كەشە قازاقستاننىڭ ۇلتتىق قاۋىپسىزدىك كوميتەتىنىڭ باسشىسى اۋىستى. پرەزيدەنت نۇرسۇلتان نازاربايەۆ ۇلتتىق قاۋىپسىزدىك كوميتەتىندە ونىڭ ءتوراعاسى نۇرتاي ابىقايەۆتى زەينەت جاسىنا جەتۋىنە جانە باسقا جۇمىسقا اۋىسۋىنا بايلانىستى لاۋازىمىنان بوساتۋ تۋرالى شەشىم قابىلداعانىن جاريا ەتتى. ونىڭ ورنىنا پارلامەنت سەناتىمەن كەلىسىلگەن ۆلاديمير جۇماقانوۆ تاعايىندادى.
ۆلاديمير زەينوللا ۇلى جۇماقانوۆ 1955 جىلى 7 قاراشادا ركفسر-دىڭ سۆەردلوۆ وبلىسى گارين اۋدانىنىڭ دۋلكوۆو اۋىلىندا تۋعان. س.م. كيروۆ اتىنداعى قازاق مەملەكەتتىك ۋنيۆەرسيتەتىن، ف.دزەرجينسكيي اتىنداعى كسرو مقك جوعارى قىزىل تۋلى مەكتەبىن بىتىرگەن. 1977 جىلدان - س.م. كيروۆ اتىنداعى قازاق مەملەكەتتىك ۋنيۆەرسيتەتىنىڭ عىلىمي قىزمەتكەرى. 1982 جىلدان - قاۋىپسىزدىك ورگاندارىندا - ق ر ۇقك دەپارتامەنتىندە ءبولىم باستىعىنىڭ ورىنباسارى، ءبولىم باستىعى، باسقارما باستىعى، دەپارتامەنت باستىعىنىڭ ورىنباسارى، ق ر ۇقك ءتوراعاسىنىڭ كەڭەسشىسى. 2001 جىلدان - ق ر ۇقك لاڭكەستىككە قارسى كۇرەس دەپارتامەنتىنىڭ باستىعى. 2010 جىلدىڭ قىركۇيەك ايىنان بەرى ق ر ۇلتتىق قاۋىپسىزدىك كوميتەتى ءتوراعاسىنىڭ ءبىرىنشى ورىنباسارى قىزمەتىن اتقارعان. II دارەجەلى «ايبىن»، II دارەجەلى «داڭق» وردەندەرىمەن؛ 8 مەدالمەن ماراپاتتالعان. ق ر ۇقك قۇرمەتتى قىزمەتكەرى. ۇلتتىق قاۋىپسىزدىك كوميتەتىنىڭ گەنەرال-لەيتەنانتى.
ال، قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ ءتوراعاسى بولعان نۇرتاي ابىقايەۆ مەملەكەت باسشىسى نۇرسۇلتان نازاربايەۆتىڭ جارلىعىمەن قازاقستان رەسپۋبليكاسىنىڭ پارلامەنتى سەناتىنىڭ دەپۋتاتى بولىپ تاعايىندالدى.
نۇرتاي ءابىقاي ۇلى ابىقايەۆ 1947 جىلى 15 مامىردا الماتى وبلىسى جامبىل اۋدانى جامبىل اۋىلىندا دۇنيەگە كەلگەن. سۆەردلوۆسك قالاسىنداعى ۋرالسك پوليتەحنيكالىق ينستيتۋتىن، الماتى جوعارى پارتيا مەكتەبىن، رف پرەزيدەنتى جانىنداعى رەسەي مەملەكەتتىك قىزمەت اكادەمياسىن بىتىرگەن. ق ر پرەزيدەنتى اپپاراتىنىڭ باسشىسى، قازاقستاننىڭ ۇلىبريتانيا جانە سولتۇستىك يرلانديا بىرىككەن كورولدىگىندەگى، توتەنشە جانە وكىلەتتى ەلشىسى، شۆەسيا كورولدىگى، نورۆەگيا كورولدىگى، يرلانديا رەسپۋبليكاسىنداعى توتەنشە جانە وكىلەتتى ەلشىسى قىزمەتىن قوسا اتقارۋشى، ق ر پرەزيدەنتىنىڭ ءبىرىنشى كومەكشىسى، ق ر ۇقك ءتوراعاسى، ق ر سىرتقى ىستەر ءمينيسترىنىڭ ءبىرىنشى ورىنباسارى، ق ر پرەزيدەنتى اكىمشىلىگىنىڭ باسشىسى، ق ر پارلامەنتى سەناتىنىڭ ءتوراعاسى، قر-نىڭ رەسەيدەگى توتەنشە جانە وكىلەتتى ەلشىسى، ق ر سىرتقى ىستەر ءمينيسترىنىڭ ءبىرىنشى ورىنباسارى بولعان. 2010 جىلعى 23 تامىزدا ق ر ۇلتتىق قاۋىپسىزدىك كوميتەتىنىڭ ءتوراعاسى بولىپ تاعايىندالعان ەدى. ەكونوميكا عىلىمدارىنىڭ دوكتورى، رەسەي جاراتىلىستانۋ عىلىمدارى اكادەمياسىنىڭ اكادەميگى. ديپلوماتيالىق رانگى توتەنشە جانە وكىلەتتى ەلشى. ق ر ۇقك قۇرمەتتى قىزمەتكەرى. «قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆ»، «پاراسات»، «وردەن درۋجبى» (رەسەي)، «وردەن پوچەتا» (رەسەي) وردەندەرىمەن ماراپاتتالعان.
