قانات يسلام تۋعان قىتايدىڭ التاي ايماعى قابا اۋدانىنان تاعى ءبىر قازاق باتىرى شىقتى. ول بىردەن كاسىپقوي بوكستا باعىن سىناپ، فيليپپين، تايلاند، جۇڭگو ەلدەرىنىڭ ساڭلاقتارىن سان سوقتىرىپ، ميلياردتاردىڭ نازارىن وزىنە اۋدارا باستادى. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى.

بۇل قازاق باتىرىنىڭ ەسىمى بەيسەنبى ءناسيوللا ۇلى. 1994 جىلى قابا اۋدانىندا دۇنيەگە كەلگەن، دەپ حابارلادى قازاقپارات ءتىلشىسى.

ول بيىل قىتايدىڭ ىشكى قالالارىندا ۇيىمداستىرىلعان ازيالىق كاسىپقوي جارىستارعا بەس رەت قاتىسىپ، بارلىعىندا جەڭىسكە قول جەتكىزدى. ونىڭ بىرەۋىندە عانا (6 راۋند) ۇپاي سانىمەن باسىم تۇسسە، قالعان تورتەۋىندە جارىستى مەرزىمىنەن بۇرىن اياقتاعان.

بەيسەنبى سوڭعى جەكپە-جەگىن وسىدان 5 كۇن بۇرىن، ياعني قاراشانىڭ 4 كۇنى وتكىزدى. تۇڭعىش رەت 8 راۋندتىق باسەكەدە قارسىلاسىن 1 مينۋت 20 سەكۋندتا سۇلاتىپ تاستادى.

بەيسەنبى ءقازىر قىتايدىڭ ىشكى قالالارىنىڭ بىرىندەگى «جوڭ-ۆەي» كومپانياسىمەن كەلىسىمشارتقا وتىرىپ، ليابىڭ دۇڭ ەسىمدى فيليپپيندىك باپكەردىڭ قول استىندا جاتتىعىپ، شەبەرلىگىن شىڭداپ ءجۇر. سالماعى - 147،4 فۋنت (66،8 كەلى)،  بويى 180 سانتيمەتر. ءقازىر ول جالپى رەيتينگتە وسى سالماق دارەجەسىندە دۇنيەجۇزى بويىنشا 467 ورىندا بولسا، جۇڭگو ەلى بويىنشا 2 ورىندا تۇر.

ءبىز اتا-جۇرتىنان الىستا جۇرسە دە، الاشتىڭ ابىرويىن اسىرىپ جۇرگەن قانداسىمىزعا تەك ساتتىلىك جولداس بولسىن دەيمىز. وسى قارقىنىنان تايماي، الەمدىك دودالاردا اسىعى الشىسىنان تۇسە بەرۋىنە تىلەكتەسپىز.