موڭعوليا بوكس فەدەراسياسى 2015 جىلعى ۇزدىك 10 بوكسشىنىڭ ءتىزىمىن جاريالادى. ولاردىڭ ەكەۋى – نۇرلان اسقار ۇلى مەن ەربولات تولەك ۇلى – سول ەلدە تۋىپ-وسكەن ەتنيكالىق قازاق ازاماتتارى، - دەپ حابارلايدى «قامشى» پورتالى ازاتتىق راديوسىنا سىلتەمە جاساپ. 

موڭعوليانىڭ بيىلعى ۇزدىك 10 بوكسشىسىنىڭ ءبىرى نۇرلان اسقار ۇلى (52 كيلوگرامم سالماقتا بوكستاسادى) – حالىقارالىق دارەجەدەگى سپورت شەبەرى، 2015 جىلعى ەل بىرىنشىلىگىنىڭ قولا جۇلدەگەرى، حالىقارالىق «ا» دارەجەلى تۋرنيردەن ءبىر كۇمىس جانە ەكى قولا مەدال يەلەنگەن سپورتشى.

ال ەكىنشىسى ەربولات تولەك ۇلى (91 كيلوگرامنان اۋىر سالماقتا سايىسادى) – سپورت شەبەرى، 2015 جىلعى ەل چەمپيونى، حالىقارالىق «ا» دارەجەدەگى تۋرنيردەن ەكى كۇمىس مەدال يەلەنگەن بوكسشى.

«ءۇش اي دايىندالىپ قولا مەدال الدىم»

21 جاستاعى نۇرلان اسقار ۇلى – موڭعوليا استاناسى ۇلانباتىر قالاسىنداعى دەنە شىنىقتىرۋ ۋنيۆەرسيتەتىنىڭ ءتورتىنشى كۋرس ستۋدەنتى. ول بوكسپەن 15 جاسىنان بەرى عانا اينالىسا باستاعان.

- بوكس ۇيىرمەسىنە باراتىن اعامنان اندا-ساندا ۇيدە ساباق العانىم بولماسا، وعان دەيىن بوكسپەن اينالىسپادىم. العاش 2009 جىلى اعاما ەرىپ بوكس سەكسياسىنا باردىم. ءۇش ايدان كەيىن موڭعوليانىڭ جاسوسپىرىمدەر اراسىندا وتكەن تۋرنيرىندە قولا مەدالعا يە بولدىم. بوكسپەن اينالىسۋىما وسى جەڭىس تۇبەگەيلى اسەر ەتتى، – دەدى نۇرلان ازاتتىق تىلشىسىنە.
نۇرلان اسقار ۇلى 2010 جىلى جاسوسپىرىمدەر اراسىندا وتكەن ەل بىرىنشىلىگىندە التىن مەدال يەلەنگەن. ول ەرەسەكتەر اراسىندا وتكەن ەل بىرىنشىلىگىندە 2011، 2013 جانە 2015 جىلدارى – قولا، 2014 جىلى – كۇمىس مەدال العان. اتىراۋ قالاسىندا وتكەن يساتاي مەن ماحامبەت اتىنداعى ءتۋرنيردىڭ 2014 جىلعى جەڭىمپازى، 2015 جىلى كۇمىس جۇلدەگەرى بولعان نۇرلان باسقا دا حالىقارالىق جارىستاردا جۇلدە العان.

بيىلدان باستاپ 56 كيلوگرامم سالماق دارەجەسىندە رينگكە شىعۋعا دايىندالىپ جۇرگەن نۇرلان اسقار ۇلى «بولاشاقتاعى ماقساتىم – وليمپياداعا قاتىسۋ» دەيدى.

سپورتشىنىڭ بۇرىنعى باپكەرى، بايان-ولگيي ايماقتىق بوكس فەدەراسياسىنىڭ ءتوراعاسى قاينار قايساناي ۇلى نۇرلان اسقارۇلىن «بوكسقا وتە كەش كەلسە دە، جىلدام جەتىستىككە جەتكەن تالانتتى بوكسشى» دەپ سيپاتتايدى.

