«قازاقستان» ۇلتتىق ارناسىندا «قازاقستان داۋىسى» بايقاۋىنىڭ باستالعانىنا كوپ بولدى. ەل ىشىنەن ونەرلى جاستاردى تانىتۋدى ماقسات ەتكەن بايقاۋدىڭ وسى كۇنگە دەيىن بىرنەشە كەزەڭى ءوتىپ تە ۇلگەردى. بيىلعى كەزەڭى دە تارتىستى وتۋدە. وعان ەلىمىزدىڭ ءار تۇپكىرىنەن، كورشىلەس ەلدەردەن دە ونەرلى جاستارىمىز قاتىسىپ باعىن سىناۋدا. سولاردىڭ ءبىرى – سەيىت ساۋاتايۇلىمەن بولعان شاعىن سۇحباتتى نازارلارىڭىزعا ۇسىنامىز.

-سەرىك، قادامىڭا نۇر جاۋسىن دەيمىز. بۇل بايقاۋعا قاتىسۋعا قاشاننان بەرى تالپىنىپ ەدىڭ؟

- «قازاقستان داۋىسى» جوباسى العاش باستالعان جىلى-اق وسى بايقاۋدا ب ا ق سىناپ كورۋ مەنىڭ ۇلكەن ارمانىم بولدى. باعىم جانىپ بيىل سونىڭ ىڭعايى تۋىپ، دوداعا قاتىسۋدىڭ رەتى كەلىپ وتىر.

- سەنى ءادىل قازىلار «التايدىڭ ار جاعىنان كەلىپتى» دەپ جىلى قابىلداپ، قولپاشتاپ جاتتى. ءوزىڭ جايلى تانىستىرا كەتسەڭ.

- مەن 1983 جىلى ىلە قازاق اۆتونوميالى وبلىسىنىڭ، تەكەس اۋدانى، شىڭعىستاي جەگەن جەرىندە ومىرگە كەلىپپىن.

- بالاعا ونەر انانىڭ سۇتىنەن، اكەنىڭ قانىنان داريدى دەپ جاتادى، ءوزىڭ ونەرگە قالاي كەلدىڭ؟

- ونەر ماعان ناعاشى جاعىمنان كەلدى. ءبىزدىڭ ۇيدە ءان سالاتىن ەشكىم جوق، مەن عانا. مەنەن باسقا ەشكىم دە ءان سالمايدى. شەشەم ءبىراز ءان سالادى. سودان شىعار مەن ونەرگە جاقىن بولدىم.

- مادينا سادۋاقاسوۆا سەنى «اعاجايدى» ءۇش داۋىسپەن جەتكىزدى دەپ ماقتاپ جاتتى. ءان سالىپ جۇرگەن ونەرىڭمەن، تالابىڭمەن ارنايى اكادەميالىق ءبىلىم الدىڭ با؟

- ارنايى ءبىلىم المادىم. ءبىراق، قازاقتىڭ ماڭداي الدى انشىلەرىنىڭ ءبارىن تىڭداپ ءوستىم. ەرمەك سەركەبايەۆ، بەكبولات تىلەۋحان، رامازان ستامعازييەۆ اعالارىمىزدىڭ ونەرىنەن ۇلگى الدىم. ەلىكتەپ ءان سالدىم.

- العاش تانىسقانىمىزدا ەلگە كەلۋىڭ تۋرالى ماقاتايەۆقا ارنالىپ تۇسىرىلەتىن كينوعا ارنايى شاقىرىلدىم دەپ ەدىڭ. ول كينوعا قالاي شاقىرىلدىڭ، سول كينو كورەرمەنگە جول تارتتى ما؟

- بۇل كينو مۇزبالاق اقىن مۇقاعالي ماقاتايەۆتىڭ «جەتىم كول» پوەماسى جەلىسىندە تۇسىرىلمەكشى بولعان. نەگىزى فيلمگە باسىندا تۇسىدەيىن ءتۇستىم، ءبىراق، كەيىن تەحنيكالىق، باسقا دا سەبەپتەرمەن بۇل كينونىڭ ءتۇسىرىلىمى اياقسىز قالدى.

- ال، مىنا «قازاقستان داۋىسى» بايقاۋىنداعى دايىندىعىڭ قالاي ءجۇرىپ جاتىر؟

- بۇل جوبادا ءقازىر ءار تالىمگەردە 4-تەن ونەرپاز قالدىق. مەن رۇستەم نۇرجىگىتتىڭ قولىندامىن. «اعاجايدى» ايتقان سەبەبىم، ءقازىر انشىلەر نەمەسە ءان سالماققا ۇمتىلىپ جۇرگەندەر قاي-قايداعى ءاندى ايتاتىن بولدى. بۇل جاقتاعى قازاقتار عانا زارداپ كورگەن جوق، قىتايداعى قازاقتار عانا اۋىر كەزەڭدەردى باستان كەشتى. مەن دە زاماننىڭ زارىن ايتۋ ارقىلى ەلدىڭ مۇڭىن جەتكىزگىم كەلدى. اللا قولداپ جەڭىمپاز بولام با دەگەن ءۇمىتىم بار!(كۇلەدى). نەگىزگى ماقساتىم – قازاقتىڭ ءان ونەرىنە ءوز ۇلەسىمدى قوسۋ، قازاق ءانىن ناسيحاتتاۋ. سول مۇرات جولىندا شاما-شارقىمىزشا قىزمەت جاساۋ.

- راحمەت. ونەر جولىنداعى تالپىنىسىڭا ساتتىلىك جولداس بولسىن دەيمىز.

اڭگىمەلەسكەن: ەرلان تولەۋباي