رەسەي جانە گرۋزيا اۋماعى ارقىلى تۇركيادان قازاقستانعا تاۋار اكەلە جاتقان ونداعان جۇك كولىگى  گرۋزيندىك “كازبەگي”  مەن رەسەيلىك “ۆەرحنيي لارس” كەدەندىك-وتكىزۋ بەكەتى اراسىنداعى بەيتاراپ ايماقتا رەسەيگە كىرۋگە رۇقسات كۇتىپ تۇر، - دەپ حابارلايدى «قامشى» پورتالى nur.kz-كە سىلتەمە جاساپ.

بۇدان بۇرىن رف اۋىل شارۋاشىلىعى باسشىسى الەكساندر تكاچيەۆ ۇكىمەتتىڭ رەسەي اۋىل شارۋاشىلىعى قاداعالاۋ كوميتەتىنە تۇركيادان اكەلىنەتىن اۋىل شارۋاشىلىعى ونىمدەرىنە باقىلاۋدى كۇشەيتۋدى، سونداي-اق رەسەي شەكاراسىندا جانە تۇركيانىڭ وزىندە وندىرىستە قوسىمشا تەكسەرۋلەر ۇيىمداستىرۋدى تاپسىرعانىن مالىمدەدى.

“بەيتاراپ ايماقتا قازىرگى ۋاقىتتا 30-عا جۋىق ماشينا تۇر، جاعداي ازىرگە وزگەرگەن جوق”، — دەپ حابارلادى كىرىس قىزمەتىنەن.

جۇرگىزۋشىلەردىڭ وزدەرى جۋرناليستەرگە شەكارادان قاشان وتەتىنىن بىلمەيتىندىكتەرىن ايتتى. جۇرگىزۋشىلەردىڭ ايتۋىنشا، ولار ءوز جۇمىستارىن عانا اتقارۋدا جانە ەكى ەل اراسىنداعى ساياسي پروسەستەر بۇل ىستە ولارعا كەدەرگى كەلتىرمەۋى ءتيىس.

“رەسەيلىك تاراپ ءبىزدى قازاقستانعا تۇرىك تاۋارلارىن تاسىمالدايتىندىقتان، جىبەرمەي وتىر. مۇندا تۇرعانىمىزعا بىرنەشە كۇن بولدى. مۇندا ءازىربايجان، تۇركيا، ارمەنيا ازاماتتارى تۇر، نەگىزىنەن بارلىعى تۇركيادان جۇك تاسىمالدايدى”، — دەدى جۇرگىزۋشىلەردىڭ ءبىرى.