ەلىمىزدەگى ءتورتىنشى مۇناي وڭدەۋ زاۋىتىن ماڭعىستاۋ وبلىسىندا سالعان ورىندى. بۇگىن پارلامەنت سەناتىنىڭ جالپى وتىرىسىندا ۇكىمەت باسشىسىنىڭ اتىنا ساۋال جولداعان دەپۋتات ميحايل بورتنيك وسى ماسەلەنى كوتەردى.

«ماڭعىستاۋ جۇرتشىلىعى ەلباسىنىڭ ءتورتىنشى مۇناي وڭدەۋ زاۋىتىن سالۋ تۋرالى ۇسىنىسىن زور ىقىلاسپەن قابىلدايدى جانە بۇل كاسىپورىننىڭ ءدال ماڭعىستاۋ وبلىسى اۋماعىندا بولۋى كەرەكتىگىن ورىندى سانايدى. حالىقتىڭ باستاماسىن قولداي وتىرىپ، بۇنداي شەشىمگە وڭتايلى دالەلدەردى العا تارتامىز»، – دەي كەلە دەپۋتات م. بورتنيك ءبىرقاتار مىسالدار كەلتىردى.

ونىڭ ايتۋىنشا، ماڭعىستاۋ ءوڭىرىنىڭ ەكونوميكاسى نەگىزىنەن كومىرسۋتەك شيكىزاتتارىن وندىرۋگە تاۋەلدى. بۇل سالاداعى ءوندىرىس  2013 جىلى 18 ملن. توننادان استى. ال بارلانعان كەن ورىندارىنداعى قورلار 3،5 ملرد توننانى قۇراعان. بۇدان بولەك، الداعى ۋاقىتتا تەڭىز كەن ورىندارىن يگەرۋ جوسپارلانادى. ال قالىپتاسقان شيكىزات بازاسى مۇناي وڭدەۋ زاۋىتىنىڭ ۇزدىكسىز جۇمىسىن قامتاماسىز ەتۋگە جەتەدى. بۇدەن بولەك، سەناتوردىڭ پىكىرىنشە، «جەقازعان-بەينەۋ»، «جاڭا وزەن-تۇركىمەنستان-يران-پارسى شىعاناعىنىڭ شەكاراسى» سەكىلدى كولىكتىك-لوگيستيكالىق جۇيەنىڭ بەلسەندى تۇردە جۇزەگە اسۋى، تەڭىز پورتتارىنىڭ قۋاتىن ارتتىرۋ شارالارى وندىرىلگەن ءونىمدى ىشكى عانا ەمەس، سىرتقى نارىققا شىعارۋدى قامتاماسىز ەتە الادى.

«مۇناي وڭدەۋ زاۋىتىنىڭ قۇرىلىسى ماڭعىستاۋ وبلىسىنىڭ ەكونوميكاسىن ءارتاراپتاندىرۋعا دە سەپتىگىن تيگىزەر ەدى. جاڭا جۇمىس ورىندارى قۇرىلادى، بىلىكتى ەڭبەك رەسۋرستارى تارتىلادى. توقتالا كەتەتىن تاعى ءبىر وزەكتى جايت، 1990-جىلداردىڭ باسىندا ماڭعىستاۋ وبلىسىنىڭ اۋماعىندا وسىنداي كاسىپورىن قۇرىلىسى باستالىپ، ءبىراق وكىنىشكە قاراي اياقتالماعان بولاتىن. دەگەنمەن، وسىنىڭ ناتيجەسىندە تەمىرجول، اۆتوكولىك جولدارى، قۇبىر جانە ەلەكتر جەلىلەرى سەكىلدى ينفراقۇرىلىمدار قالىپتاسقان ەدى»، – دەيدى م. بورتنيك.

وسىعان وراي، دەپۋتات جاڭا مۇناي زاۋىتى سالىناتىن ورىندى انىقتاۋدا بۇل فاكتىلەر قاپەرگە الىنسا دەگەن تىلەگىن جەتكىزدى.

قازاقپارات