اتىراۋ وبلىستىق ءماسليحاتىنىڭ دەپۋتاتتارى ايماقتاعى ۇدەمەلى يندۋستريالىق-يننوۆاسيالىق دامۋ باعدارلاماسى اياسىندا وبلىستىق بيۋدجەت ەسەبىنەن قارجىلاندىرىلىپ، جۇزەگە اسىپ جاتقان جوبالاردى ارالاپ كوردى.
اتىراۋ وبلىسىندا يندۋستريالاندىرۋ كارتاسى شەڭبەرىندە جالپى قۇنى 1،6 تريلليون تەڭگەنى قۇرايتىن 44 ينۆەستيسيالىق جوبا ىسكە اسىرىلۋدا. ايماق ءۇشىن عانا ەمەس، تۇتاس ەلىمىز ءۇشىن ماڭىزدى جوبالاردىڭ قازىرگىدەي نارىق قىسپاعىندا جۇزەگە اسۋى ۇتىمدى ۇيىمداستىرۋ جۇمىستارى مەن ناقتى شەشىمدەردى تالاپ ەتىپ وتىر. وسى تۇرعىدا وبلىستىڭ دەپۋتاتتارى وزەكتى پروبلەمانىڭ الدىن الۋدا وڭىردەگى جاڭا جوبالاردىڭ باعىتى مەن باعدارىن، كەلەشەگىن پايىمداۋ ءۇشىن ءوندىرىس ورىندارىن ارالاپ كورىپ، كاسىپكەرلەرمەن اشىق ديالوگتا بولدى. 
ايماق دەپۋتاتتارى جاڭا جوبالاردىڭ بۇگىنگى تىنىسىمەن تانىسۋدى الدىمەن ءوڭىر حالقىن قۇس ەتى مەن جۇمىرتقاسىمەن قامتىپ وتىرعان «المالى قۇستىڭ» فابريكاسىنان باستادى.
«المالىقۇس» فابريكاسى ءوڭىردىڭ قۇس ونىمدەرىنە دەگەن سۇرانىسىن تولىق قاناعاتتاندىرۋعا مۇمكىندىك بەرۋدە. قۇس فابريكاسى تولىق قۋاتىنا كوشكەندە جىلىنا 30 ميلليون جۇمىرتقا وندىرەدى. حالىق قالاۋلىلارى اتالعان نىساندا بولىپ، سەحتاردىڭ جۇمىسىمەن تانىستى.
قۇس فابريكاسىندا رەسەيدىڭ سۆەردلوۆسك وبلىسىنان اكەلىنگەن گەرمانيالىق «حايسەكس ۋايت» تۇقىمدى التى مىڭنان استام بالاپان ارنايى كۇتىمگە الىنعانىنا جەتپىس كۇندەي ۋاقىت بولعان. ەندى فابريكا ماماندارى ولاردىڭ توقسان كۇننەن كەيىن العاشقى ءونىمىن الۋعا دايىندالۋدا.
فابريكا ديرەكتورى ۆيكتور پاستىڭ سوزىنە سۇيەنسەك، قازىرگى تاڭدا مۇندا توقسانعا جۋىق ادام قىزمەت ەتۋدە. ال ولاردىڭ ورتاشا ەڭبەك جالاقىسى 55000-60000 تەڭگەنى قۇرايدى. فابريكادا 175 مىڭداي قۇس بار. ماماندار قۇستاردان تاۋلىگىنە 90 مىڭ جۇمىرتقا الىپ وتىر. ماماندار  قۇس فابريكاسىنىڭ ءتورتىنشى سەحى قاراشا ايىندا ىسكە قوسىلعاندا بالاپاندار سانى 62 مىڭعا جەتەدى دەپ بولجاپ وتىر. سونىڭ ناتيجەسىندە، جاڭا جىل قارساڭىندا ءونىم كولەمىن ارتتىرىپ، تاۋلىگىنە 120 مىڭداي جۇمىرتقا ءوندىرىلىپ، تۇتىنۋشىعا جەتكىزىلەدى. 
 اتىراۋلىق قۇس فابريكاسى ءوڭىردىڭ جۇمىرتقاعا سۇرانىسىمەن بىرگە، كورشىلەس ماڭعىستاۋ وبلىسىن دا جۇمىرتقامەن قامتۋدى ءبىر جۇيەگە قويعان. ماڭعىستاۋدىڭ ساۋدا نۇكتەلەرىنە كەم دەگەندە سۇرانىس بويىنشا 840 قوراپ جۇمىرتقا جىبەرىلەدى. ايتارلىعى، دەمالىس كۇندەرى قۇس فابريكاسى ءوز ونىمدەرىن جارمەڭكەلەرگە شىعارىپ، 13 تەڭگەدەن ساتىپ وتىر. جوعارعى سۇرىپتى جۇمىرتقانىڭ سالماعى 80-90 گرامنان اسادى. ال ورتا سۇرىپ – 65-75 گرامم.
 وبلىس دەپۋتاتتارى قۇس فابريكاسىن ارالاپ كورۋدە ونىمدەردىڭ ساپالىعىنا، قولجەتىمدى باعامەن ساتىلۋىنا ريزا بولىپ، فابريكا ۇجىمىنا نارىقتىڭ قىسپاعىنا توتەپ بەرىپ، ايماقتى قۇس ەتى مەن جۇمىرتقامەن قامتۋدا تابىسقا جەتۋلەرىنە تىلەك ءبىلدىردى. 
