"قازگيدرومەت" ورتالىعىنىڭ ماماندارى 2016 جىلى قاڭتاردا قازاقستاندا اۋا رايىنىڭ قانداي بولاتىنىن ايتتى، - دەپ حابارلايدى «قامشى» پورتالى.
ورتالىق ينجەنەرى ءاليا وسپانوۆانىڭ ايتۋىنشا، قاڭتار ايىندا قىزىلوردا، وڭتۇستىك قازاقستان، جامبىل، الماتى، قاراعاندى جانە شىعىس قازاقستان وبلىستارىندا اۋا تەمپەراتۋراسى نورماعا ساي بولادى، ال قالعان وبلىستاردا نورمادان 1 گرادۋسقا تومەن بولادى.
سونىمەن قاتار، باتىس قازاقستان، اتىراۋ، قىزىلوردا وبلىستارىنىڭ كەي جەرلەرىندە جاۋىن-شاشىننىڭ ءتۇسۋ كولەمى نورمادان تومەن بولادى. ءوز كەزەگىندە قوستاناي وبلىسىنىڭ سولتۇستىگىندە، سولتۇستىك قازاقستان، پاۆلودار، اقمولا وبلىسىنىڭ كەي جەرلەرىندە جانە قاراعاندى وبلىسىنىڭ كەي اۋداندارىندا، سونىمەن قاتار، وڭتۇستىك، وڭتۇستىك-شىعىس پەن شىعىستاعى تاۋلى جانە تاۋ ەتەگىندەگى اۋدانداردا جاۋىن-شاشىن كولەمى نورمادان جوعارى بولادى. ال قالعان وڭىرلەردە جاۋىن-شاشىن نورماعا ساي تۇسەدى.
سينوپتيكتەردىڭ مالىمەتىنشە، قاڭتار ايىنىڭ باسىندا سولتۇستىك بولىكتىڭ اۋا رايىنا اركتيكالىق انتيسيكلون ىقپال ەتىپ، تۇندە اۋا تەمپەراتۋراسى 25-33 گرادۋسقا دەيىن تومەندەيدى، كۇندىز 20-25 گرادۋس اياز بولادى، ال وڭتۇستىك بولىككە - وڭتۇستىك-كاسپيي سيكلونى. بۇل وڭىرلەردە اۋا رايى بۇزىلادى: جاۋىن-شاشىن، تۇندە جانە تاڭەرتەڭ تۇمان ءتۇسىپ، كوكتايعاق بولادى، كەي جەرلەردە جەلدىڭ جىلدامدىعى سەكۋندىنا 15-20 مەترگە دەيىن جەتىپ، تۇندە 0-5، كۇندىز 3-10 گرادۋس جىلى بولادى.
جاڭا 2016 جىلدىڭ جۇمىس اپتاسى باستالعاندا رەسپۋبليكا اۋماعى سۋىق اركتيكالىق انتيسيكلوننىڭ ىقپالىندا بولادى دەپ كۇتىلىپ وتىر، وسىعان بايلانىستى اۋا تەمپەراتۋراسى تومەندەپ، قاڭتاردىڭ ءبىرىنشى ونكۇندىگىنىڭ سوڭىندا قاتتى اياز بولادى: سولتۇستىكتە تۇندە 33-38، كۇندىز 25-30 گرادۋس اياز بولادى، ال وڭتۇستىكتە تۇندە 13-23، كۇندىز 8-13 گرادۋس سۋىق بولادى. قاڭتاردىڭ ورتاسىندا ايازدىڭ بەتى قايتادى. وعان وڭتۇستىك سيكلون سەبەپشى بولىپ، تۇراقسىز اۋا رايىن وزىمەن بىرگە الىپ كەلەدى دەگەن بولجام بار. "سۋىقتىڭ تاعى ءبىر تولقىنى ەكىنشى ونكۇندىكتىڭ سوڭىندا باستالىپ، ايدىڭ ءۇشىنشى ونكۇندىگىندە ساقتالادى"، - دەپ حابارلادى "قازگيدرومەت" ماماندارى. سونىمەن قاتار، ۆەدومستۆو وكىلدەرى قاڭتاردىڭ ەكىنشى جارتىسىنا جاسالعان بولجامنىڭ سينوپتيكالىق جاعدايلارعا بايلانىستى وزگەرۋى مۇمكىن ەكەنىن ەسكەرتتى.
