قازاقستان رەسپۋبليكاسىنىڭ قارۋلى كۇشتەرى، باسقا دا اسكەرلەرى مەن اسكەري قۇرىلىمدارىنىڭ اسكەري وقۋ ورىندارىنىڭ كۋرسانتتارى جانە اسكەري كافەدرالاردىڭ ستۋدەنتتەرى اراسىندا قارۋلى كۇشتەردىڭ ءىىى سپارتاكياداسى ءوتتى، - دەپ حابارلايدى «قامشى» پورتالى.

1941-1945 جىلدارداعى ۇلى وتان سوعىسى جەڭىسىنىڭ 70 جىلدىعىنا ارنالعان سپارتاكيادانىڭ جەڭىمپازدارىن ماراپاتتاۋ ءراسىمى الماتى قالاسىنداعى راديوەلەكترونيكا جانە بايلانىس اسكەري-قۇرلىق ينستيتۋتىندا بولىپ ءوتتى.

ماراپاتتاۋ ءراسىمىن قازاقستان رەسپۋبليكاسىنىڭ قارۋلى كۇشتەرى باس شتاب باستىعىنىڭ ورىنباسارى ءامىر حالىقوۆ جۇرگىزىپ، سپارتاكيادا جەڭىمپازدارىن ارنايى گراموتالارمەن ماراپاتتادى. سايىس قورىتىندىسى بويىنشا قازاقستان رەسپۋبليكاسىنىڭ ۇلتتىق ۇلانى اسكەري ينستيتۋتىنىڭ كۋرسانتتارى جۇلدەلى ءبىرىنشى ورىندى جەڭىپ الدى جانە ارنايى قارۋلى كۇشتەردىڭ كۋبوگىمەن ماراپاتتالدى.

«جاڭا باسەكە زامانىندا وزدەرىنىڭ مىقتى مامان-وفيسەر بولۋعا دەگەن ىنتاسىن ۇنەمى دالەلدەپ كەلەدى. بولاشاق وفيسەر مامانى بارلىق تۇرعىدان شىڭدالعان، ۇرىس تاكتيكالارىن سەنىمدى تۇردە قولدانا الاتىن، ساپتىق جانە جاۋىنگەرلىك دايارلىق ازىرلىكتەرىنەن مىقتى بولۋى ءتيىس. بۇل – زامان تالابى»، - دەيدى قازاقستان رەسپۋبليكاسىنىڭ قارۋلى كۇشتەرى باس شتاب باستىعىنىڭ ورىنباسارى ءامىر حالىقوۆ.