پارلامەنت ءماجىلىسىنىڭ دەپۋتاتى  مۇحتار تىنىكەيەۆ ەلدىڭ ءار ايماعىندا ءوتىپ جۇرگەن ازىق-تۇلىك جارمەڭكەلەرىن سىنعا الدى. بۇل تۋرالى «قامشى» پورتالى حابارلايدى.

ءماجىلىستىڭ پلەنارلىق وتىرىسىندا دەپۋتات ۇلتتىق ەكونوميكا ءمينيسترىنىڭ ورىنباسارى مارات قۇسايىنوۆقا دۇرسە قويا بەردى.

«بىرەۋدىكىن تارتىپ الىپ، ەكىنشى ادامدى باقىتتا ەتە المايمىز. سىزدەر جارمەڭكەلەردى جالاۋلاتىپ جۇرسىزدەر. وسى جارمەڭكە ارقىلى شارۋالاردان نەنى تارتىپ الىپ جۇرگەنىمىزدى بىلەسىز بە؟ ءبىز ولاردى تاۋارلارىن ءۇش ەسە ارزان باعاعا قالاعا اكەپ ساتۋعا ماجبۇرلەۋ ارقىلى تۇرالاتىپ جاتىرمىز. ول ونىمدەردى كىمدەر ساتىپ الىپ ءجۇر؟ دجيپ مىنگەن بايلار قاپشىقتاپ ساتىپ اكەتەدى. ال، قالانىڭ سىرتىندا تۇراتىن قارتاڭ كىسىلەر جارمەڭكەگە جەتە دە المايدى. وسى الەۋمەتتىك پاۆيلونداردى ءار اۋداندا اشۋدى قولدايسىز با؟ شارۋالاردى شىعىنعا باتىرۋدى توقتاتۋ كەرەك» دەيدى دەپۋتات.

مارات قۇسايىنوۆ تا قاراپ قالمادى. ءماجىلىس دەپۋتاتىنىڭ ساۋالىنا الەۋمەتتىك پاۆيلونداردى اشۋ دۇرىس دەگەن ءوز ءۋاجىن ايتتى.

«اۋىلشارۋاشىلىعى ونىمدەرىن وندىرۋشىلەرگە ارنايى ورىندار بەرىلەدى. مىسالى، استانادا ولار ءوز تاۋارلارىن دەلدالسىز ساتا الادى. كوممۋنالدىق بازارلاردا ورىنداردىڭ 25 پايىزى جەرگىلىكتى تاۋار وندىرۋشىلەرگە ۇسىنىلىپ كەلەدى» دەدى ۆيسە-مينيستر.