 اتىراۋدا ەت باعىتىنداعى «برويلەر» تۇقىمدى تاۋىق وسىرەتىن قۇس فابريكاسى جوباسىنىڭ جالپى قۇنى ءۇش ميلليارد جەتى ءجۇز ميلليون تەڭگەنى قۇرايدى. ونىڭ 1 ميلليارد 746 ميلليون تەڭگەسى، ياعني 49 پايىزى جەرگىلىكتى بيۋدجەتتەن «اتىراۋ» الەۋمەتتىك كورپوراسياسى ارقىلى قارجى قارالىپ، سونىڭ 85 پايىزى يگەرىلۋدە. قازىرگى تاڭدا جىلىنا 2600 توننا قۇس ەتىن وندىرەتىن «مەكەن-Chicken» برويلەر قۇس فابريكاسىنىڭ قۇرىلىسى ءجۇرىپ جاتىر. 
 «اتىراۋ» الەۋمەتتىك-كاسىپكەرلىك كور­پوراسيا» ۇلتتىق كومپانياسى» اق باسقار­ما­سىنىڭ ءتوراعاسى ابات تاسىموۆتىڭ ايتۋىنشا، ارىپتەستەر ءوز ەسەبىنەن 350 ميلليون تەڭگەدەي قارجى ءبولىپ، قالعان قاراجاتتى ەكىنشى دەڭگەيلى بانك «سەسنابانك» اق-تان ماقساتتى نەسيە الۋ ارقىلى قاراستىرىلۋدا. ەندى بۇل ماسەلە شەشىلسە، قارجىلاندىرۋ باستالىپ، جۇمىستى باستاۋعا مۇمكىندىك بولادى. 
بۇل – وبلىستا ازىق-تۇلىك قاۋىپسىزدىگىن قامتاماسىز ەتۋ باعىتىنداعى ماڭىزدى جوبا. ونىڭ نارىقتاعى قيىندىققا قاراماستان جۇزەگە اسۋى وبلىستىق ءماسليحات دەپۋتاتتارىن تولعاندىرۋىندا دا وزىندىك سەبەپتەر بار. 
وبلىستىق ءماسليحاتتىڭ دەپۋتاتتىق كورپۋسى اتىراۋدا قۇرىلىسى ءجۇرىپ جاتقان «لۋمپان كاسپيان فارماسيۋتيكالس» ج ش س فارماسيەۆتيكالىق ءونىم شىعاراتىن زاۋىتتا دا بولدى.
 زاۋىتتىڭ قۇرىلىسى «مەديسينا» اق، «SAVA Healthcare» كومپانياسى، «اتىراۋ» اكك» ۇك» اق، «Lifeline Fze» كومپانياسى، «ALIM COM» ج ش س قاتىسۋىمەن جۇرۋدە. جوبا قۇنى 3 ميلليارد 700 مىڭ تەڭگەنى قۇرايدى. فارماسيەۆتيكالىق زاۋىت تولىق قۋاتىنا شىعىپ، پايدالانۋعا بەرىلگەندە، جىلىنا 800 ميلليون دانا ءدارى، 300 ميلليون دانا كاپسۋلا، 78 ميلليون دانا امپۋلا مەن 3 ميلليون بۋما جاقپا ماي، 12 ميلليون قۇتى ەرىتىندى دايىنداپ شىعارادى.
حالىق قالاۋلىلارى بۇدان باسقا تۇرعىن ءۇي كومبيناتى، كوكونىستەردى كونسەرۆىلەۋ، شۇجىق ونىمدەرىن شىعاراتىن سەح، مال ءجۇنىن باستاپقى وڭدەۋدەن وتكىزۋگە ارنالعان زاماناۋي ۇلگىدەگى جاڭا كەشەن جانە باسقا دا جاڭا جوبالاردىڭ جۇزەگە اسىرىلۋ بارىسىمەن تانىسىپ، ولاردىڭ كوكەيكەستى ماسەلەلەرىنە نازار اۋدارىپ، ورىن العان پروبلەمالار بولسا شەشۋ جولدارىنا ىقپال ەتەتىندىكتەرىن ايتتى.
وڭىردەگى جوبالاردىڭ اياق الىسىمەن، قۇرىلىسىنىڭ ءجۇرۋ بارىسىمەن تانىسىپ شىققان وبلىستىق ءماسليحات دەپۋتاتتارى اتىراۋ ايماعىنداعى ىرگەلى جوبالاردىڭ مۇنايلى وڭىردە ىسكە اسۋىنا ەلباسىمىز ايرىقشا جاعداي جاساپ وتىرعانىن ايتتى. بۇل جوبالاردىڭ قازىرگى نارىق قىسپاعىنا قاراماي، ءوز قۋاتتى كۇشىمەن تولىق پايدالانۋعا بەرىلۋىنە وبلىس اكىمى باقتىقوجا ىزمۇحامبەتوۆ تە ەرەكشە نازار اۋدارىپ وتىر. 

دەرەككوز: ايقىن-اقپارات