قىتايداعى كەڭ تانىمال WeChat الەۋمەتتىك جەلىسىنىڭ «قورعاس جاڭالىقتارى» بەتىندە قازاقستانداعى دەموگرافيالىق احۋالعا توقتالا كەلە، ەلدەگى ەرلەر سانى ايەلدەردەن الدەقايدا از ەكەندىگىن ايتىپ، قازاق قىزدارىنا «قۇدا تۇسۋگە» شاقىرعان جازبالار تاراۋدا. بۇل تۋرالى «قامشى» پورتالى حابارلايدى.
2355858201 ءنومىرلى WeChat قولدانۋشىسى «قازاقستان مەن جۋنگو – (جۇڭگو حالىق رەسپۋبليكاسىنىڭ قىتايشا اتاۋى – رەد.) ەجەلدەن ءتاتۋ-تاتتى كورشىلەر. ەكى ەل اراسىندا تىعىز بايلانىستار ورناعان. بۇگىندە قازاقستاندا ايەلدەر سانى ەرلەرگە قاراعاندا باسىمدىققا يە. سول سەبەپتى دە قىتايلىق ەركەكتەر ءۇشىن ەكى ەل اراسىنداعى بايلانىس قازاقستانعا بارىپ، قازاق قىزدارىنا ۇيلەنۋگە ەرەكشە مۇمكىندىك بولىپ وتىر. قازاقستان كوشەلەرىندە سۇلۋ قىزدار كوپ. ءبىر ەركەك وندا ءتورت ايەلگە دەيىن الۋىنا بولادى. الايدا، ەركەكتەرىنىڭ كوپ ايەل الۋعا جاعدايلارى جوق. بۇل – قىتايلىق ەر ازاماتتار ءۇشىن ۇلكەن مۇمكىندىك» دەلىنگەن ول جازبالاردا.
سونداي-اق، جەلى قولدانۋشىسى قازاقستانداعى الماتى وبلىسىنىڭ اۋماعىنا دا كوز الارتقان. ونىڭ ويىنشا، «قازىرگى الماتى قالاسىنىڭ ورنىندا بۇرىن شيانشي قىستاعى بولعان».
وسى جازبالار قىتايدا تۇراتىن قانداستارىمىزدىڭ اراسىندا قىزۋ تالقىلانىپ، نارازىلىق تۋعىزۋدا. وسى ماسەلەمەن جۇڭگو قۇقىققورعاۋ ورگاندارى اينالىسىپ جاتقاندىعى تۋرالى دا ايتىلادى.
