تاراز. 3 قاراشا. جامبىل وبلىسى بايزاق اۋدانىنداعى «اعالي» شارۋا قوجالىعى جاڭا ءسۇت وڭدەۋ سەحىن ىسكە قوستى. جەرگىلىكتى شارۋالاردان ءسۇت ساتىپ الىپ، ونى قايتا وڭدەپ، ايراننان باستاپ، قايماق، سۇزبە مەن وزگە دە ءسۇت ونىمدەرىن شىعارۋمەن اينالىساتىن سەح قوستوبە اۋىلدىق وكرۋگىندەگى تالاس اۋىلىنان اشىلدى. بۇل تۋرالى egemen.kz ءتىلشىسى حابارلادى.
جالپى قۇنى 40 ملن. تەڭگەگە باعالانعان سەح قارجىسىنىڭ 30 ملن. تەڭگەسى ەكىنشى دەڭگەيلى «ەۆرازيالىق بانكتەن» الىنسا، 10 ملن. تەڭگەسى ءوز قاراجاتى ەسەبىنەن. جاڭا وندىرىسپەن شۇعىلدانۋدى نيەت ەتكەن شارۋا قوجالىق جەتەكشىسى اۋداندى عانا ەمەس، وبلىس ءوڭىرىن دە ساپالى ءسۇت ونىمدەرىمەن قامتۋدى كوزدەپ وتىر.
جامبىل وبلىسى اكىمىنىڭ ورىنباسارى ابدالى نۇرالييەۆتىڭ ايتۋىنا قاراعاندا بۇگىنگى كۇنى وڭىردە اۋىل شارۋاشىلىق ونىمدەرىن قايتا وڭدەيتىن 200 كاسىپورىن جۇمىس ىستەيدى، وندا 2700 ادام جۇمىسپەن قامتىلعان.
«ءسۇت وڭدەۋ سەحىنىڭ اشىلۋىنان ءوڭىرىمىز ءۇشىن تەك يگىلىك كۇتەمىز. سەبەبى، ءسۇتتىڭ ءوزىن عانا ساتقاننان، ونى وڭدەپ ساتۋ قاي تاراپقا دا ءتيىمدى. بىرىنشىدەن، ءونىم ءتۇرى مولايادى، ەكىنشىدەن، حالىق سۇرانىسىن قامتاماسىز ەتەمىز، ەڭ باستىسى، جاڭا جۇمىس ورىندارى اشىلادى، اۋدان بيۋدجەتىنە تۇسەتىن سالىق تا بار»، – دەيدى ا.نۇرالييەۆ.
الداعى ۋاقىتتا سەحتىڭ قۋاتتىلىعىن ارتتىرۋمەن بىرگە، جۇمىس ورىندارىن دا كوپتەپ اشۋ جوسپارلانعان. بۇل ەكى قولعا ءبىر كۇرەك تابا الماي، جۇمىس ىزدەپ جۇرگەن اۋىل تۇرعىندارى ءۇشىن وتە قولايلى جوبا بولدى. جوبانىڭ ارتىقشىلىعى – سەرىكتەستىكتىڭ ءوز مال بازاسىنىڭ بولۋىندا، ءسۇتتى سيىرلار ۇستاپ، ءسۇتىن وڭدەۋدىڭ تولىق سيكلىندە جانە دايىن ءسۇت ونىمدەرىن شىعارۋىندا. بۇل دەگەنىمىز – ارينە، ءونىمنىڭ وزىندىك قۇنىنىڭ تومەن بولۋى. ءوزى شىعارعان ءسۇتتى ءوزى وڭدەپ ساتۋ ءونىم باعاسىنىڭ رەتسىز كوتەرىلمەۋىنە سەپتىگىن تيگىزەدى.
«ءسۇت وزىمىزدەن شىعادى. ءقازىردىڭ وزىندە شارۋا قوجالىقتاعى 400 باس ءمۇيىزدى ءىرى قارانىڭ 227ء-ى انالىق باس سيىر. قاجەتتى مال ازىعى بازاسىن سالدىق. مال ازىعى رەتىندە بيىل قوسىمشا جۇگەرى ءوسىرىپ جاتىرمىز. الداعى ۋاقىتتا ساۋىلاتىن سيىردىڭ سانىن كوبەيتۋدى جوسپارلاپ قويدىق. ازىرگە وزىمىزدە وندىرىلەتىن سۇتكە قوسىمشا جەرگىلىكتى تۇرعىنداردان ءسۇت ساتىپ الۋدى كوزدەپ وتىرمىز»، – دەدى «اعالي» شارۋا قوجالىعىنىڭ باسشىسى.

دەرەككوز: ەگەمەن قازاقستان