ۋكراينانىڭ جوعارعى راداسى كوپشىلىك داۋىسپەن ۋكراينانىڭ ەكس-پرەمەرى يۋليا تيموشەنكونى بوساتۋعا مۇمكىندىك بەرەتىن زاڭ قابىلدادى، دەپ حابارلادى ۋترو.رۋ

ەكس-پرەمەر كىنالى دەپ تانىلعان ۋكراينا قك 365-بابى (بيلىكتى نەمەسە قىزمەتتىك وكىلەتتىكتى اسىرا پايدالانۋ) قىلمىسقا جاتپايتىن بولىپ وزگەرتىلدى. بۇل شەشىمگە 365 حالىق دەپۋتاتىنىڭ ىشىنەن 310-ى جاقتاپ داۋىس بەردى.

ەكس-پرەمەر جەتى جىلدىق مەرزىمىن حاركوۆ وبلىسىنداعى كولونيادا وتەۋدە. 2011 جىلعى قازاندا كييەۆتىڭ پەچەرسكيي اۋداندىق سوتى ونى 2009 جىلعى رەسەيمەن گازعا بايلانىستى كەلىسىم جاساسقان كەزدە وكىلەتتىگىن اسىرا پايدالاندى دەپ ايىپتادى دا، جەتى جىلعا باس بوستاندىعىنان ايىرعان بولاتىن. سوت سونداي-اق تيموشەنكونىڭ مۇلكىن تاركىلەپ، وعان «ۋكراينانىڭ نافتوگازى» ۇاك-قا $200 ميلليون تولەۋگە مىندەتتەگەن.

كەيىننەن ەكس-پرەمەرگە ءتورت ەپيزود بويىنشا جاڭا ايىپ تاعىلىپ، ءتورت قىلمىستىق ءىس ءبىر وندىرىسكە بىرىكتىرىلگەن بولاتىن.

11 اقپاندا تيموشەنكوعا ۋكراينا پرەزيدەنتى اكىمشىلىگىنىڭ باسشىسى اندرەي كليۋيەۆ باردى. وپپوزيسياداعى دەرەككوزدەردىڭ حابارلاۋىنشا، كەلىسسوزدەر تاقىرىبى ساياسي داعدارىستان بىرلەسىپ شىعۋ جولىن قاراستىرۋ، وڭىرلەر پارتياسى مەن جوعارعى راداداعى «باتكيۆششينانىڭ» كۇشتەرىن بىرىكتىرۋ جايىندا  وربىگەن.

كەلەسى كۇنى ەكس-پرەمەر پرەزيدەنت ۆيكتور يانۋكوۆيچكە اشىق پىكىرسايىسقا شىعۋدى ۇسىندى.