قر-ى پارلامەنت ءماجىلىسىنىڭ دەپۋتاتى، اۋعان سوعىسى ارداگەرلەرىنىڭ «قازاقستان ارداگەرلەرى» قاۋىمداستىعىنىڭ ءتوراعاسى، اقىن باقىتبەك سماعۇل وسىنداي ۇسىنىس ايتتى. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى.

الماتىداعى ب.مومىش ۇلى اتىنداعى رەسپۋبليكالىق اسكەري مەكتەپ-ينتەرناتتا باتىر ەسكەرتكىش-مۇسىنىنىڭ اشىلۋ سالتاناتىنا كەلگەن دەپۋتات اباي داڭعىلىنىڭ باۋىرجان مومىش ۇلى كوشەسىمەن قيىلىسقان تۇسىندا اشىلعالى جاتقان جاڭا مەترو ستانساسىنا كەڭەس وداعىنىڭ باتىرى، مايدانگەر جازۋشى باۋىرجان مومىش ۇلىنىڭ ەسىمىن بەرۋدى ۇسىندى.

ونىڭ ايتۋىنشا، بۇل ۇسىنىس ەگەر وڭ شەشىمىن تابار بولسا، ۇلى جەڭىستىڭ 70 جىلدىعىنا وراي، باۋىرجان مومىش ۇلىنىڭ عانا ەمەس، سول سۇراپىل سوعىستا قان توككەن بارشا جاۋىنگەر اتا-بابالارىمىزدىڭ رۋحىنا جاسالعان زور قۇرمەت بولار ەدى.

«بۇل قادام سىرت كوزگە سەس، ال ۇرپاعىمىزعا ەس بولار ەدى. كەزىندە، 2010 جىلى حاليلا وماروۆ ەكەۋمىز «قازاقتىڭ باۋىرجانى» دەگەن دەرەكتى ءفيلمدى ءتۇسىرۋ ءۇشىن ماسكەۋگە بارعان كەزىمىزدە ۆولوكولامسك قالاسىنىڭ اكىمى ۆاسيليي شۋلەپوۆ: «ۇلى وتان سوعىسىندا ميلليونداعان جاۋىنگەر سوعىستى. ءبىراق، قازاق حالقىنىڭ قايسار رۋحتى ۇلدارىنىڭ ارقاسىندا فاشيستەر ماسكەۋدى باسىپ الا المادى»، - دەگەن بولاتىن. ماسكەۋدە «الماتى» مەترو بەكەتى بار، ال، الماتىداعى جاڭا مەترو بەكەتتەرىنىڭ ءبىرى «ماسكەۋ» دەپ اتالدى. بۇل، ەكى ەل اراسىنداعى دوستىقتىڭ التىن كوپىرى ىسپەتتەس. سوندىقتان، دوستىقتىڭ شەكاراسىندا شەك بولماسىن، ارادا وتكەن وقيعالاردان كەك بولماسىن، ۇرپاق ساباقتاستىعى جالعاسسىن دەسەك، جاڭادان سالىنىپ جاتقان مەترو بەكەتىنە باۋىرجان مومىش ۇلىنىڭ ەسىمىن بەرگەن ءجون. بۇل ۇسىنىستى الماتى قالاسىنىڭ اكىمدىگى قۇپ كورەدى دەگەن ۇمىتتەمىن»، - دەدى ب. سماعۇل.