قازاقستان فۋتبول فەدەراسياسىنىڭ پرەزيدەنتى ەرلان قوجاعاپانوۆ ايسۇلتان نازاربايەۆ پەن بارلىق فۋتبول جاناشىرلارىن رەسپۋبليكالىق فۋتبول فورۋمىنا قاتىسۋعا شاقىردى. بۇل تۋرالى «قامشى» پورتالى ەرلان قوجاعاپانوۆتىڭ facebook الەۋمەتتىك جەلىسىندە جاريالاعان حاتىنا سىلتەمە جاساپ حابارلايدى.

         ەرلان قوجاعاپانوۆ فۋتبولدىڭ بۇگىنگى جەتىستىگى ءبىر كۇندىك جۇمىستىڭ ناتيجەسى ەمەس، ماعان دەيىنگى باسشىلاردىڭ ەرەن ەڭبەگى دەپ مالىمدەدى. ناقتىراق ايتساق ول ۋەفا-عا مۇشە بولىپ، «سەسنا» فۋتبول اكادەمياسى قۇرىلعانىن تىلگە تيەك ەتتى. سونداي-اق، فەدەراسيا باسشىسى ايسۇلتان نازاربايەۆقا قاتىستى ءوزىنىڭ پىكىرىن ءبىلدىردى.

– ماعان ايسۇلتان نازاربايەۆتىڭ باستاماسىنا كوزقاراسىڭىز قالاي دەگەن سۇراقتى كوپ قويادى.  ايسۇلتاننىڭ قازاقستاندىق فۋتبولدىڭ دامۋىنا قىزىعۋشىلىق تانىتقانى ارينە قۋانتادى. ونىڭ باستاماسى كوپتەگەن ادامداردىڭ فۋتبولدىڭ بۇگىنگى جاعدايىنا كوڭىل اۋدارۋىنا سەبەپ بولدى. ماعان ونىڭ اشىق، جاريا تۇردە ءوزىنىڭ پوزيسياسىن بىلدىرگەنى ۇنادى. ول باسقا كۇشتەردى قولدانۋ ارقىلى ماقساتىنا جەتە الار ەدى، ءبىراق ول قوعاممەن اشىق بايلانىس ورناتۋ ارقىلى دۇرىس جول تاڭدادى دەپ بىلەمىن. ءبىز ونىڭ فۋتبولدىڭ دامۋىنا بىرلەسە جۇمىس اتقارۋىن قالايمىز، – دەدى ەرلان قوجاعاپانوۆ.

سونداي-اق، ەرلان توقتارحان ۇلى قازاق فۋتبولىندا جەدەل شەشىمدى قاجەت ەتەتىن كوپتەگەن ماسەلەلەردىڭ بار ەكەنىن جاسىرمادى. ماسەلەن، ول بالالار مەن جاسوسپىرىمدەر فۋتبولى ءالى دە دامىتۋىمىز قاجەت ەتەدى دەگەن پىكىردە. بۇدان بولەك ەرلان قوجاعاپانوۆتى مانەجدەردىڭ جەتكىلىكسىزدىگى مەن بارلىق دەڭگەيدەگى جاتتىقتىرۋشىلاردىڭ ازدىعى ويلاندىرادى. سوندىقتان دا ول استانادا 21 قاراشا كۇنى وتەتىن رەسپۋبليكالىق فۋتبول فورۋمعا بارشا ازاماتاردى شاقىرىپ وتىر.