بۇگىن الماتىدا قازاق ۇلتتىق اگرارلىق ۋنيۆەرسيتەتىنىڭ ىرگەسى قالانعانىنا 85 جىل تولۋىنا وراي وقۋ ورداسىندا عىلىمي كونفەرەنسيا ءوتتى. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى.

جيىنعا ق ر اۋىل شارۋاشىلىعى ءمينيسترى اسىلجان مامىتبەكوۆ پەن قالا اكىمى باۋىرجان بايبەك قاتىستى. 

مينيستر وقۋ ورنىنىڭ مەرەيتويىنا بايلانىستى مەملەكەت باسشىسى نۇرسۇلتان نازاربايەۆتىڭ قۇتتىقتاۋ ءسوزىن جەتكىزدى. "قازاق ۇلتتىق اگرارلىق ۋنيۆەرسيتەتىنىڭ ۇجىمىن  85 جىلدىعىمەن قۇتتىقتايمىن. ۋنيۆەرسيتەت - ەلىمىزدەگى اۋىل شارۋاشىلىعى وندىرىسىنە ارناپ بىلىكتى ماماندار دايىندايتىن ىرگەلى  وقۋ ورنى. ونى مىڭداعان تۇلەكتەر ءبىتىرىپ، وتانىمىزدىڭ اوك سالاسىنىڭ دامۋىنا ۇلەس قوستى. ۋنيۆەرسيتەت ءوز جۇمىسىن زامان تالابىنا ساي ۇيىمداستىرىپ كەلەدى. ستۋدەنتتەرگە ساپالى ءبىلىم بەرىپ، عىلىمي-زەرتتەۋ ناتيجەسىن ارتتىرۋدا. يننوۆاسيالىق ىزدەنىستەردى دامىتۋدا. الەمدە حالىق سانى ءوسىپ، ساپالى ازىق-تۇلىككە دەگەن سۇرانىس بارعان سايىن ارتىپ وتىرعان كەزدە اۋىل شارۋاشىلىعى ءوندىرىسى  سالاسى ءاردايىم وزەكتى بولىپ قالادى. بۇل باعىتتا ۋنيۆەرسيتەت ۇجىمىنا جۇكتەلەتىن جاۋاپ ارتا تۇسەرى انىق"، - دەدى مينيستر. 

قالا اكىمى باۋىرجان بايبەك الماتى قالاسىنىڭ دامۋىنداعى اگرارلىق سالانىڭ الار ورنى تۋرالى ايتىپ ءوتتى. "مەملەكەت باسشىسى عىلىمنىڭ دامۋىنا ۇلكەن ءمان بەرىپ وتىر. جاقىندا الماتىعا ساپارىندا ول قالانىڭ اۋقىمدى مەگاپوليس رەتىندەگى ماڭىزىن تىلگە تيەك ەتتى. قالا تۇرعىندارىن ازىق-تۇلىكپەن قامتاماسىز ەتۋ اسا وزەكتى ماسەلە. الماتىنىڭ دامۋى وبلىسپەن تىكەلەي بايلانىستى. ۋنيۆەرسيتەتتىڭ يمپورتتىق ونىمدەردىڭ ورنىن باسۋ ماقساتىندا سالالىق كلاستەردى قالىپتاستىرۋدا قوسىپ وتىرعان ۇلەسىن ايتا كەتۋ ماڭىزدى"، -دەدى قالا اكىمى.