الماتى تۇرعىندارى ساتىپ العان ناندارىنىڭ اراسىنان بەس جاندىكتى تاۋىپ الدى، - دەپ حابارلايدى «قامشى» پورتالى Tengrinews.kz-كە سىلتەمە جاساپ.

وقيعا 20 قاراشادا بولعان، الماتىلىق بالنۇر ءپىرالى قالا ماڭىندا تۇراتىن قۇربىسىنىڭ ۇيىنە قوناققا بارعان. "داستارحان باسىندا اڭگىمەلەسىپ وتىرىپ، ءبىر مينۋت ويعا شومىپ كەتتىم جانە كوزىم جارتىلاي كەسىلگەن نانعا ءتۇستى. وندا تۇسىنىكسىز قارا داقتار بولدى. ءبىز ونى قاراپ، شۇقىعاننان كەيىن قوڭىزدار ەكەنىن تۇسىندىك. ءبىز ءبىر ناننان بەس جاندىكتى الىپ شىقتىق، نان وراماعا ورالعان بولاتىن"، - دەدى ول.

ناننىڭ الماتىنىڭ ورتالىعىنداعى سۋپەرماركەتتەردىڭ بىرىندە ساتىپ الىنعانى انىقتالدى. دايىندالعان ۋاقىتى رەتىندە 19 قاراشا كورسەتىلگەن. "تۇسىنبەيمىن، ول جەرگە قوڭىزدار قايدان كەلگەن، بەسەۋى بىردەي. ءبىز ەشقايدا شاعىمدانعان جوقپىز، ناندى كەيىن لاقتىرا سالدىق. وكىنىشكە قاراي، چەك تە جوق، ساقتاماپپىز. مۇندايعا جول بەرمەۋ ءۇشىن ءوندىرۋشى كومپانيا جاعدايدى رەتتەۋى ءتيىس"، - دەدى قىز. 

وسىعان ۇقساس وقيعا بۇعان دەيىن استانادا بولدى. ەلوردالىق تۇرعىنناننىڭ ىشىنەن شەگە تاۋىپ الدى. نان "ءانۋار" دۇكەنىنەن ساتىپ الىنعان. الايدا كاسىپورىننىڭ كوممەرسيالىق ديرەكتورى شەگەنىڭ ناننىڭ ىشىندە بولۋى مۇمكىن ەمەس ەكەنىن ايتتى.