- ارينە، وزگە ەل، وزگە جەر بولعاندىقتان وتكەن جىلدارى ۇلتتىق تۇرعىدان اياقتان شالۋ بولدى. سوندا دا نۇرلان ءوزىنىڭ كىم ەكەنىن دالەلدەي الدى. سونىڭ ارقاسىندا بيىل ءبىرشاما حالىقارالىق جارىستارعا جولداما الدى، – دەيدى قاينار قايساناي ۇلى.

«ارتىقتاۋ تۇسسەڭ – تەڭسىڭ، تەڭ تۇسسەڭ – كەمسىڭ»

ازاتتىق ءتىلشىسى بيىل موڭعوليانىڭ ۇزدىك بوكسشىلارىنىڭ وندىعىنا ەنگەن تاعى ءبىر ەتنيكالىق قازاق ەربولات تولەكۇلىمەن (25 جاستا) تىلدەسە المادى. تۋىستارى ونىڭ ۋاقىتشا دەمالىس الىپ، اۋىلىنا كەتكەنىن ايتادى.

ەربولاتتى دا جارىسقا دايىنداعان باپكەر قاينار قايساناي ۇلىنىڭ سوزىنشە، سپورتشى اۋەلى 2008 جىلى ەل بىرىنشىلىگىندە 81 كيلوگرامم سالماقتا قولا مەدال الىپ كوزگە تۇسكەن. ەربولات تولەك ۇلى 2010 جىلى ستۋدەنتتەر اراسىندا وتكەن ەل بىرىنشىلىگىندە – كۇمىس مەدال، 2011 مەن 2013 جانە 2014 جىلى ەرەسەكتەر اراسىندا وتكەن ەل بىرىنشىلىگىندە – كۇمىس مەدال، 2012 جىلى ەرەسەكتەر اراسىنداعى ەل بىرىنشىلىگىندە جانە ءتورت جىلدا ءبىر رەت بولاتىن بۇكىلحالىقتىق سپارتاكيادادا التىن مەدال يەلەنگەن. ول 2011 جىلى يساتاي مەن ماحامبەت اتىنداعى حالىقارالىق تۋرنيردە (قازاقستان) كۇمىس مەدال العان. 
- ەربولات 2012 جىلدان بەرى موڭعوليانىڭ اۋىر سالماقتاعى بوكسشىلارىن باستاپ كەلەدى. ءبىراق موڭعوليا بوكس فەدەراسياسىنىڭ شەشىمىمەن وليمپيادالىق ويىندارعا جىبەرىلمەي وتىر. ويتكەنى بوكس فەدەراسياسى «اۋىر سالماقتا ەشقانداي جەتىستىككە جەتە المايمىز، سول سەبەپتى بوسقا اقشا شىعىنداۋدىڭ قاجەتتىلىگى جوق» دەگەن پىكىردە، – دەيدى باپكەر قاينار قايساناي ۇلى.

ءقازىر موڭعوليانىڭ بوكستان ۇلتتىق قۇراماسىندا ەكى قازاق قانا جۇرگەنىن ايتقان باپكەر «بۇعان سەبەپ – ايماعىمىزدا بوكس مەكتەبىنىڭ دامىماي قالعانى» دەپ قىنجىلادى.

- 2009 جىلدان بەرى ءبىزدىڭ جاستار شاماسى جەتكەنشە جىلىنا ءبىر رەت قازاقستانعا – بوكستان وليمپياداعا دايارلاۋ ورتالىعىنا بارىپ، سولاردىڭ وقۋ-جاتتىعۋ جيىنىنا قاتىسىپ كەلەدى. ءقازىر مۇنىڭ ناتيجەسىن كورىپ جاتىرمىز. وعان دەيىن بايان-ولگييدەگى بوكسپەن اينالىساتىن جاستار اراسىندا باسەكە بولماعاندىقتان جىگىتتەر مۇلدەم وسپەيتىن، – دەيدى بايان-ولگيي ايماقتىق بوكس فەدەراسياسىنىڭ ءتوراعاسى قاينار قايساناي ۇلى.

ونىڭ سوزىنشە، موڭعولياداعى قازاق بوكسشىلارى جارىستا وزىپ شىعۋ ءۇشىن قارسىلاستارىن ايقىن باسىمدىقپەن ۇتۋعا تىرىسادى. «ويتكەنى سايىستا تەڭ بولساڭ – كەم بولاسىڭ، ال ءسال ارتىقتاۋ بولساڭ – تەڭ بولاسىڭ» دەيدى باپكەر.