بۇگىن ەلىمىزدە يسلامتانۋ عىلىمى بويىنشا تۇڭعىش عىلىمي ديسسەرتاسيا قورعالدى. نۇر-مۇباراك ۋنيۆەرسيتەتىنىڭ العاشقى دوكتورانتتارى قايرات قۇرمانبايەۆ «6D021500 – يسلامتانۋ» ماماندىعى بويىنشا «حۋسامۋددين ءاس-سىعناقي ەڭبەكتەرىندەگى «ۋسۋل ءال-فيقھ» ءىلىمىنىڭ لينگۆيستيكالىق نەگىزدەرى» تاقىرىبىندا، ال الماسبەك شاعىربايەۆ «6D020600 – ءدىنتانۋ» ماماندىعى بويىنشا «ءماشھۇر ءجۇسىپ كوپەي ۇلىنىڭ ءدىني كوزقاراسى» تاقىرىبىندا ديسسەرتاسياسىن قورعاپ شىقتى، - دەپ حابارلايدى muslim.kz.
قايرات قۇرمانبايەۆتىڭ وتاندىق عىلىمي كەڭەسشىسى فيلولوگيا عىلىمىنىڭ دوكتورى، پروفەسسور، شىعىستانۋ ينستيتۋتىنىڭ ديرەكتورى ا.ب.دەربىسالى: «بۇل عىلىمي قورعاۋ ءبىزدىڭ ءتول تاريحىمىزدى تانۋدا، ەلىمىزدەگى يسلام ءدىنىنىڭ تەرەڭ تامىرىن زەردەلەۋدە وتە ماڭىزدى. كەڭەستىك كەزەڭدە بىزگە قازاق حالقىنىڭ تاريحى جوق دەپ ۇيرەتكەن. ال ءقازىر قاراساق، ءبىر عانا ال-فارابيلەر 30-عا جۋىق، كونە تارازدان 60 عالىم، 15 تۇركىستاني، ءۇندىستان جەرىنەن 7-8 ياسساۋيلەردىڭ ەڭبەكتەرى تابىلىپ جاتىر. ياعني ءبىزدىڭ اتا-بابالارىمىزدىڭ دانالىعى مەن ءبىلىم بۇلاقتارىن دالەلدەيتىن دەرەكتەر وتە كوپ، حالقىمىز رۋحاني وتە باي بولعان. نۇر-مۇباراك ۋنيۆەرسيتەتىنىڭ مىندەتى سونىڭ بارلىعىن ەلگە قايتارىپ، عىلىمي اينالىمعا ەنگىزۋ. مىنە بۇگىن سونىڭ العاشقى كوشى باستالدى دەۋگە بولادى. قايرات قۇرمانبايەۆتىڭ بۇل عىلىمي ديسسەرتاسياسى كىتاپ بولىپ شىقسا، قولدان قولعا وتەتىن قۇندى ەڭبەك بولاتىندىعىنا سەنىمدىمىن»، – دەپ قورعاۋشىنىڭ زەرتتەۋىن جوعارى باعالادى.
ال، «6D020600 – ءدىنتانۋ» ماماندىعى بويىنشا الماسبەك شاعىربايەۆ «ءماشھۇر ءجۇسىپ كوپەي ۇلىنىڭ ءدىني كوزقاراسى» تاقىرىبىندا ديسسەرتاسيا قورعادى. وسى كەزگە دەيىن ونعا جۋىق عىلىمي جۇمىسقا تاقىرىپ بولعان م.ءجۇسىپتىڭ ەڭبەكتەرى تۇڭعىش رەت فيقھ عىلىمى تۇرعىسىنان، ونىڭ 40 پارىزعا جانە شاريعي تاراپتان عيباداتتاعى ۇستانىمدارى، سونىمەن قاتار اقيدالىق سەنىمگە قاتىستى كوزقاراستارى ماتۋريديلىك ىلىمىمەن بايلانىستى قاراستىرىلعان. بۇگىنگى ءتۇرلى جات اعىمدارعا قاتىستى اتا-بابالارىمىزدىڭ ايقىن ۇستانىمىن ايتۋدا ماڭىزدى ايعاق بولاتىن جاڭا زەرتتەۋ.
وسىلايشا، بۇگىن نۇر-مۇباراك ەگيپەت يسلام مادەنيەتى ۋنيۆەرسيتەتى جانىنداعى ءدىنتانۋ بويىنشا ديسسەرتاسيالىق كەڭەسىندە فيلوسوفيا دوكتورى (PhD) عىلىمي دارەجەسىن ەكى بىردەي دوكتورانت وتە جوعارى باعادا قورعاپ شىقتى. ءبىرى يسلامتانۋ عىلىمى بويىنشا شەت ەلدەردەگى اتا-بابالارىمىزدىڭ مۇرالارىن ەلمەن قاۋىشتىرسا، ەندى ءبىرى ءدىنتانۋ بويىنشا قازاق دالاسىنداعى يسلام ءدىنى ۇستانىمىن عىلىمي دەڭگەيدە دالەلدەپ شىقتى. عىلىم سالاسىنا دەن قويعان جانە قىزىققان جاندار دا بۇگىنگى ديسسەرتاسيالىق قورعاۋعا باستان-اياق كۋا بولدى.
عىلىم دوكتورى، پروفەسسور اشىربەك مۋمينوۆ باستاعان قۇرامىندا 11 عالىم بار ديسسەرتاسيالىق كەڭەس نۇر-مۇباراك ۋنيۆەرسيتەتىندەگى بۇگىنگى باستالعان عىلىم كوشىنە ساتتىلىك تىلەدى.
