قازاق حاندىعى تاريحىمەن حالقىن قاۋىشتىرعان بەلگىلى جازۋشى ءىلياس ەسەنبەرليننىن ايگىلى تريلوگيا رومانى "كوشپەندىلەر" قازاق حاندىعىنىڭ 550 جىلدىعى جانە جازۋشىنىڭ تۋعانىنا 100 جىل تولۋىنا بايلانىستى تۇرىك تىلىنە اۋدارىلدى. تۇساۋكەسەر جينالىسى 10 جەلتوقسان كۇنى ستامبۇل ۋنيۆەرسيتەتى تۇركولوگيا ينستيتۋتى مەن قازاقستان انكارا ەلشىلىگى تاراپىنان ىستامبۇلدا وتكىزىلمەك، - دەپ حابارلايدى «قامشى» پورتالى.

قازاق ادەبيەتىنىڭ كورنەكتى جازۋشىلارىنان ءىلياس ەسەنبەرلين تاريحي روماندارىمەن ءبىر ەلدىن تاعدىرىن وزگەرتكەن الەمدە نەكەن ساياق كەزدەسەتىن جازۋشىلار قاتارىندا. ونىڭ كوپ جىلدار كوز مايىن تاۋىسىپ زەرتتەۋ جۇمىستارى جۇرگىزىپ بارىپ ەشكىمنىڭ تاريحي شىندىقتاردى جازۋعا دا، اتاۋعا دا باتىلى جەتپەگەن تۇستا جارىق كورگەن “كوشپەندىلەر” اتتى تريلوگياسى قازاق حالقىنىڭ ۇلتتىق سىيپاتىن ساقتاپ قالۋدا ماڭىزدى ءرول اتقارعان.

ميمار سينان كوركەم ونەر ۋنيۆەرسيتەتىنىڭ پروفەسسورى، تاريح عىلىمدارىنىڭ دوكتورى جانە اۋدارماشى ءابدىۋاقاپ قارامەن بىرگە بيىلعا ۇلگەرۋ ءۇشىن ءتورت اۋدارماشى تىزە قوسا وتىرىپ تۇرىك تىلىنە اۋدارعان ءۇش تومدىق روماننىڭ تۇساۋكەسەرىن قازاقستان انقارا ەلشىلىگىنىڭ قامقورشىلىعىندا ىستامبۇل ۋنيۆەرسيتەتى تۇركولوگيا ينستيتۋتى ۇيىمداستىرۋدا.

ينستيتۋتتىڭ جىل سايىن وتكىزىپ وتىرعان “نەمات كەلىمبەتوۆ وقۋلارى” اياسىندا “تاريحي سانا جانە ادەبيەت” دەگەن تاقىرىپپەن وتكىزىلەتىن تۇساۋكەسەر جينالىسىنا بەلگىلى عالىمدار، زيالى قاۋىم جانە ادەبيەت سۇيگىش وقىرماندار قاتىسادى دەپ كۇتىلۋدە.

2015 جىلى 10 جەلتوقساندا ىستامبۇلدا وتەتىن القالى جيىندى تۇركولوگيا ينستيتۋتىنىڭ ديرەكتورى پروفەسسور ازمي بىلگىن مەن قازاقستان انقارا ەلشىسى جانسەيىت تۇيمەبايەۆ ءسوز سويلەپ اشادى. وسىدان كەيىن ءبىر قاتار عالىمدار، اتاپ ايتقاندا مارمارا ۋنيۆەرسيتەتى تۇركولوگيا ينستيتۋتىنىڭ ديرەكتورى پروفەسسور گۇلشەن سەيحان الىشىق، جەتىتوبە ۋنيۆەرسيتەتىنىڭ پروفەسسورى احمەت تاشاعىل، ميمار سينان كوركەم ونەر ۋنيۆەرسيتەتىنىڭ پروفەسسورى ءابدىۋاقاپ قارا، وردۇ ۋنيۆەرسيتەتىنىڭ پروفەسسورى يسمايل دوعان، الماتىداعى سۇلەيمەن دەميرەل ۋنيۆەرسيتەتىنىڭ دوسەنتى ەسەنگۇل قاپ قىزى جانە تۇرىكسوي قازاقستان وكىلى جانە اۋدارماشى مالىك وتاربايەۆ ەسەنبەرليننىڭ ءومىرى، ەڭبەكتەرى جانە شىعارماشىلىعى مەن حالىقتىق تاريحي سانانى قالىپتاستىرۋداعى ادەبي تۋىندىلاردىڭ ءرولى تۋرالى باياندامالار جاساماق.

ەسەنبەرليننىڭ “كوشپەندىلەر” رومانىمەن تۇرىك – قازاق ادەبي بايلانىستارىندا جاڭا ءبىر كەزەڭ باستالىپ وقىرمانداردىڭ قازاق قالامگەرلەرىنىڭ تۋىندىلارىنا قىزىعۋشىلىعىنىڭ ودان ءارى ارتا تۇسەتىنى انىق.