جامبىل وبلىسىنىڭ قورداي اۋدانىندا "ۇلتارالىق الاۋىزدىق تۋدىردى" دەپ ايىپتالعان بلوگەر ەرمەك تايشىبەكوۆتىڭ سوتىندا كۋاگەرلەردەن جاۋاپ الۋ جالعاستى. بۇل تۋرالى «قامشى» پورتالى ازاتتىققا سىلتەمە جاساپ حابارلايدى.

ۇلتتىق قاۋىپسىزدىك كوميتەتى (ۇقك) قىزمەتكەرى وزىنەن جاۋاپ الۋ كەزەگى كەلگەندە ە. تايشىبەكوۆتىڭ باۋىرىن، جۋرناليستەر مەن سوتقا قاتىسىپ وتىرعان باسقا دا ادامداردى سوت زالىنان شىعارۋدى سۇرادى. بۇل جايلى ازاتتىققا سوتقا قاتىسىپ جاتقان ادام قۇقىعى جونىندەگى قازاقستاندىق بيۋرو وكىلى اندرەي سۆيريدوۆ حابارلادى.

- سۋديا ۇقك قىزمەتكەرىنىڭ ءوتىنىشىن ماقۇلداپ، ودان جابىق تۇردە جاۋاپ الدى. جاۋاپ الۋعا پروسەسكە تىكە قاتىسۋشىلار عانا، ياعني ە. تايشىبەكوۆ، ونىڭ ادۆوكاتى مەن پروكۋرور قاتىستى. قالعان ادامداردى سوتتان شىعارىپ جىبەردى، - دەدى سۆيريدوۆ.

سوتتا ە. تايشىبەكوۆتىڭ الەۋمەتتىك جەلىلەردەگى جازبالارىن "ۇلتارالىق الاۋىزدىقتى قوزدىرۋ بەلگىلەرى بار" دەپ تاپقان سوت ساراپشىلارىنان جاۋاپ الۋ دا جوسپارلانعان ەدى. ءبىراق، سوت ساراپشىلارى سوتقا كەلمەدى. سۋديا قايرات بەلگىشيەۆ ساراپشىلار 17 قاراشاعا بەلگىلەنگەن كەلەسى سوت وتىرىسىندا جاۋاپ بەرەتىنىن ايتتى.

قورداي اۋدانىنىڭ 37 جاستاعى تۇرعىنى ەرمەك تايشىبەكوۆ Facebook جانە «ۆكونتاكتە» الەۋمەتتىك جەلىلەرىندە رەسەيشىل باعىتتاعى، قازاقستان مەن رەسەيدىڭ ساياسي قارىم-قاتىناسىن تەرەڭدەتۋگە ۇندەگەن سارىنداعى پىكىرلەرىمەن تانىلعان. وعان قارسى ءىس 30 ماۋسىمدا قوزعالعان. 

ە. تايشىبەكوۆ تامىز-قىركۇيەك ايلارىندا الماتىداعى پسيحياتريا، پسيحوتەراپيا جانە ناركولوگيا عىلىمي-پراكتيكالىق ورتالىعىنا جاتىپ شىققان ەدى. ورتالىق زەرتتەۋلەرى ە. تايشىبەكوۆ دەنساۋلىعىندا ەشقانداي پسيحيكالىق كەمىستىكتەر جوقتىعىن انىقتادى.