الماتى وبلىسىنداعى ۇزىناعاش جانە زارەچنىي كەنتتەرىندەگى 28237 جانە 7552 اسكەري بولىمدەرىندە ۇلتتىق ۇلان جاس ساربازدارىنىڭ اسكەري انت قابىلداۋ ءراسىمى بولىپ ءوتتى، - دەپ حابارلايدى «قامشى» پورتالى ۇلتتىق ۇلان «وڭتۇستىك» وڭىرلىك قولباسشىلىعى باسپا ءسوز قىزمەتىنە سىلتەمە جاساپ.

اسكەري قىزمەتشىنىڭ ومىرىندە ءبىر-اق رەت بولاتىن وسى  ءراسىمدى تاماشالاۋعا جاس جاۋىنگەرلەردىڭ اتا-انالارى، تۋعان-تۋىستارىمەن قاتار ۇلتتىق ۇلان «وڭتۇستىك» وڭىرلىك قولباسشىلىعىنىڭ وفيسەرلەرى، ۇلتتىق ۇلان ارداگەرلەرى جانە ءوزارا ارەكەتتەگى بايلانىس ورگاندارىنىڭ وكىلدەرى دە ارنايى قاتىستى.

انت قابىلداۋ مەرەكەسىن اسكەري ءبولىم كومانديرلەرى سالتاناتتى تۇردە اشىق دەپ جاريالاعان سوڭ 300-گە جۋىق ۇلتتىق ۇلان جاس ساربازدارى اتا-انالارى، تۋعان تۋىستارى مەن كومانديرلەرىنىڭ الدىندا «وتانعا ادال قىزمەت ەتەمىز!» دەپ اسكەري سالتاناتتى تۇردە انت قابىلدادى.

انت قابىلداۋ راسىمىنە ارنايى كەلگەن ۇلتتىق ۇلان «وڭتۇستىك» وڭىرلىك قولباسشىلىعى قولباسشىسىنىڭ ورىنباسارى مارلەن اپپازوۆ پەن «وڭتۇستىك» وڭىرلىك قولباسشىلىعىنىڭ تاربيە جانە الەۋمەتتىك-قۇقىقتىق جۇمىستار باسقارماسىنىڭ باستىعى نيازتاي الكەشيەۆ جاس ساربازدارعا وزدەرىنىڭ جالىندى قۇتتىقتاۋ تىلەكتەرىن ارناپ، ولاردى وتان الدىندا قابىلداعان اسكەري انتتارىنا ادال بولۋعا، مەملەكەتىمىزدىڭ تىنىشتىعىن قورعاۋ جولىنا ءوز ۇلەستەرىن قوسۋعا شاقىردى. بۇنىمەن قوسا ۇلتتىق ۇلان اردەگەرلەر كەڭەسىنىڭ اتىنان وتستاۆكاداعى پولكوۆنيك سويۋزجول جۇمانوۆ جانە لا-152/14 تۇزەۋ مەكەمەسى باستىعىنىڭ ورىنباسارى باقىت جۇمابەكوۆ دا ساربازدارعا جالىندى تىلەكتەرىن ارنادى.

اتا-انالاردىڭ اتىنان ءسوز سويلەگەن جاس سارباز ەلتاي بەرىكتىڭ اكەسى اقساقال بۇزاۋبايەۆ ورال ساربازدارعا وسى قابىلداعان انتتارىنا ادال بولۋلارىن، اسكەري قىزمەتتىڭ قيىندىقتارىنا مويىماي، تاباندىلىقپەن توتەپ بەرۋگە شاقىرىپ، ۇيگە، اتا-انالارىنا امان-ەسەن ورالۋلارىن تىلەسە، سارباز گانەيەۆ ۆيكتوردىڭ اناسى ۇلاندىقتارعا ارناپ ولەڭ وقىپ بەردى. بۇنىمەن قوسا سارباز ەرەجەپ قۇربانوۆتىڭ اجەسى يبراگيموۆا انار ءوز نەمەرەسىنىڭ ۇلتتىق ۇلان قاتارىندا اسكەري بورىشىن وتەيتىنىن ماقتان تۇتانىن ايتىپ، قۋانىشىمەن ءبولىستى.

اسكەري انت قابىلداۋ ءراسىمىنىڭ رەسمي بولىگىنەن سوڭ جينالعان جۇرتشىلىق اتقىشتار ۆزۆودى ساربازدارىنىڭ قارۋمەن جانە قويان-قولتىق ۇرىسى تاسىلدەرىن كورسەتۋ ونەرىن تاماشالادى.