسىرىلىمى 4 اي بۇرىن باستالعان بولاتىن. سەريالدا حاندىقتى نەگىزىن قالاعان باس كەيىپكەرلەردىڭ قاتارىندا اسان قايعى مەن قازتۋعان جىراۋ دا بار. «ىشكى سارايدىڭ ينتريگاسىنا بۇل كىسى قاتىسقان. وسى قازاق حاندىعىنىڭ قالىپتاسۋىندا، نوعاي-قازاقتىڭ ىدىراۋىندا وزىندىك ءبىر ءرولى بولعان، سول كەزدەگى كوشباسشى، كوسەمدەردىڭ ءبىرى بولعان ادام. وتە ءبىر جاقسى ءرول دەپ ويلايمىن. وسى ءرولدىڭ ماعان بۇيىرعانىنا مەن وتە قۋانىشتىمىن»، – دەيدى قازتۋعان جىراۋ ءرولىن سومداۋشى بەكبولات تىلەۋحان.

«جەلتوقساننىڭ ورتا بەلىندە بۇكىل ماتەريالدى ءتۇسىرىپ بىتەمىز دەگەن ويدامىز. الدىن الا ءبارىن ايتا المايمىن. وتە كۇردەلى جوبا. حالىقتىڭ الدىندا، ەلدىڭ الدىندا ماسقارا بولماي، كادىمگى دۇرىس دەڭگەيدە، اۋىز تولتىرىپ ايتاتىنداي قىپ جاساعىمىز كەپ وتىر»، – دەيدى «قازاق ەلى» ءفيلمىنىڭ رەجيسسەرى رۇستەم ابدىراشيەۆ. سەناريي بويىنشا 10 سەريالى فيلم كەرەي مەن جانىبەكتىڭ ءابىلقايىر حاننان بولىنۋىنەن باستالىپ، جانىبەكتىڭ تاققا وتىرۋىمەن بىتەدى. ءارى قاراي جالعاستىرۋ ءۇشىن ءۇشىن دەمەۋشى قاجەت. تۇسىرۋشىلەر فيلمگە دەپ بولىنگەن ءبىر ميلليارد تەڭگەنىڭ وسى ون سەرياعا عانا جەتەتىنىن ايتادى.

دارحان مۇقان