بۇل تۋرالى كەشە اقوردادا ەكسپو-2017 كورمەسىن وتكىزۋگە دايىندىقتى پىسىقتاعان جيىندا ەلباسى ن. نازاربايەۆ مالىمدەدى.
«كورمەنىڭ باستالۋىنا ءبىر جارىم جىلداي ۋاقىت قالدى. بارلىق قۇرىلىس جۇمىستارى كەلەر جىلدىڭ كۇزىنە دەيىن اياقتالۋى ءتيىس. ەكونوميكالىق قيىندىقتارعا قاراماي وسى ءىس-شاراعا قاجەت قارجىنى ءبولىپ جاتىرمىز» دەگەن ەلباسى كورمەنى وتكىزۋگە دايىندىقتا ەشقانداي تۇسىنىكسىز ماسەلە جوق ەكەنىنە ءمان بەردى. سونداي-اق، ول كورمەنى بەلگىلەنگەن تاقىرىپقا ساي تولتىرۋ ماسەلەسىنە نازار اۋدارتتى.
ەلباسى كورمەنى وتكىزۋگە دايىندىق جۇمىسىنا وتاندىقك ومپانيالاردىڭ قاتىسۋ ۇلەسىنىڭ ازدىعىنا كوڭىلى تولمايتىنىن دا جەتكىزدى.
«ۇلتتىق جانە ترانسۇلتتىق كومپانيالاردىڭ پوتەنسيالى مۇلدە پايدالىنىلماي وتىر. بۇل جالپىقازاقستاندىق شارا بولعان سوڭ، ولار دا قاتىسۋى كەرەك. قازاقستانداعى بارلىق جەر قىرتىسىن پايدالانۋشى كومپانيالاردى جۇمىلدىرۋ كەرەك. وسىنداي بارلىعى 39 كومپانيانىڭ بۇگىندە تەك ەكەۋىمەن عانا ارىپتەستىك تۋرالى مەموراندۋم، بىرەۋىمەن دەمەۋشىلىك تۋرالى كەلىسىم-شارت جاسالعان. بۇل جەتكىلىكسىز» دەدى پرەزيدەنت ن. نازاربايەۆ.
سونىمەن قاتار، مەملەكەت باسشىسى ءىرى جەر قىرتىسىن پايدالانۋشىلاردىڭ بەدەلىن Siemens، Samsung، Toyota، تاعى باسقا وزىق تەحنولوگيالارعا يە الەمدىك كومپانيالاردى ەكسپو-2017 كورمەسىنە شاقىرۋعا پايدالانۋ كەرەكتىگىن دە ۇسىندى.
«بىزدەگى جەر قىرتىسىن پايدالانۋشىلار ولاردان ءىرى كولەمدە قۇرىلعىلار مەن جاڭا تەحنولوگيالار ساتىپ الادى. وسى بايلانىستاردى ءتيىمدى پايدالانۋ كەرەكپىز. ءاربىر وتاندىق كاسىپورىن الەمدىك برەندتەرمەن ءوز جاڭالىقتارىنىڭ تۇساۋكەسەرلەرىن ءبىزدىڭ ەلدەگى كورمەدە ۇيىمداستىرۋى تۋرالى كەلىسىيگە كەلۋلەرى قاجەت. بۇل ماسەلەمەن اينالىسۋدى پرەمەر-مينيستردىڭ ءبىرىنشى ورىنباسارى باقىتجان ساعىنتايەۆقا جۇكتەيمىن» دەگەن ناقتى تاپسىرما قويعان پرەزيدەنت كورمەگە بالاما تەحنولوگيالارعا يە جەتەكشى ەلدەردىڭ قاتىسۋىنا قول جەتكىزۋ كەرەكتىگىنە باسا نازار اۋدارتتى.
پىكىر قالدىرۋ