«جەتىنشى ارنا» مەن ARAI Media ستۋدياسى «ءومىر سىناعى» جانە «شالعايداعى وقيعا» اتتى ەكى جاڭا تەلەحيكايانىڭ تانىستىرىلىمىن وتكىزدى. اتالعان جوبالار وتاندىق كينوداعى ساپالى ءارى رەيتينگى جوعارى جوبالاردىڭ قاتارىن تولىقتىرادى دەپ جوسپارلانىپ وتىر.

قازاقستاندىق كينەماتوگراف ماماندارى وتاندىق تەلەحيكايالاردىڭ شەتەلدىك تەليەۆيزيالىق ونىمدەرمەن  باسەكەدە وزا شاۋىپ، نارىقتى جاۋلاپ الا الاتىندىقتارىنا سەنەتىندىكتەرىن جەتكىزدى.

تەلەحيكايالاردىڭ باس پروديۋسەرى دانيار جانىبەكوۆتىڭ ايتۋىنشا، جوبا اۆتورلارى قوعامداعى وزەكتى ماسەلەلەردى كوتەرىپ، وتانسۇيگىشتىك، الەۋمەتتىك جاۋاپكەرشىلىك سەكىلدى قۇندىلىقتارعا ءمان بەرگەن.

«ماسەلەن، «ءومىر سىناعى» تەلەحيكاياسىندا مۇمكىندىگىن شەكتەۋلى جانداردىڭ تولىققاندى ءومىر ءسۇرۋ قۇقىعى بار ەكەنى ءسوز بولسا، «شالعايداعى وقيعا» جوباسىندا وتانىڭدى ماقتان ەتىپ، اۋىلىڭنىڭ كوركەيۋىنە، تۋعان جەرىڭنىڭ گۇلدەنۋىنە ۇلەس قوسۋ تاقىرىبى تىلگە تيەك ەتىلەدى»، - دەيدى ول.

«ءومىر سىناعى» تەلەحيكاياسىنىڭ رەجيسسەرى قاناعات مۇستافين قازىرگى قوعامدامۇمكىندىگى شەكتەۋلى جانداردىڭ ەركىن ءجۇرىپ-تۇرۋى شەكتەۋلى ەكەنىن توقتالدى.ونىڭ ايتۋىنشا، «ءومىر سىناعى» ءدال وسى ماسەلەگە كورەرمەندەردىڭ نازارىن اۋدارتادى.

«تەلەحيكاياداعى باس كەيىپكەر ادام قولىنان جاسالعان قاستاندىقتىڭ سالدارىنان اللانىڭ ادامعا بەرگەن سىيىنىڭ جارتىسىنان ايرىلعان ادام. سوعان قاراماستان، ول ءومىر سۇرۋگە قۇشتار، بولاشاعى ءۇشىن كۇرەسەدى»، - دەپ ويىمەن ءبولىستى ول.

وسى تەلەحيكايادا زاعيپ جىگىتتى ويناعان الماس شاياحمەتوۆ قازىرگى كەزدە قوعامدا مۇمكىندىگى شەكتەۋلى جاندارعا دەگەن كوزقاراستىڭ وزگەرگەنىن بايقايتىنى تۋرالى ايتتى.

«بۇرىن «مۇگەدەك» دەگەن ءسوزدى ويلانباي ايتا سالاتىن بولساق، ءقازىر «ەرەكشە قاجەتتىلىكتەرى بار ادامدار» دەپ سويلەيتىن بولدىق. وسىنىڭ ءوزى – ول ادامنىڭ بىزدەن ەشتەڭەسى كەم ەمەس ەكەنىن، ونىڭ بىزگە ۇقسامايتىن جەرى تەك بويىنداعى سول ءبىر وزگەشەلىگى ەكەنىن جانە ول سوعان مۇلدە كىنالى ەمەس ەكەنىن مويىنداۋ»، - دەيدى ول.

رەجيسسەر ءمادينا ءالىمحان «شالعايداعى وقيعا» تەلەحيكاياسىنداعى ەلدوستىڭ تاريحى كوپشىلىككە ۇلگى بولا الاتىنى جايلى جەتكىزدى.

«مويىماي، قاجىماي، تۋعان اۋىلىن كوتەرۋگە بەل بۋعان باس كەيىپكەردىڭ مىسالىندا جات ولكەدە ەمەس، كىندىك قانىڭ تامعان ەلدە باقىتتى بولۋعا بولاتىندىعىن كورۋگە بولادى»، - دەدى ول.

«ءومىر سىناعى» تەلەحيكاياسى 2015 جىلدىڭ 23 قاراشاسىندا 20.00-دە، ال «شالعايداعى وقيعا» 21 جەلتوقساندا«جەتىنشى ارنا» ەفيرىنە شىعادى.

جوبالار قازاقستان رەسپۋبليكاسى ينۆەستيسيالار جانە دامۋ مينيسترلىگى بايلانىس، اقپاراتتاندىرۋ جانە اقپارات كوميتەتىنىڭ قولداۋىمەن تۇسىرىلگەن.