الماتى وبلىستىق كوپ سالالى كلينيكالىق اۋرۋحاناسى بوساندىرۋ بولىمشەسىنىڭ دارىگەرلەرى سەگىز جىل ىشىندە 22 نارەستەنى زاڭسىز ساتقان، - دەپ حابارلايدى «قامشى» پورتالى كتك تەلەارناسىنا سىلتەمە جاساپ.

قۇرامىنا اكۋشەر دارىگەردەن باستاپ بولىمشە مەڭگەرۋشىسىنە دەيىنگى ارالىقتاعى 10 دارىگەر مەديسينالىق قىزمەتكەر كىرەتىن قىلمىستىق توپ وسى ۋاقىتقا دەيىن جاسىرىن ارەكەتتەرىن «جەمىستى» جۇرگىزىپ كەلگەن. تەرگەۋ ناتيجەسىندە بەلگىلى بولعانداي، ولار ءار نارەستەنى 150 مىڭ تەىگەدەن باستاپ 6 مىڭ اقش دوللارىنا دەيىنگى ارالىقتا ساۋدالاعان.

قىلمىستىق توپ بوساناتىن جالعىز باستى ايەلدەردى ازعىرىپ، بالاسىنان باس تارتۋعا ۇگىتتەگەن. قاتەلىكپەن جۇكتى بولعان جاس قىزدارعا تۋىس-تۋعاننىڭ الدىندا ۇياتقا قالماۋدىڭ، قولايسىز ماسەلەدەن وڭاي «قۇتىلۋدىڭ» جولىن ۇسىنعان. الايدا، بوسانعان كەلىنشەكتەر باس تارتقان سابيلەرى بالالار ۇيلەرىنە وتكىزىلەدى دەپ ويلاپ، ساۋدادان حابارسىز بولعان. باس تارتۋ قاعازىنا قول قويعىزىپ العان سوڭ، دارىگەرلەر كليەنت ىزدەۋگە كىرىسەتىن بولعان. بالا ساتىپ الۋشىلار، ادەتتە، ءسابي دۇنيەگە كەلگەن سوڭ 3-4 كۇن ىشىندە تابىلىپ وتىرعان.

سوڭعى بالا ساتۋ وقيعاسى وسى جىلدىڭ كوكتەمىندە اشكەرەلەنىپ، قىلمىستاق توپ جاۋاپقا تارتىلعان.

اۋرۋحانانىڭ جاڭا باسشىسى جۇماحان مولداقۇلوۆ قازىرگى تاڭدا اۋرۋحانادا قاۋىپسىزدىك شارالارىنا قاتاڭ ءمان بەرىلەتىنىن، ناۋقاستار مەن بوساناتىن ايەلدەر ءجىتى باقىلاۋعا الىنعانىن ايتىپ وتىر.