الماتىنىڭ «قايرات» فۋتبول كومانداسىنا جاڭا باپكەر كەلدى. رەسەيلىك مامان الەكساندر بوروديۋك باس باپكەر بولىپ تاعايىندالدى. بۇل تۋرالى «قامشى» پورتالى كلۋبتىڭ رەسمي سايتىنا سىلتەمە جاساپ حابارلايدى. 

53 جاستاعى جاتتىقتىرۋشىمەن الماتى كلۋبى ءۇش جىلدىق كەلىسىمشارتقا قول قويدى.

بوروديۋكتىڭ باپكەرلىك كارەراسى 2001 جىلى «كرىليا سوۆەتوۆ» كومانداسىنان باستاعان. كەلەسى جىلى رەسەي ۇلتتىق قۇراماسىنىڭ باپكەرلەر شتابىندا جۇمىس ىستەدى. ارادا ءۇش جىل وتكەندە رەسەي جاستار قۇراماسىنىڭ تىزگىنىن ۇستادى. سونىمەن قاتار رەسەي ۇلتتىق قۇراماسىندا اعا باپكەر قىزمەتىن قوسا اتقاردى. گۋس حيددينك پەن ديك ادۆوكاتتىڭ كومەكشىلەرى بولعان. 

2013 جىلى بوروديۋك ماسكەۋدىڭ «تورپەدو» كلۋبىنا باس باپكەر بولىپ تاعايىندالدى. ونىڭ كەزىندە كوماندا پرەمەر-ليگاعا ورالدى.

ايتا كەتەيىك، «قايراتتى» سوڭعى ءۇش جىلدا سلوۆاكيالىق مامان ۆلاديمير ۆايسس جاتتىقتىرعان بولاتىن. ۆايسستىڭ كەزىندە كوماندا ەكى رەت قازاقستان كۋبوگىندا جەڭىسكە جەتتى. سونداي-اق ءۇش رەت ەل بىرىنشىلىگىندە جۇلدەگەر بولدى.