جاڭا جىلدان باستاپ ەلتاڭبا وزگەرەدى، - دەپ حابارلايدى «قامشى» پورتالى "الماتى" تەلەارناسىنا سىلتەمە جاساپ.

اقپارات قۇرالىنىڭ مالىمەتىنشە، كەلەر جىلدىڭ 1 قاڭتارىنان باستاپ قازاقستاندا جاڭا ۇلگىدەگى ەلتاڭبا ەنگىزىلەدى. بۇل تۋرالى بۇگىن  ورتالىق كوممۋنيكاسيالار قىزمەتىندەگى بريفينگتە مەملەكەتتىك ەلتاڭبانىڭ اۆتورى جانداربەك مالىبەكوۆ مالىمدەدى.

"2016 جىلدىڭ 1 قاڭتارىنان باستاپ جاڭا ەلتاڭبامىز ەنگىزىلەدى. ءبىزدىڭ مەملەكەتتىك سيمۆولدارىمىز ەلىمىزدىڭ زاڭدارىمەن، كونستيتۋسيامىزبەن بەكىتىلگەن. دەگەنمەن، قازاقستاننىڭ مەملەكەتتىك ەلتاڭباسىنا قازىرگى تەحنولوگيالارعا، بۇگىنگى كۇنگى كوپتەگەن وزگەرىستەرگە بايلانىستى ولشەمدەردى، مودەلدەردى، 3D مودەلدەنۋى رەتكە كەلتىرىپ، اتاۋلارى ناقتى ەنگىزىلەدى. ءبىراق، تولىقتاي العاندا مەملەكەتتىك رامىزدەرىمىزگە ەش وزگەرىس ەنگىزىلمەيدى. ال، ەسكى ۇلگىدەگى ەلتاڭبا 2017 جىلدىڭ سوڭىنا دەيىن قولدانىلا بەرەدى. جاڭا ەلتاڭباعا توقتالساق، ونىڭ ولشەمدەرىن، جاڭا نۇسقاسىن دايىنداۋ وڭايعا تۇسكەن جوق. شامامەن 5-6 جىل ۋاقىت كەتتى. دەگەنمەن، ول جاڭا قۇرالدار، تەحنولوگيالار بويىنشا جاسالدى"، - دەيدى ەلتاڭبا اۆتورى.

ەلتاڭبا اۆتورى سونداي-اق ءقازىر قولدانىپ جۇرگەن ەلتاڭبانىڭ ەش اتاۋى جوق ەكەنىن ايتادى.

"قازىرگى ەلتاڭبانىڭ ەش اتاۋى جوق. وعان كوز سالعاندا قاي جەرىندە نە تۇرعانى بەلگىسىز. سوندىقتان، 40-تان استام اتاۋ بەردىك. ءار اتاۋدىڭ وزىندىك ولشەمى، ءوز ورنى، سيپاتتاماسى بار"، - دەدى ج. مالىبەكوۆ.