شىمكەنت اكىمىنىڭ شتاتتان تىس كەڭەسشىسى قازاقشا سويلەۋدى سۇراعان بلوگەرلەرگە زەكىپ تاستادى
شىمكەنت قالاسى اكىمىنىڭ شتاتتان تىس كەڭەسشىسى دانات جۋمين قازاقشا بىلمەگەنى ءۇشىن داۋعا قالدى دەپ حابارلايدى «قامشى» پورتالى rgmedia.kz-كە سىلتەمە جاساپ.
جاڭا قىزمەتكە تاعايىندالعانىنا كوپ ۋاقىت بولا قويماعان 32 جاستاعى د. جۋمين شىمكەنتتىك جۋرناليستەر جانە بلوگەرلەردى جاقىنىراق تانىسۋ ماقساتىندا كەزدەسۋگە شاقىرعان. ءوز ءسوزىن ورىس تىلىنەن باستاعان اكىمنىڭ شتاتتان تىس كەڭەسشىسىنىڭ بۇل ارەكەتى قازاق ءتىلدى بلوگەرلەر مەن جۋرناليستەردىڭ قىتىعىنا تيگەن. قوناقتار شەنەۋنىكتەن مەملەكەتتىك تىلدە سويلەۋدى وتىنگەندە، دانات ەسبول ۇلى ءوزىنىڭ شەتەلدە ءبىلىم العانىن جانە وزىنە ىڭعايلى تىلدە عانا سويلەيتىنىن ايتىپ جۋرناليستەرگە دۇرسە قويعان.
«دانات جۋمين ءوز ءسوزىن سالەمدەسۋدەن باستادى. ورىس تىلىندە. ءبىزدىڭ قازاق تىلىندە سويلەۋ تۋرالى وتىنىشىمىزگە قۇلاق اسپادى. قايتا كەرىسىنشە، «مەن شەتەلدە وقىدىم، ماعان ءوزىم بىلەتىن تىلدە جاۋاپ بەرگەن ۇنايدى» دەپ اشۋلانىپ كەتتى»، – دەيدى بلوگەر ايگۇل ورىنبەك.
كەزدەسۋگە كەلگەندەردىڭ ءبىرقاتارى وسى ساتتە ورىندارىنان تۇرىپ شىعىپ كەتكەن. بلوگەرلەر قالا اكىمىنىڭ باسپا ءسوز قىزمەتىندەگىلەرگە حابارلاسىپ، ءمان-جايدى ءتۇسىندىرىپ بەرۋىن تالاپ ەتكەن. ءبىر قىزىعى، اكىمنىڭ باسپا ءسوز قىزمەتىندەگىلەر بۇل كەزدەسۋدەن بەيحابار بولىپ شىقتى. كەزدەسۋ ورنىنا قالالىق اكىمدىكتىڭ اپپارات باسشىسى راشيد ايۋپوۆ پەن اكىمنىڭ باسپا ءسوز حاتشىسى ءارى كەڭەسشىسى نۇرلىبەك جەڭىسبەك كەلىپ، شىعىپ كەتكەن قوناقتاردى ىشكە قايتا الىپ كىرگەن. قازاق ءتىلدى مەملەكەتتىك قىزمەتكەرلەر كەلگەن سوڭ كەزدەسۋ ارمەن قاراي جالعاسقان.
«ءوز ءتىلىن بىلمەگەن سوڭ كەرەگى نە؟.. قايتا اكىمدىكتىڭ اپپارات باسشىسى راشيد ايۋپوۆتىڭ كورەگەندىلىگىنە ريزا بولدىم. ول دا شەتەلدە ءبىلىم العان عوي»، – دەيدى بلوگەر.
قوناقتار ۇيىمداستىرۋشىلارعا سۇراقتار قويىپ، جاۋاپتار الدى. كەزدەسۋ سوڭىندا دانات جۋمين شىمكەنتتە ءجۇرىپ قازاقشا ۇيرەنەتىنىن ۋادە ەتتى.
ايتا كەتەيىك، دانات ەسبول ۇلى “بولاشاق” باعدارلاماسى بويىنشا اقش-تىڭ مونتانا شتاتىندا ءبىلىم العان.
