جەزوكشەلەر قىزمەتتەرىن زاڭداستىرىپ، جەكە كاسىپكەر رەتىندە تىركەلۋلەرىنە بولادى. بۇل تۋرالى ادۆوكات جانگەلدى سۇلەيمەنوۆ مالىمدەدى، - دەپ حابارلايدى «قامشى» پورتالى Tengrinews.kz – كە سىلتەمە جاساپ.

ادۆوكاتتىڭ ايتۋىنشا زاڭنامادا جەزوكشەلىككە ايىپپۇل سالۋ 1987-2001 جىلدار ارالىعىندا ارنايى باپپەن بەكىتىلگەن. كەڭەس كەزىندە جەزوكشەلىكپەن اينالىسقانى ءۇشىن 100 رۋبل ايىپ سالىناتىن بولعان. رەسەيدە ءقازىر وسى زاڭ بابى ساقتالىپ، جەڭىل جۇرىستىلەرگە 1500 رۋبل كولەمىندە ايىپپۇل سالىنادى ەكەن.

«قازاقستاندا 2001 جىلى جاڭا اكىمشىلىك قۇقىقبۇزۋشىلىق كودەكسى قابىلداندى. مۇندا اتالعان باپ قاراستىرىلمادى. وسى ۋاقىتتان باستاپ جەزوكشەلىك زاڭدى قىزمەت بولىپ تابىلادى دەپ ساناۋعا بولادى. مۇندا كەي باپتاردىڭ جوعالىپ كەتۋىن زاڭ جاساۋشىلار بايقاماي قالعان»، - دەگەن ادۆوكات ءقازىر جەزوكشەلەرگە قاتىستى اكىمشىلىك قۇقىقبۇزۋشىلىق كودەكسىنىڭ 449-بابى (قوعامدىق ورىندا مازانى الۋ) قولدانىلىپ جۇرگەنىن ەسكەرتتى.

«449-باپ قوعامدىق ورىندا سەكسۋالدىق قىزمەت ۇسىنۋعا تىيىم سالادى. ياعني، قوعامدىق ورىنداردان باسقا جەرلەردە مۇنداي قىزمەت كورسەتۋگە تىيىم جوق. جەزوكشەلىك – جىنىستىق سيپاتتاعى قىزمەتتەردى جۇيەلى تۇردە اقىلى كورسەتۋ. ياعني، كاسىپكەرلىك نىسانى بولا الادى. تاعى ءبىر ءجايت، ازاماتتىق كودەكستە 380-باپ «كەلىسىم-شارت ەركىندىگىن» قاراستىرادى. مۇندا تاراپتار زاڭدا كورسەتىلگەن دە، كورسەتىلمەگەن دە كەلىسىمدەرگە كەلۋلەرىنە بولادى. سەكسۋالدى قىزمەت كورسەتۋگە مۇندا دا تىيىم سالىنباعان. كەلىسىم اۋىزشا دا، جازباشا دا جاسالۋىنا رۇقسات. وسىعان قاراپ وتىرىپ، ءبىز ءقازىر جەزوكشەلىكتى زاڭداستىرۋدىڭ قاجەتى جوق، ويتكەنى، ول ءقازىردىڭ وزىندە زاڭداستىرىلىپ قويعان»، - دەيدى زاڭگەر.