قازاق مەملەكەتتىك قىزدار پەداگوگيكالىق ۋنيۆەرسيتەتى قازاق فيلولوگياسى جانە الەم تىلدەرى فاكۋلتەتىنىڭ ۇيىمداستىرۋىمەن «ماڭگىلىك ەلدىڭ ماڭگىلىك ءتىلى» اتتى دوڭگەلەك ۇستەل ءوتتى.
ءتىلدى قورعاۋ، ءتىلدىڭ قولدانۋ اياسىن كەڭەيتۋ، مەملەكەتتىك ءتىلدىڭ مارتەبەسى مەن ماڭىزىن كەڭىنەن ناسيحاتتاۋ، جاستاردىڭ بويىندا پاتريوتتىق سەزىمدى وياتۋ ماقساتىندا وتكەن باسقوسۋعا انا ءتىلىمىزدىڭ بىردەن-بىر جاناشىرى، ۇلتتىق رۋح جارشىسى بولىپ تابىلاتىن «انا ءتىلى» گازەتىنىڭ ۇجىمى قاتىستى. دوڭگەلەك ۇستەلدى قازاق فيلولوگياسى جانە الەم تىلدەرى فاكۋلتەتىنىڭ دەكانى، فيلولوگيا عىلىمدارىنىڭ دوكتورى التىناي تىمبولوۆا جۇرگىزىپ وتىردى.
جيىن بارىسىندا «انا ءتىلى» گازەتى رەداكسياسىنان كەلگەن وكىلدەر مەن قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ قازاق ءتىل ءبىلىمى كافەدراسىنىڭ عالىمدارى مەن ستۋدەنتتەرى قوعامداعى ءتىل ماسەلەسىنە قاتىستى وزەكتى پروبلەمالار جايىندا، ۇلتتىق بولمىسىمىز، ۇلتتىق سانا-سەزىم تۋرالى، «انا ءتىلى» گازەتىنىڭ بەتىندە جارىق كورگەن ءتىل مەن دىلگە قوسا – مادەنيەت، ادەبيەت، رۋحانيات ماسەلەلەرى جايىندا وي ءوربىتىپ، پىكىرلەرىن ورتاعا سالدى.
– كەشەگى ا.بايتۇرسىنوۆ، ءا.بوكەيحانوۆ، م.دۋلاتوۆ سىندى الاشتىڭ ارداقتىلارى ءتىل تۋرالى: «ءتىل – ۇلتتىڭ جانى، ءتىل بولماسا ۇلت تا، حالىق تا بولمايدى» دەگەندى كەزىندە ايتتى، – دەپ ءسوز باستاعان «انا ءتىلى» گازەتى رەداكتورىنىڭ ءبىرىنشى ورىنباسارى نۇرپەرزەنت دومباي، – بۇل ءسوزدىڭ استارىندا ۇلكەن وي جاتىر. قازىرگى تاڭداعى ءتىلدىڭ جاعدايى بارشاعا جاقسى بەلگىلى. كەڭەستىك داۋىرگە قاراعاندا، قازىرگى كەزدە ءتىلىمىزدى دامىتۋدا ىلگەرىلەۋ بار. وعان جىل سايىن قازاق مەكتەپتەرى مەن قازاق بالاباقشالار سانىنىڭ كوبەيۋى دالەل بولا الادى. قازاق تىلىندەگى گازەت-جۋرنالداردىڭ، باق-تىڭ دا تاۋەلسىزدىك العاننان كەيىن قالاي وسكەنىن بىلەسىزدەر. نەگىزى، ءتىلدىڭ ماڭگىلىك بولۋىنا دەگەن ۇمتىلىس، تىلگە دەگەن قۇشتارلىق بالاباقشادان، مەكتەپتەن باستالادى. سونداي-اق، ءتىلدى دامىتۋدا باق-تىڭ ورنى دا ەرەكشە. 1990 جىلى جارىق كورگەن «انا ءتىلى» گازەتى بيىل 25 جىلدىعىن اتاپ ءوتتى. گازەت حالىقتىڭ قالاۋىمەن، مەملەكەتىمىزدىڭ قولداۋىمەن اشىلعان بولاتىن. وندا ءار جىلدارى تانىمال تۇلعالار قىزمەت ەتتى. بۇگىندە باسىلىم قوعامدىق ءۇندى جەتكىزەتىن، ءتىل ماسەلەسىنە ەرەكشە ءمان بەرەتىن، مەملەكەتتىك ءتىل عانا ەمەس، ۇلتقا قاتىستى كەز كەلگەن كۇرمەۋلى ماسەلەلەردى كوتەرىپ كەلە جاتقان گازەت بولىپ وتىر، – دەدى.
ودان كەيىن ءسوز العان قازاق ءتىل ءبىلىمى كافەدراسىنىڭ مەڭگەرۋشىسى، فيلولوگيا عىلىمدارىنىڭ دوكتورى قالامقاس قالىبايەۆا ەلىمىز تاۋەلسىزدىك العان سوناۋ قيىن-قىستاۋ زاماننان بەرى «انا ءتىلى» گازەتىنىڭ تەك مەملەكەتتىك ءتىل عانا ەمەس، ۇلتقا قاتىستى كەز كەلگەن كۇرمەۋلى ماسەلەلەردى كوتەرىپ كەلە جاتقاندىعىن، قازاقتىڭ ءتىلى، قازاقتىڭ اۋىلى، قازاق مەكتەبى، بالاباقشاسى، قازاق جاستارى، قازاق عىلىمى، ت.ب. كوپتەگەن تاقىرىپتاردا جازىلعان ماقالالاردىڭ وقىرمان ويىنان شىعىپ جۇرگەنىن اتاپ ءوتتى.
جيىنعا ستۋدەنتتەر دە بەلسەنە قاتىسىپ، تىلگە بايلانىستى ءوز وي-پىكىرلەرىن ءبىلدىردى. قازاق فيلولوگياسى جانە الەم تىلدەرى فاكۋلتەتىنىڭ 2-3 كۋرس ستۋدەنتتەرى اعىمجان ەركىنبەكوۆا، ءمادينا بەگارىسوۆا، راۋشان بايجارىق قىزى، اقەركە باۋىرجان، اقتوتى ساپارالى، ايدانا يبرايىموۆا، التىناي قانىبەك گازەت بەتىندەگى ماقالالار توپتامالارىنا تالداۋلار جاساپ، وزىندىك پىكىرلەرىن ايتىپ، مەملەكەتتىك ءتىلدىڭ دامۋىن تەجەپ تۇرعان كەدەرگىلەر، ءۇش تۇعىرلى ءتىل جونىندە سۇراقتار قويىپ، ءتىلدى قورعاۋ، ءتىلدىڭ قولدانۋ اياسىن كەڭەيتۋ، مەملەكەتتىك ءتىلدىڭ مارتەبەسىن ارتتىرۋعا بايلانىستى ۇسىنىس-تىلەكتەرىن جەتكىزدى.

دەرەككوز: ەگەمەن قازاقستان