الماتىنىڭ ءبىر توپ تۇرعىنى قالاداعى ترامۆاي دەپوسىن جاپپاۋدى سۇراپ پرەزيدەنت اتىنا جازىلعان پەتيسياعا قول جيناۋدى باستادى. بۇل تۋرالى «قامشى» پورتالى حابارلايدى.
پەتيسيا اۆتورلارىنىڭ ويىنشا، قىركۇيەك، قازان ايلارىندا بولعان ترامۆاي اپاتتارى دەپونى جابۋ ماقساتىمەن ارنايى ۇيىمداستىرىلۋى مۇمكىن. بۇرىن ەشقايدا قاعىلماي-سوعىلماي جۇرگەن كولىكتەردىڭ از مەرزىم ىشىندە ەكى رەت ءىرى اپاتقا ۇشىراۋى ولاردىڭ كۇدىگىن تۋعىزعان.
«ترامۆاي كولىگىن توقتاتۋ ءۇشىن اقپاراتتىق سەبەپ كەرەك بولدى جانە ول سەبەپتى وسىلاي قولدان جاسادى» دەلىنگەن پەتيسيادا.
سونداي-اق، قۇجاتقا قول قويعاندار جەرگىلىكتى باسشىلىقتىڭ ترامۆاي جولاۋشىلار تاسىمالداۋ جۇكتەمەسىن شەشپەيدى، جول قوزعالىسىنا كەدەرگى كەلتىرەدى دەگەن ۋاجىمەن كەلىسپەيدى جانە الماتىداعى اۋىر ەكولوگيالىق جاعدايدا وتە قاجەتتى كولىك دەپ سانايدى.
4 كۇن ۋاقىت ىشىندە پەتيسياعا جۇزدەن استام ادام قول قويعان.
ەستەرىڭىزگە سالساق، 31 قازاننان بەرى الماتىداعى ترامۆاي دەپوسى ۋاقىتشا جوندەۋگە جابىلعان بولاتىن. تۇرعىندار اراسىندا دەپو تەرريتورياسى ساتىلعالى جاتىر دەگەن دە سىبىس تاراپ ۇلگەردى.
