استانادا رەسەيدىڭ باس پروكۋرورى ءابليازوۆتى ەكستراديسيالاۋعا قاتىستى پىكىرىن ايتتى. بۇل تۋرالى «قامشى» پورتالى  Tengrinews.kz-كە سىلتەمە جاساپ حابارلايدى. 

"ول قازاقستانعا ەكستراديسيالانعالى جاتقان جوق. ەگەر ول ەكستراديسيالاناتىن بولسا، تەك رەسەي فەدەراسياسىنا. ءبىز كوپ نارسە ىستەدىك، سوتتىڭ بارلىق ينستانسياسىنان وتتىك. ءبىزدىڭ پوزيسيامىز ءابليازوۆتى رەسەيگە ەكستراديسيالاۋ بولدى. ءبىزدىڭ پوزيسيانى فرانسيا ۇكىمەتى قولدادى. ءقازىر مەملەكەتتىك كەڭەس دەڭگەيىندە ساياسي شەشىم بولۋى كەرەك. ەگەر ونداي شەشىم شىقسا، ول رەسەيگە ەكستراديسيالانادى. وعان رەسەي فەدەراسياسىندا ايىپ تاعىلادى. ول رەسەي اۋماعىندا قىلمىس جاسادى: بىرنەشە ميلليارد دوللاردى جىمقىردى - رف قارجىسىن"، - دەپ جاۋاپ بەردى Tengrinews.kz ءتىلشىسىنىڭ سۇراعىنا يۋريي چايكا سىبايلاس جەمقورلىققا قارسى ارەكەت مەملەكەتارالىق كەڭەسى وتىرىسىنىڭ كۋلۋارىندا.

وتىرىس بۇگىن استانادا قازاقستان، رەسەي مەن بەلارۋس قۇقىق قورعاۋ ورگاندارىنىڭ قاتىسۋىمەن ءوتتى.

ەسكە سالا كەتەيىك، بۇعان دەيىن بتا بانكتىڭ بۇرىنعى باسشىسى مۇحتار ءابليازوۆتىڭ رەسەيگە ەكستراديسيالاناتىنى جانە مۇنداي شەشىمدى فرانسيا سوتىنىڭ قابىلداعانى حابارلانعان بولاتىن. ەكس-بانكيردى رەسەيگە ەكستراديسيالاۋ تۋرالى قۇجاتقا 17 قىركۇيەكتە فرانسيانىڭ پرەمەر-مينيسترى مانۋەل ۆالس قول قويدى. ءابليازوۆ بۇل شەشىمگە جوعارى اكىمشىلىك ينستانسيا - فرانسيانىڭ مەملەكەتتىك كەڭەسىندە شاعىم كەلتىرۋگە قۇقىلى. كەيىن قازاقستاننىڭ باس پروكۋراتۋراسى ءابليازوۆتى رەسەيدەن نەمەسە ۋكراينادان قايتا ەكستراديسيالاۋ جونىندە ەشقانداي كەلىسسوزدەردىڭ جۇرگىزىلىپ جاتپاعانىن مالىمدەدى.