پۋەرتوريكاندىق بوكسشى ميگەل كوتتو دۇنيەجۇزىلىك بوكس كەڭەسىنىڭ (WBC) ونى چەمپيوندىق تيتۋلدان ايىرۋ شەشىمىنە تۇسىنىكتەمەسىن بەردى. بۇل تۋرالى «قامشى پورتالى» sports.kz-كە سىلتەمە جاساپ حابارلايدى

ول تيتۋلدان ساۋل الۆارەسپەن جەكپە-جەگىنىڭ الدىندا مىندەتتى جارنا تولەۋدەن باس تارتقانى ءۇشىن ايىرىلعان بولاتىن. بوكسشى سونداي-اق Golden Boy پروموۋتەرلىك كومپانياسىنىڭ باسشىسى وسكار دە لا حوييانىڭ ونىڭ ارەكەتىن «بوكس ءۇشىن ماسقارا» دەپ اتاعان سىنىنا دا جاۋاپ بەردى.

«وسكاردان دۇنيەجۇزىلىك بوكس كەڭەسىنە 1،1 ميلليون دوللار تولەۋىن سۇراپ، جاۋابىن كۇتىڭىز. 1،1 ميلليون دوللار. بۇل دۇرىس پا؟ جوق، بۇل ءادىل ەمەس»، - دەپ ەسەپتەيدى كوتتو. بوكسشىنىڭ ايتۋىنشا، WBC سۇراعان سومانى تولەۋگە گەنناديي گولوۆكيننىڭ كومانداسىنا قازاقستاندىق بوكسشىنىڭ «ارالاسپاي»، پۋەرتوريكاندىققا 21 قاراشادا ساۋل الۆارەسپەن كەزدەسۋگە مۇمكىندىك بەرگەنى ءۇشىن 800 مىڭ دوللار تولەۋ جاعدايى قيىنداتتى.

«ءبىز گولوۆكينعا ونىڭ ارالاسپاعانى ءۇشىن تولەۋىمىز ءتيىس 800 مىڭ دوللاردى قوسقاندا، مەن ولارعا تاعى 125 مىڭ دوللار تولەۋگە كەلىستىم. مەن ءۇشىن بۇل قوماقتى سوما. ول (WBC پرەزيدەنتى - اۆتور) بۇل سومانىڭ قوماقتى ەمەس ەكەنىن ايتىپ، «جوق» دەپ جاۋاپ بەردى»، - دەپ ءتۇسىندىردى كوتتو.

«ماعان بەلدىكتەر كەرەك ەمەس. مەنىڭ ۇيىمدە بەلدىكتەر جەتكىلىكتى، 1،1 ميلليون دوللارعا ءوزىم قالاعان كەز كەلگەن بەلدىكتى ساتىپ الا الامىن. ماعان تيتۋل كەرەك ەمەس»، - دەپ اتاپ ءوتتى پۋەرتوريكاندىق بوكسشى.