رەسەي پرەزيدەنتى ۆلاديمير پۋتين ۋكراين تاۋارىن قازاقستانعا تاسىمالداۋدى رەتتەيتىن جارلىققا قول قويدى، - دەپ حابارلايدى «قامشى» پورتالى ريا نوۆوستي-گە سىلتەمە جاساپ.

جارلىقتا ۋكراينادا وندىرىلگەن تاۋارلاردى ەۋرازيالىق ەكونوميكالىق وداق مۇشەسى قازاقستانعا تاسىمالداۋدىڭ ءتارتىبى بەكىتىلگەن. اتاپ ايتقاندا، قازاق ەلىنە جول تارتقان تاۋارلار رەسەي اۋماعىنا تەك بەلارۋسيا شەكاراسى ارقىلى عانا ءوتۋى ءتيىس. سونىمەن قاتار، جۇكتەر كەدەرگىسىز قازاقستانعا ءوتۋى ءۇشىن تۇگەل پلومبالانعان، گلوناسس عالامدىق ناۆيگاسيالىق باقىلاۋ جۇيەسىنە قوسىلعان كولىكتەر ارقىلى عانا تاسىمالدانۋى كەرەك ەكەن. سونداي-اق، رەسەي تارابى جۇك تاسۋشى كولىك جۇرگىزۋشىلەرىنىڭ تىركەۋ تالوندارىنىڭ بولۋىن دا مىندەتتەپ وتىر.

ءقازىر رەسەي ۇكىمەتى اتالعان پلومبالاردىڭ نۇسقاسىن بەكىتۋ مەن ولاردى قولدانۋ ءتارتىبىن قاراستىرىپ جاتىر. بۇل وزگەرىستەر ۋكراينا مەن رەسەي اراسىنداعى كيكىلجىڭ سالدارىنان رەسەيدىڭ ۋكرايناعا قاتىستى ەركىن ساۋدا ايماعى تۋرالى كەلىسىمدى توقتاتۋىنا بايلانىستى جاسالىپ وتىر. كرەمل اتالعان شەكتەۋلەر رەسمي جاريالانعان كۇننەن باستاپ 1 شىلدەگە دەيىن سوزىلاتىنىن حابارلادى.

وسىلايشا، ساۋدا-ەكونوميكالىق قارىم-قاتىناسقا نەگىزدەلگەن ەۋرازيالىق ەكونوميكالىق وداقتىڭ 2016 جىلعى جۇمىسى رەسەيدىڭ وداقتاستارىنا ەكونوميكالىق شەكتەۋ قويۋىمەن باستالىپ وتىر.