مەن ەكى ۇعىمدى تۇسىنە الماي كەلەمىن. ءبىرى-جىل مەزگىلدەرى، ەكىنشىسى- تاۋلىك. ءبىزدى وقىتقاندا ءتورت جىل مەزگىلى بولادى: قىس، كوكتەم، جاز، كۇز، تاۋلىك- كۇندىز بەن تۇننەن تۇرادى دەپ وقىتتى. ءبىراق... ومىردە ءبىر جىلدا ەكى قىس، ءبىر تاۋلىكتە ەكى ءتۇن بولىپ ءجۇر. بۇل قالاي؟

         تۇسىندىرە المادىم با؟ باسىنان باستايىن. 2015 جىل قاڭتاردىڭ 1-نەن باستالدى. قاڭتار دەگەنىمىز قىستىڭ ايى. ودان كەيىن اقپان، ول دا قىستىڭ ايى. سودان سوڭ كوكتەم ايلارى، ناۋرىز، كوكەك، مامىر. ءارى قاراي جاز: ماۋسىم، شىلدە، تامىز، كۇز: قىركۇيەك، قازان، قاراشا. سوسىن جەلتوقسان. قىستىڭ باسى، ءبىراق ءالى 2015 جىل. نە بولىپ كەتتى! سوندا ءبىر جىلدا ەكى قىس... ال ءتۇسىنىپ كور!؟

         ەندى تاۋلىك. كەشە 10-جەلتوقسان، بۇگىن 11-جەلتوقسان. اپ-انىق سياقتى. تۇندە ساعاتقا قاراسام، 11-جەلتوقسان دەپ تۇر. شىنىندا 10-جەلتوقساننىڭ ءتۇنى، ءبىراق تۇنگى 12-دەن كەيىن 11-جەلتوقسان باستالىپ كەتكەن. كەشكە تاعى 11-جەلتوقساننىڭ ءتۇنى باستالادى. ءسويتىپ، 11-جەلتوقسان «تۇن-كۇندىز-تۇن» بولىپ تۇر. تاعى دا...، ءبىر تاۋلىكتە ەكى ءتۇن.

         پسيحولوگقا كورىنۋىم كەرەك سياقتى.

مەڭدىباي ءىزتۇرعان ۇلى