قازاقستان پرەمەر-مينيسترىنىڭ ورىنباسارى داريعا نازاربايەۆا وتاندىق دەنساۋلىق ساقتاۋ جۇيەسىنىڭ كەمشىلىكتەرى جايلى پىكىرىن ايتتى، - دەپ حابارلايدى «قامشى» پورتالى Tengrinews.kz-كە سىلتەمە جاساپ.

استانا اكىمدىگىندە د. نازاربايەۆا دەنساۋلىق ساقتاۋ جۇيەسىندەگى جۇمىسشىلارمەن كەزدەستى. سونىمەن قاتار، كەزدەسۋ بارىسىندا ق ر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا مەملەكەتتىك "سالاماتتى قازاقستان" دەنساۋلىق ساقتاۋ باعدارلاماسىنىڭ دامۋىنىڭ قورىتىندىسى جانە 2016-2019 جىلدارعا ارنالعان جاڭا "دەنساۋلىق" مەملەكەتتىك باعدارلاماسى جوباسى جايلى ايتىپ بەردى.  

"دەنساۋلىق ساقتاۋ جۇيەسىندە كەمشىلىكتەردىڭ بار ەكەنىن، ارينە، بىلەمىز. ءبىز مۇنى پارلامەنتتە دە ايتتىق جانە بۇگىن وسى تاقىرىپتى كەڭىنەن تالقىلاۋعا مۇمكىندىگىمىز باردا پروبلەمالاردىڭ قالىپ وتىرعانىن جانە ءوز شەشىمىن تالاپ ەتەتىنىن كورىپ وتىرمىز. ارينە، دەنساۋلىق ساقتاۋ سياقتى ۇلكەن سالادا قانداي دا ءبىر شۇعىل وزگەرىستەر مەن جۇماقتاعىداي ءومىر كەلە سالمايدى. بۇل ءاردايىم ءجۇرىپ وتىراتىن پروسەسس. وعان ادامي رەسۋرسى كوپ قاجەت، قارجىلاي دا، باسقا دا تالاپتار قاجەت ەتىلەدى. سوندىقتان، ارينە، ءبارىمىز شىدامدى بولۋىمىز كەرەك. ءبىز بۇگىن حالىقتىڭ كورىپ وتىرعان مەديسينالىق جاردەمگە قاتىستى شاعىمى جايلى، مەديسينالىق كومەكتىڭ قولجەتىمدىلىگىنىڭ دەڭگەيىن ايتىپ وتىرمىز. جالپى العاندا كوڭىل تولماۋشىلىق جانە قاناعاتتانباعاندىق جوعارى دەڭگەيدە بايقالىپ وتىر. ەكى تاراپتىڭ دا كوڭىلى تولمايدى. دارىگەرلەردىڭ دە، ازاماتتاردىڭ دا كوڭىلى تولمايدى"، - دەدى داريعا نازاربايەۆا. 

قازاقستان پرەمەر-مينيسترىنىڭ ورىنباسارىنىڭ ايتۋىنشا، ەلىمىزدە مەديسينالىق كومەكتى شەتەلدەن العىسى كەلەتىندەردىڭ قاتارى كوبەيگەن. "قارجىلاندىرۋ الادى، كەزەكتە تۇرادى، بارلىق جولدى پايدالانادى. ال شەتەلدىك كوپتەگەن ماماندار دارىگەرلەرىمىزدىڭ دايىندىعىنىڭ دەڭگەيى جاقسى دەيدى، ونىڭ ۇستىنە وپەراسيا جاساتۋ ءۇشىن ادامداردى سىرت ەلدەرگە بەكەر جىبەرەتىنىمىزدى ايتادى، ولار سول وپەراسيانى وزىمىزدە دە جاساۋعا بولاتىنىن ايتتى. دەسەك تە، كەمشىلىكتەر جويىلماي وتىر. مۇندا ماسەلە مەديسينالىق جۇمىسشىلاردىڭ تومەن قۇزىرى جايلى، وسى سالاداعى مامانداردى دايىنداۋدىڭ تومەن دەڭگەيدە ەكەنى جايلى. مۇنى ءبارىمىز جاقسى بىلەمىز"، - دەدى نازاربايەۆا.

پرەمەر-مينيستردىڭ ورىنباسارى دەنساۋلىق ساقتاۋ سالاسىنا سوڭعى جىلدارى قۇيىلىپ جاتقان قاراجاتتىڭ كوبەيگەنىن ايتتى. "بۇل ارقىلى جاڭا اۋرۋحانالار سالدىق، جاڭا ەمحانالار اشتىق، ەڭ جاڭا مەديسينالىق جابدىقتاردى ساتىپ الدىق، ءبىراق پروبلەمالار وتە كوپ. مەديسينالىق مەكەمەلەردىڭ ايتارلىقتاي بولىگى اپاتتىق جاعدايدا تۇر، ەسكى. (...) سوندىقتان بۇل ماسەلە دەرەۋ ارادا شەشىلۋى ءتيىس. جانە مۇنىڭ بارلىعى دا قاۋىرت جاعدايدا بولىپ وتىر. شيكىزاتقا دەگەن حالىقارالىق ەكونوميكالىق كونيۋنكتۋرانىڭ قانداي بولىپ وتىرعانىن ءبىلىپ وتىرمىز، سايكەسىنشە، مەملەكەتتىك بيۋدجەتىمىزدىڭ تابىسى ازايىپ وتىر. ءبارىمىز دە شىعىندارىمىزدى قاتاڭ تۇردە ۇنەمدەۋ فازاسىنا ءوتىپ جاتىرمىز. ءبىراق مەملەكەت باسشىسى الەۋمەتتىك سالا - دەنساۋلىق ساقتاۋ، الەۋمەتتىك قورعانىس جانە ءبىلىم بەرۋ دەگەن سياقتى سالالاردا بيۋدجەت قىسقارتۋىنىڭ بولماۋى كەرەكتىگىن ايتتى. ارمەن قاراي دامي بەرگەنى جانە قىزمەتتىڭ جاقسارعانى كەرەك. بۇل وسىنداي باستى پوستۋلات"، - دەدى داريعا نازاربايەۆا.